ଗଣତନ୍ତ୍ର ଦିବସ ଅବ୍ୟବହିତ ପୂର୍ବରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦେଶବାସୀଙ୍କୁ ସମ୍ବୋଧନ କରିଛନ୍ତି । ଜାତି ଉଦ୍ଦେଶ୍ୟରେ ବାର୍ତ୍ତା ଦେଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ସେ କହିଛନ୍ତି ଯେ, ଭାରତକୁ ଲୋକତନ୍ତ୍ରର ଜନନୀ ବୋଲି କୁହାଯାଏ। ବିବିଧତା ଭରା ଜନସମୁଦାୟ ଲୋକତନ୍ତ୍ରରେ ଯୋଡ଼ି ହୋଇଛି। ବିବିଧ ଭାଷା ଆମକୁ ଅଲଗା ନୁହେଁ, ଏକାଠି କରି ରଖିଛି। ଏହା ଆମ ଲୋକତନ୍ତ୍ରର ସ୍ୱତନ୍ତ୍ରତା। ଆମ ସମ୍ବିଧାନ ମାନବତାବାଦୀ ଦର୍ଶନ ସହ ଆଧୁନିକତାର ସମ୍ମିଶ୍ରଣ। ଭାରତ ଏବେ ବିଶ୍ୱରେ ଏକ ଆତ୍ମବିଶ୍ୱାସଭରା ରାଷ୍ଟ୍ରରେ ପରିଣତ ହୋଇଛି। ଗାନ୍ଧିଙ୍କ ସ୍ୱପ୍ନ ସମସ୍ତଙ୍କୁ ଉତ୍ଥାନ କରାଯିବା ଏବେ ବି ବାକି ଅଛି।
ଭାରତ ଏବେ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି ହୋଇପାରିଛି। ମହାମାରୀ ସାରା ବିଶ୍ୱର ଅର୍ଥନୀତିକୁ ପ୍ରଭାବିତ କରିଛି। କିନ୍ତୁ ସକ୍ଷମ ନେତୃତ୍ୱ ଯୋଗୁଁ ଆମେ ସଂକଟରୁ ଉଦ୍ଧାର ହୋଇପାରିଛୁ। ଆତ୍ମନିର୍ଭର ଭାରତ ଅଭିଯାନ ପ୍ରତି ଲୋକଙ୍କ ବିଶେଷ ଉତ୍ସାହ ରହିଛି। ସବୁ ନାଗରିକ ବ୍ୟକ୍ତିଗତ ଓ ସାମୁହିକ ଭାବେ ଉତ୍ଥାନ କରିବା ଆମ ଲକ୍ଷ୍ୟ। ରାଷ୍ଟ୍ରୀୟ ଶିକ୍ଷାନୀତି ଆର୍ଥିକ ଓ ସାମାଜିକ ସଶକ୍ତୀକରଣ କରିବ। ରାଷ୍ଟ୍ରପତି ମୁର୍ମୁ ଦେଶର ନୂତନ ଜାତୀୟ ଶିକ୍ଷାନୀତିକୁ ପ୍ରସଂଶା କରିଛନ୍ତି । ସେ କହିଛନ୍ତି ଯେ ଜାତୀୟ ଶିକ୍ଷା ନୀତି ଏକବିଂଶ ଶତାବ୍ଦୀର ଆହ୍ୱାନ ପାଇଁ ଶିକ୍ଷାର୍ଥୀମାନଙ୍କୁ ପ୍ରସ୍ତୁତ କରିବ ।
ସେ କହିଛନ୍ତି ଯେ ଆମେ ସମସ୍ତେ ସମାନ ଏବଂ ଆମେ ସମସ୍ତେ ଭାରତୀୟ । ଏତେ ଧର୍ମ ଏବଂ ଅନେକ ଭାଷା ଆମକୁ ବିଭାଜିତ କରିନାହାଁନ୍ତି ବରଂ ଆମକୁ ଏକାଠି କରିଛନ୍ତି । ତେଣୁ ଆମେ ଏକ ଗଣତାନ୍ତ୍ରିକ ଦେଶ ଭାବରେ ସଫଳ ହୋଇଛୁ । ରାଷ୍ଟ୍ରପତି ମୁର୍ମୁ କହିଛନ୍ତି ଯେ ଭାରତ ଏକ ଗରିବ ଏବଂ ନିରକ୍ଷର ରାଷ୍ଟ୍ରରୁ ବିଶ୍ୱ ମଞ୍ଚରେ ଏକ ଆତ୍ମବିଶ୍ୱାସୀ ରାଷ୍ଟ୍ରକୁ ଉନ୍ନୀତ ହୋଇଛି । ସମ୍ବିଧାନ ନିର୍ମାତାମାନଙ୍କ ସାମୂହିକ ଜ୍ଞାନ ଦ୍ୱାରା ଦିଆଯାଇଥିବା ମାର୍ଗଦର୍ଶନ ବିନା ଏହି ପ୍ରଗତି ସମ୍ଭବ ହୋଇନଥାନ୍ତା ।