ନୂଆଦିଲ୍ଲୀ: ଋଷ ୟୁକ୍ରେନ ଯୁଦ୍ଧ ନେଇ ଚୀନ ରାଷ୍ଟ୍ରପତି ସି ଜିନପିଙ୍ଗ ଏବଂ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ମଧ୍ୟରେ ଆଲୋଚନା ହୋଇଛି । ଉଭୟ ନେତାଙ୍କ ମଧ୍ୟରେ ପ୍ରାୟ ଦେଢ ଘଣ୍ଟା ଧରି ଅଲୋଚନା ହୋଥିଲା । ଯୁଦ୍ଧ ଯୋଗୁଁ କାହାରି ହିତସାଧନ ହେବ ନାହିଁ ବୋଲି ଆଲୋଚନା ବେଳେ ଜିନ ପିଙ୍ଗ କହିଛନ୍ତି। ୟୁକ୍ରେନ ଯୁଦ୍ଧ ପରି ଏକ ସଂକଟକୁ କେହି ଚାହୁଁନଥିଲେ ସଙ୍କଟର ସମାଧାନ ପାଇଁ ଉଭୟ ଆମେରିକା ଓ ଚୀନ ମିଳିତଭାବେ ଦାୟିତ୍ୱ ର୍ନିବାହ କରିବା ଉଚିତ ବୋଲି ଜିନପିଙ୍ଗ କହିଥିବା ଚୀନ ସରକାରୀ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି । ଏହି ଆଲୋଚନା ପୂର୍ବରୁ ଆମେରିକାର ବିଦେଶ ସଚିବ ଆନ୍ଥୋନି ବ୍ଲିନକେନ କହିଥିଲେ ଯେ ଚୀନ ସିଧାସଳଖ ରୁଷକୁ ସହାୟତା କରିବାକୁ ବିଚାର କରୁଥିବା ଜଣାପଡ଼ିଛି । ଚୀନ ଯଦି ରୁଷକୁ କୌଣସି ପ୍ରକାରେ ସହାୟତା କରେ ତେବେ ସେଥିପାଇଁ ବେଜିଂକୁ ତାହାର ମୂଲ୍ୟ ଦେବାକୁ ପଡ଼ିବ ବୋଲି ସେ କହିଥିଲେ।
ସେପଟେ ଯୁଦ୍ଧର ୨୪ ଦିନ ପରେ ୟୁକ୍ରେନ ରାଜଧାନୀ କିଭ୍ ଠୁ ଖାର୍କିଭ୍, ଲିଭିବ୍ ଓ ମାରିୟୁପୋଲ, ସବୁ ସହର ଉପରେ ଘନ ଘନ ଆକ୍ରମଣ ଚଳାଇଛି ଋଷ। ୟୁକ୍ରେନର ଦକ୍ଷିଣ ପୂର୍ବରେ ଥିବା ପ୍ରମୁଖ ବନ୍ଦର ନଗରୀ ମାରିୟୁପୋଲରେ ଦିନକୁ ପଡ଼ୁଛି ୫୦ରୁ ୧୦୦ ବୋମା । ସହରର ୮୦ ପ୍ରତିଶତ ବାସଗୃହ କ୍ଷତିଗ୍ରସ୍ତ ହୋଇଛି । ରୁଷୀୟ ଆକ୍ରମଣ ପରେ ଧ୍ୱଂସସ୍ତୁପରେ ପରିଣତ ହୋଇଥିବା ଡ୍ରାମା ଥିଏଟର୍ ବିଲ୍ଡିଂରେ ଏବେବି ଉଦ୍ଧାରକାର୍ଯ୍ୟ ଜାରି ରହିଛି ।
ଥିଏଟର୍ ବିଲ୍ଡିଂରେ ଆଶ୍ରୟ ନେଇଥିବା ହଜାରେରୁ ଅଧିକ ଲୋକଙ୍କୁ ଭିତରୁ କେତେ ମୃତାହତ ହୋଇଛନ୍ତି, ଏଯାଏଁ ସ୍ପଷ୍ଟ ହୋଇନି। ଗତକାଲି ସକାଳୁ ରୁଷୀୟ ରୋଷର ଶିକାର ହୋଇଛି ପଶ୍ଚିମ ୟୁକ୍ରେନୀୟ ସହର ଲିଭିବ୍ । ସେଠାକାର ବିମାନବନ୍ଦ ଉପରେ ମିଜାଇଲ୍ ମାଡ଼ ହେବା ଫଳରେ ପ୍ରମୁଖ ଟର୍ମିନାଲ କ୍ଷତିଗ୍ରସ୍ତ ହୋଇଛି । ପାଖରେ ଥିବା ଏକ ବିମାନ ମରାମତି କାରଖାନାରେ ମଧ୍ୟ ଲଗାତାର ୩ଟି ବଡ଼ ବିସ୍ଫୋରଣ ହୋଇଥିବା କୁହାଯାଉଛି । ରୁଷ ବ୍ଲାକ୍ ସିରୁ ଲିଭିବକୁ ୬ଟି ମିଜାଇଲ୍ ଛାଡ଼ିଥିବା ବେଳେ, ସେଥିରୁ ୨ଟିକୁ ଆକାଶମାର୍ଗରେ ନଷ୍ଟ କରିଦେଇଥିବା ଦାବି କରିଛି ୟୁକ୍ରେନ୍ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
