ମସ୍କୋ: ତାଲିବାନ ହାତକୁ ଚାଲିଯାଇଛି ଆଫଗାନିସ୍ତାନ। ତାଲିବାନୀ ଶାସନକୁ ନେଇ ପୁରା ଭୟଭୀତ ହୋଇପଡିଛନ୍ତି ଆଫଗାନବାସୀ। ସେପଟେ ଆମେରିକା ସୈନ୍ୟମାନେ ମଧ୍ୟ ସେଠାରୁ ଫେରି ଆସିଛନ୍ତି। ଆଫଗାନିସ୍ତାନାରେ ଯୁକ୍ତ ରାଷ୍ଟ୍ର ଆମେରିକାର ସମ୍ପୃକ୍ତିକୁ ନେଇ ଏବେ ରୁଷ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ତୀବ୍ରା ସମାଲୋଚନା କରିଛନ୍ତି।
ସେ କହିଛନ୍ତି, ଆଫଗାନିସ୍ତାନରେ ଆମେରିକା ଦୀର୍ଘ ୨୦ ବର୍ଷ ଧରି ସୈନ୍ୟ ମୁତୟନ କରି ସେଠାରୁ 'ଶୂନ୍' ପାଇଛି। ବ୍ୟାପକ କ୍ଷେତ୍ରରେ ଆମେରିକୀୟ ରୀତିନୀତି ଓ ଜୀବନଯାପନର ମାନ ପ୍ରବର୍ତ୍ତନ ଲାଗି ୨୦ ବର୍ଷ ଧରି ଆମେରିକାର ସାମରିକ ବାହିନୀ ସେଠାରେ ବସବାସ କରୁଥିବା ଜନତାଙ୍କୁ ‘ସଭ୍ୟ’ କରାଇବା ପାଇଁ ଉଦ୍ୟମ କରୁଥିଲା। କିନ୍ତୁ ଏଥିରୁ ଏବେ ଆମେରିକାକୁ କ୍ଷତି ହୋଇଛି। ସବୁଠୁ ଅଧିକ କ୍ଷତି ଆଫଗାନବାସୀଙ୍କ ପାଇଁ ହୋଇଛି। ନକରାତ୍ମକ ନହେଲେ ବି ସେଠାରେ ଫଳାଫଳ 'ଶୂନ' ମିଳିଛି।'
ସେ ଆହୁରି କହିଛନ୍ତି, ଜୋର ଜବରଦସ୍ତ କୌଣସି ଜିନିଷ ପ୍ରଚଳନ କରାଇବା ଅସମ୍ଭବ। ଯଦି କିଏ କାହା ପାଇଁ କିଛି କରିବାକୁ ଚାହୁଛନ୍ତି, ତେବେ ସେହି ଲୋକଙ୍କୁ ଇତିହାସ, ସଂସ୍କୃତି ଓ ଜୀବନ ଦର୍ଶନ ଉପରେ ବ୍ୟାପକ ଦୃଷ୍ଟି ଦେବାକୁ ପଡିବ। ସେମାନଙ୍କ ପରମ୍ପରା ଏବଂ ପ୍ରଥାକୁ ସମ୍ମାନ ଦେବାକୁ ପଡିବ ବୋଲି ପୁଟିନ କହିଛନ୍ତି।
ଉଲ୍ଲେଖଯୋଗ୍ୟ ଯେ, ରୁଷ ମଧ୍ୟ ୧୦ ବର୍ଷ ପର୍ଯ୍ୟନ୍ତ ଆଫଗାନିସ୍ତାନରେ ଯୁଦ୍ଧ କରିଥିଲା। ୧୯୮୯ରେ ସୋଭିଏତ ସେନା ସେଠାରୁ ଫେରି ଆସିବା ପରେ ଯୁଦ୍ଧର ଅବସାନ ଘଟିଥିଲା। ତେବେ ଗତ କିଛି ବର୍ଷ ହେଲା ପୁଣି ରୁଷ ଆଫଗାନିସ୍ତାନକୁ ପ୍ରତ୍ୟାବର୍ତ୍ତନ କରିଥିଲା। ରୁଷ୍ ତାଲିବାନ୍ ସମେତ ଅନ୍ୟାନ୍ୟ ଆଫଗାନ ଦଳଙ୍କ ସହ ଆଲୋଚନା କରିବାକୁ ଅଗ୍ରସର ହୋଇଥିଲା।
ସୂଚନା ମୁତାବକ, ଆଫଗାନିସ୍ତାନରୁ ସୋମବାର ସମ୍ପୂର୍ଣ୍ଣ ରୂପେ ଆମେରିକା ସେନା ପ୍ରତ୍ୟାବର୍ତ୍ତନ କରିଛନ୍ତି। ଏହାପରେ ସେଠାରେ ସ୍ଥିତି ଆହୁରି ଭୟଙ୍କର ହୋଇଛି। ବୁଧବାର ଆଫଗାନିସ୍ତାନର ସୀମାରେ ଲୋକଙ୍କ ଲମ୍ବା ଲାଇନ ଲାଗିଥିବା ଦେଖିବାକୁ ମିଳିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
