ଇରାନ ଜବତ କରିଥିବା ଇସ୍ରାଏଲ ଜାହାଜରେ ୧୭ ଭାରତୀୟ

ଇସ୍ରାଏଲ ଓ ଇରାନ ମଧ୍ୟରେ ଆରମ୍ଭ ହୋଇଥିବା ବିବାଦରେ ଫସିଛନ୍ତି ୧୭ ଭାରତୀୟ। ଆଜି ୟୁଏଇ ଉପକୂଳରୁ ଇରାନ ନୌସେନା ଇସ୍ରାଏଲ ସହ ଜଡ଼ିତ ଗୋଟିଏ ପଣ୍ୟବାହୀ ଜାହାଜକୁ ଜବତ କରିଛନ୍ତି।

ଏହାକୁ ସେମାନେ ନିଜ ଅଧୀନରେ ଥିବା ଜଳ ସୀମାକୁ ନେଇ ଯାଇଛନ୍ତି। ଏହି ଜାହାଜରେ ମୋଟ ୨୫ ଜଣ କ୍ରୁ ସଦସ୍ୟ ରହିଥିଲେ। ସେମାନଙ୍କ ମଧ୍ୟରୁ ୧୭ ଜଣ ଭାରତୀୟ ବୋଲି ଜଣାପଡ଼ିଛି।

କଣ୍ଟେନର ଶିପ MCS Ariesକୁ ଇରାନ ସେନା ହେଲିକପ୍ଟର ଅପରେସନ ମାଧ୍ୟମରେ Strait of Hormuzରେ ସିଜ କରିଥିଲା ବୋଲି ତେହରାନ ଗଣମାଧ୍ୟମ କହିଛି।

ଭାରତର ଗୋଟିଏ ସୂତ୍ରରେ କୁହାଯାଇଛି ଯେ “ଆମେ ଗୋଟିଏ କାର୍ଗୋ ଶିପ୍‌ 'MSC Aries'କୁ ଇରାନ ନିଜ ଅଧୀନକୁ ନେଇଥିବା ଖବର ପାଇଛୁ। ଆମେ ଜାଣିବାକୁ ପାଇଛୁ ଯେ ଉକ୍ତ ଜାହାଜରେ ୧୭ ଜଣ ଭାରତୀୟ ରହିଥିଲେ। ଦୂତବାସ ଚ୍ୟାନେଲ ଦ୍ୱାରା ଆମେ ଇରାନ ଅଧିକାରୀଙ୍କ ଯୋଗାଯୋଗ କରିଛୁ। ଉଭୟ ତେହରାନ ଓ ନୂଆଦିଲ୍ଲୀ ଭାରତୀୟଙ୍କ ସୁରକ୍ଷା ଏବଂ କଲ୍ୟାଣକୁ ନିଶ୍ଚିତ କରିବା ଦିଗରେ ପ୍ରତିଶ୍ରୁତିବଦ୍ଧ।

ଇଟାଲିଆନ-ସ୍ୱିସ ଗ୍ରୁପ ଏମଏସ୍‌ସି ଜାହାଜ ଜବତ ଘଟଣାକୁ ନିଶ୍ଚିତ କରିଛି। ଏବେ ଜାହାଜରେ ଇରାନର ଯବାନମାନେ ରହିଛନ୍ତି। ଜାହାଜରେ ୨୫ ଜଣ ସଦସ୍ୟ ରହିଥିଲେ। ସମସ୍ତଙ୍କର ସୁରକ୍ଷା ପାଇଁ ଇରାନ ଅଧିକାରୀଙ୍କ ସହ ମିଶି କାମ କରାଯାଉଥିବା ସଂସ୍ଥା କହିଛି। 

ଇରାନ ଯେକୌଣସି ମୁହୂର୍ତ୍ତରେ ଇସ୍ରାଏଲ ଉପରେ ହମଲା କରିବ ବୋଲି ରିପୋର୍ଟକୁ ନେଇ ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ସୃଷ୍ଟି ହୋଇଛି। ଏତିକି ବେଳେ ହିଁ ଜାହାଜ ଜବତ ହେବା ଘଟଣା ସାମ୍ନାକୁ ଆସିଛି।

ଇରାନ ଜାହାଜ ଜବତ କରିବା ପରେ ଇସ୍ରାଏଲ ପକ୍ଷରୁ ତେହରାନକୁ ଖୋଲା ଧମକ ମିଳିଛି। ଜାହାଜ ଜବତ କରିବାର ପରିଣାମ ଇରାନକୁ ଭୋଗିବାକୁ ପଡ଼ିବ ବୋଲି ଇସ୍ରାଏଲ କହିଛି।