ଥିରୁଭନନ୍ତପୁରମ (ଓଡ଼ିଶା ରିପୋର୍ଟର): ସାବରୀମାଲା ମନ୍ଦିରରେ ମହିଳା ପ୍ରବେଶ ପାଇଁ ଆଉ ଅଳ୍ପ କିଛି ଘଣ୍ଟା ବାକି। ଏହାପୂର୍ବରୁ ଶାବରୀମାଲା ମୁଖ୍ୟ ପ୍ରବେଶଦ୍ୱାର ନିଲାକ୍କାଲ ନିକଟରେ ଲାଗିରହିଛି ଉଷ୍ମତା। ପୂର୍ବରୁ ନିଷିଦ୍ଧ ଘୋଷିତ ୧୦ରୁ ୫୦ ବର୍ଷ ବୟସର ଝିଅ କିମ୍ବା ମହିଳାମାନଙ୍କୁ ସେହି ରାସ୍ତାରେ ଯିବାପୂର୍ବରୁ ଅଟକାଯାଉଛି ଏବଂ ସେମାନେ ଯାଉଥିବା ଯାନବାହନଗୁନିକୁ ମଧ୍ୟ ଛଡ଼ାଯାଉନାହିଁ।
ସାବରୀମାଲା ମନ୍ଦିରର ଭଗବାନ ଆୟପ୍ପାଙ୍କ ଦର୍ଶନ ପାଇଁ ପୂର୍ବରୁ ମହିଳାଙ୍କୁ ବାରଣ ଥିଲେ ମଧ୍ୟ ସୁପ୍ରିମ୍କୋର୍ଟଙ୍କ ରାୟ ପରେ ମହିଳାଙ୍କ ମନ୍ଦିର ପ୍ରବେଶ ପାଇଁ ବାଟ ଫିଟିଯାଇଥିଲା। ଏପରିକି ଅନେକ ଆୟପ୍ପା ଶ୍ରଦ୍ଧାଳୁ ମହିଳା ଏହାକୁ ଶ୍ରଦ୍ଧାର ସହିତ ସ୍ୱାଗତ କରିଥିଲେ। କିନ୍ତୁ ବର୍ଷ ବର୍ଷର ପରମ୍ପରା ଭାଙ୍ଗିବାକୁ ଯାଉଥିବାରୁ ଏହାକୁ ବିଭିନ୍ନ ସ୍ତରରେ ବିରୋଧ କରାଯାଉଛି। ଏହି ବିରୋଧ ଆଜି ମନ୍ଦିର ନିକଟକୁ ବ୍ୟାପିଯିବା ସହିତ ଆୟପ୍ପାଙ୍କ ଭକ୍ତ, ବିଶେଷ କରି ବୟସ୍କା ମହିଳା କାର୍, ବସ୍ ଏବଂ ଟ୍ୟାକ୍ସି ଆଦି ତନ୍ନ ତନ୍ନ କରି ମହିଳା ଯାତ୍ରୀଙ୍କୁ ଖୋଜି ବୁଲୁଛନ୍ତି।
ଏହି ପ୍ରବେଶଦ୍ୱାରଠାରୁ ପାହାଡ଼ ଉପରେ ଥିବା ମନ୍ଦିର ଯିବାପାଇଁ ୨୦ କିଲୋମିଟର ଯିବାକୁ ହୁଏ। ତେବେ ଏହି ପ୍ରବେଶଦ୍ୱାର ନିକଟରେ ମହିଳା ଯାତ୍ରୀ ଥିବା ସବୁ ଗାଡ଼ିକୁ ଅଟକାଇବା ସହିତ ମହିଳା ଓ ଯୁବତୀମାନଙ୍କୁ ପରମ୍ପରା ନଭାଙ୍ଗିବାକୁ ଅନୁରୋଧ କରାଯାଉଛି। କିଛି କଲେଜ୍ ଛାତ୍ରୀ ଏବଂ ସ୍ଥାନୀୟ ଏକ ଚ୍ୟାନେଲର ମହିଳା ସାମ୍ବାଦିକଙ୍କୁ ମଧ୍ୟ ସେହି ରାସ୍ତାରେ ଆଗକୁ ଯିବାକୁ ଛଡ଼ାଯାଉନାହିଁ।
କନ୍ନୁରର ଜଣେ ୩୨ ବର୍ଷୀୟ ମହିଳାଙ୍କ କହିବା ଅନୁଯାୟୀ, ସେ ଏହି ତୀର୍ଥକ୍ଷେତ୍ର ଦର୍ଶନ ପାଇଁ ଯିବେ ବୋଲି ଘୋଷଣା କରିବା ପରେ ତାଙ୍କୁ ସୋଶାଲ ମିଡିଆରେ ଗାଳିଗୁଲଜ କରାଯାଇଛି। ମାସିକ ଋତୁସ୍ରାବଯୋଗ୍ୟା ମହିଳାମାନଙ୍କୁ ଅଶୁଦ୍ଧ ବିଚାର କରି ସେମାନଙ୍କୁ ମନ୍ଦିର ଭିତରକୁ ଛଡ଼ାଯାଉନାହିଁ। ଦକ୍ଷିଣପନ୍ଥୀ ଗୋଷ୍ଠୀଙ୍କ ଦ୍ୱାରା ବାରମ୍ବାର ଆନ୍ଦୋଳନ ହେବା ପରେ ଗତକାଲି କେରଳ ବିଜେପି ମୁଖ୍ୟ ପିଏସ୍ ଶ୍ରୀଧରନ୍ ପିଲାଇ ରାଜ୍ୟ ସରକାରଙ୍କୁ ସମାଲୋଚନା କରିବା ସହିତ କହିଥିଲେ ରାଜ୍ୟ ସରକାର ଆଗାମୀ ୨୪ ଘଣ୍ଟା ମଧ୍ୟରେ ଏହାର ସମାଧାନ କରି ସୁପ୍ରିମ୍କୋର୍ଟଙ୍କ ରାୟ ପାଳନ କରନ୍ତୁ। ଅନ୍ୟପକ୍ଷରେ ଶିବସେନାର ରାଜ୍ୟ ୟୁନିଟ୍ ଧମକାଇଛି ଯେ ଯଦି ମହିଳା ମନ୍ଦିର ପ୍ରବେଶ କରିବେ ତେବେ ଆୟାପ୍ପାଙ୍କ ନୈଷ୍ଠିକ ମହିଳା ଭକ୍ତମାନେ ଗଣଆତ୍ମହତ୍ୟା କରିବେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
