ମୁମ୍ବାଇ: ସୋନି ଟିଭିରେ ପ୍ରସାରିତ 'କୌନ ବନେଗା କୋରର୍ କରୋଡପତି'(କେବିସି)ର ଚଳିତ ବର୍ଷର ପ୍ରଥମ କୋଟିପତି ହୋଇଛନ୍ତି ଆସାମର ବିନୀତା ଜୈନ୍। ସେ ୧୪ଟି ପ୍ରଶ୍ନର ସଠିକ୍ ଉତ୍ତର ଦେବା ସହ ୧ କୋଟି ଟଙ୍କା ଜିତିବାରେ ସଫଳ ହୋଇଛନ୍ତି।
ବିଗ୍ ବି ଅମିତାଭ ବଚ୍ଚନ୍ ହୋଷ୍ଟ କରୁଥିବା ଏହି କେବିସି ଶୋ' ର ୧୦ମ ସଂସ୍କରଣ ସେପ୍ଟେମ୍ବର ୪ରୁ ଆରମ୍ଭ ହୋଇଥିଲା। କିନ୍ତୁ ଆଜି ଯାଏ କୌଣସି ପ୍ରତିଯୋଗୀ ଏତେ ଟଙ୍କା ଜିତିବାରେ ସକ୍ଷମ ହୋଇନଥିଲେ। ଭାଗଲପୁରର ସୌମେଶ କୁମାର ଚୌଧୁରୀ ଓ ଗୁଜରାଟ୍ର ଗ୍ରାଫିକ୍ସ ଡିଜାଇନର୍ ସନ୍ଦୀପ ସାଭାଲିୟା ସର୍ବାଧିକ ୨୫ ଲକ୍ଷ ଟଙ୍କା ଲେଖାଏ ଜିତିପାରି ଥିଲେ। ତେବେ ଉଭୟ ୧୩ ନମ୍ବର ପ୍ରଶ୍ନର ଉତ୍ତର ଦେବାକୁ ଅକ୍ଷମତା ପ୍ରକାଶ କରିବା ସହ ଶୋ’କୁ ଛାଡ଼ିବାକୁ ନିଷ୍ପତ୍ତି ନେଇଥିଲେ।
କିନ୍ତୁ ବନୀତା ୧୪ଟି ପ୍ରଶ୍ନର ଉତ୍ତର ଦେଇ କୋଟିଏ ଟଙ୍କା ଜିତିଛନ୍ତି। ଆସନ୍ତା ଅକ୍ଟୋବର ୨ରେ ସେ ୭ କୋଟି ଟଙ୍କାର ଟପ ପୁରସ୍କାର ପାଇଁ ପ୍ରଶ୍ନର ସାମ୍ନା କରିବେ। ସେ ଏହି ପ୍ରଶ୍ନର ଉତ୍ତର ଦେବେ ନା କୋଟିଏ ଟଙ୍କା ନେଇ ଶୋ’ ଛାଡ଼ିବେ, ତା’ ଉପରେ ଏବେ ସମସ୍ତଙ୍କ ନଜର ରହିଛି।
ଗତ ସଂସ୍କରଣରେ କୌଣସି ପ୍ରତିଯୋଗୀ ୭ କୋଟି ଟଙ୍କା ଜିତି ପାରି ନଥିଲେ। କିନ୍ତୁ ଜାମସେଦପୁରର ଅନାମିକା ମଜୁମଦାର କୋଟିଏ ଟଙ୍କା ଜିତିବା ପରେ ଶୋ’ ଛାଡ଼ି ଦେଇଥିଲେ।
ପୂର୍ବଥର ଭଳି ଏଥର ମଧ୍ୟ ଜଣେ ମହିଳା କୋଟିପତି ହୋଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।