କୋଲକାତାର କୁମାରତୁଳିରେ ଥିବା ଗଙ୍ଗା ଘାଟରେ ସବୁ ଦିନ ଭଳି ଆଜି ମଧ୍ୟ ସ୍ଥାନୀୟ ଅଞ୍ଚଳର ଲୋକ କିଛି ଲୋକ ଯୋଗ କରିବାକୁ ଏକାଠି ହୋଇଥିଲେ। ସେମାନଙ୍କ ପାଇଁ ଆଜିର ସକାଳ ସବୁଦିନ ଭଳି ଥିଲା। କିନ୍ତୁ ଗଙ୍ଗା କୂଳରେ ଆଜି ଘଟିଥିବା ଅପ୍ରତ୍ୟାଶିତ ଘଟଣା ସମସ୍ତଙ୍କୁ ଚକିତ କରି ଦେଇଛି। କୁମାରତୁଳି ହେଉଛି ସ୍ଥପତିଙ୍କ ପେଣ୍ଠସ୍ଥଳ। ଏହି ସ୍ଥପତିମାନେ ଦୁର୍ଗା ପୂଜା ସମୟରେ ଚଳଚଞ୍ଚଳ ହୋଇ ଉଠନ୍ତି। ବର୍ଷର ବାକି ସମୟ ଏଠାରେ ଅସମ୍ଭାଳ ନୀରବତା ଦେଖିବାକୁ ମିଳିଥାଏ।
କିନ୍ତୁ ଆଜି ସକାଳ ୭.୩୦ରେ ଏଠାକାର ଲୋକମାନେ ଦେଖିବାକୁ ପାଇଥିଲେ ଯେ ଗୋଟିଏ ଧଳା ଓ ନୀଳ ରଙ୍ଗର କାରରୁ ଓହ୍ଲାଇଥିଲେ ଦୁଇ ଜଣ ମହିଳା। ସେମାନଙ୍କ ହାତରେ ଥିଲା ବାଇଗଣୀ ରଙ୍ଗର ଗୋଟିଏ ଟ୍ରଲି ବ୍ୟାଗ। ସେମାନେ ଏହାକୁ ଭିଡ଼ଭିଡ଼ି ଗଙ୍ଗା ନଦୀ କୂଳକୁ ନେବାକୁ ଚେଷ୍ଟା କରୁଥିଲେ। ହେଲେ ଦୁଇ ମହିଳା ସବୁ ପ୍ରକାରର ଉଦ୍ୟମ କରିଥିଲେ ହେଁ ଏହାକୁ ଭିଡ଼ି ଆଗକୁ ନେଇ ପାରି ନଥିଲେ।
ସେମାନଙ୍କ ହାବଭାବ ଦେଖି ଯୋଗ କରିବାକୁ ଆସିଥିବା କିଛି ଲୋକ ଦୁଇ ମହିଳାଙ୍କ ପାଖକୁ ଆସିଥିଲେ ଓ ସେମାନଙ୍କୁ ପ୍ରଶ୍ନ କରିଥିଲେ। ଦୁଇ ମହିଳା ବେଧଡ଼କ ଅନ୍ଦାଜରେ କଥା କହିବା ସହ କାହାକୁ ବି ଟ୍ରଲି ବ୍ୟାଗ ଛୁଇଁବାକୁ ଦେଇ ନଥିଲେ। ସେମାନଙ୍କ କଥାବାର୍ତ୍ତା ଲୋକଙ୍କ ମନରେ ସନ୍ଦେହ ସୃଷ୍ଟି କରିଥିଲା। ଏହାପରେ ସେମାନେ ପୁଲିସ୍କୁ ଖବର ଦେଇଥିଲେ।
Also Read
ପୁଲିସ୍ ଆସିବା ପରେ ସାମ୍ନାକୁ ଆସିଥିବା ଦୃଶ୍ୟ ସମସ୍ତଙ୍କୁ ଚକିତ କରି ଦେଇଥିଲା। ଟ୍ରଲି ବ୍ୟାଗ ଭିତରେ ଥିଲା ଜଣେ ମହିଳାଙ୍କ ରକ୍ତାକ୍ତ ମୃତଦେହ। ଯାହାକୁ ଦେଖି ସମସ୍ତେ ସ୍ତବ୍ଧ ହୋଇଯାଇଥିଲେ। ଯୋଗ କ୍ୟାମ୍ପ ଚଳାଉଥିବା ରାଜୁ ସାହୁ କହିଛନ୍ତି, “ସେମାନେ ଟ୍ରଲି ବ୍ୟାଗ ଖୋଲିବାକୁ ମନା କରିଥିଲେ। ବ୍ୟାଗରେ ସେମାନଙ୍କ କୁକୁରର ମୃତଦେହ ରହିଥିବା କହିଥିଲେ। ଆମେ କିନ୍ତୁ ଏହାକୁ ବିଶ୍ୱାସ କରି ନଥିଲୁ। ଗୋଟିଏ ଲାବ୍ରାଡୋର କୁକୁରର ଓଜନ କେତେ ହେବ? ୩୦ରୁ ୪୦ କେଜି? ସେମାନେ ଦୁଇ ଜଣ କେମିତି ବ୍ୟାଗକୁ ଉଠାଇ ପାରୁ ନାହାନ୍ତି? ସେହିପରି ଏହା ଟ୍ରଲି ହୋଇଥିବାରୁ ଆଗକୁ ନେବା ସହଜ। ତଥାପି ସେମାନେ ଟେକି ପାରୁ ନଥିବାରୁ ସନ୍ଦେହ ହୋଇଥିଲା?
ଏସବୁ ଭିତରେ ୩୦ ମିନିଟ ବିତି ଯାଇଥିଲା। ୫୦ରୁ ଅଧିକ ଲୋକ ଗଙ୍ଗା କୂଳରେ ପହଞ୍ଚି ଯାଇଥିଲେ। ସମସ୍ତେ ପାଟିତୁଣ୍ଡ କରିବାରୁ ଜଣେ ମହିଳା କହିଥିଲେ ଯେ ସୁଟକେସ୍ରେ ଝିଅର ନଣନ୍ଦଙ୍କର ମୃତଦେହ ରହିଛି। ସେ ଆତ୍ମହତ୍ୟା କରିଛନ୍ତି। କିନ୍ତୁ ଏହା ଯଦି ପ୍ରକୃତ ଘଟଣା, ତା’ହେଲେ ସେମାନେ ପୁଲିସ୍ କିମ୍ବା ଡାକ୍ତରଙ୍କ ପାଖକୁ ନ ଯାଇ ମୃତଦେହକୁ ଏମିତି କେମିତି ଫିଙ୍ଗି ଦେବାକୁ ଆଣିଛନ୍ତି ବୋଲି ଜଣେ ପ୍ରଶ୍ନ କରିଥିଲେ। ମହିଳା ଜଣଙ୍କ ମୃତଦେହ ଥିବା କଥା କହିବାରୁ ପୁଲିସ୍ ଟିମ ବି ପହଞ୍ଚି ଯାଇଥିଲା।
ପୁଲିସ୍ ଟ୍ରଲି ବ୍ୟାଗରୁ ମୃତଦେହକୁ ଜବତ କରି ଦୁଇ ମହିଳାଙ୍କୁ ଘଟଣା ସ୍ଥଳରୁ ଗିରଫ କରିଛି। ଗିରଫ ଦୁଇ ମହିଳା ହେଲେ ଫାଲଗୁନି ଘୋଷ ଓ ତାଙ୍କ ମା’ ଆରତୀ ଘୋଷ। ମୃତ ମହିଳା ଜଣଙ୍କ ହେଲେ ସୁମିତା ଘୋଷା। ସେ ହେଉଛନ୍ତି ଫାଲଗୁନିଙ୍କ ପିଉସୀ ଶାଶୁ। ସ୍ଥାନୀୟ ଲୋକ କହିଛନ୍ତି ଯେ ସେମାନେ ଗୋଟିଏ ଟ୍ରେନ ଟିକେଟ ଦୁଇ ମହିଳାଙ୍କ ପାଖରୁ ପାଇଛନ୍ତି। ପ୍ରଥମେ କୁହାଯାଉଥିଲା ଯେ ସେମାନେ କାଜିପଡ଼ାରୁ କୁମାରତୁଳିକୁ ଟ୍ରେନରେ ଆସିଛନ୍ତି।
କିନ୍ତୁ ପୁଲିସ୍ କୋଲକାତାର ମଧ୍ୟମଗ୍ରାମରୁ ଗୋଟିଏ ସିସିଟିଭି ଫୁଟେଜ ଠାବ କରିଛି। ଏଥିରେ ଦେଖିବାକୁ ମିଳିଛି ଯେ ଦୁଇ ମହିଳା ଗୋଟିଏ ଠେଲା ଗାଡ଼ିରେ ଟ୍ରଲି ବ୍ୟାଗକୁ ନିକଟସ୍ଥ ଟ୍ୟାକ୍ସି ଷ୍ଟାଣ୍ଡଙ୍କୁ ଆଣୁଛନ୍ତି। ସେଠାରେ ସେମାନେ କ୍ୟାବ ଧରି ସିଧା କୁମାରତୁଲି ଆସିଥିଲେ। ଫାଲଗୁନିଙ୍କ ବୟାନ ଅନୁସାରେ ମୃତ ସୁମିତା ହେଉଛନ୍ତି ତାଙ୍କ ଶ୍ୱଶୁରଙ୍କ ଭଉଣୀ। ତାଙ୍କ ଘର ଆସାମ ଜୋରହାଟରେ। ସେ ତାଙ୍କ ସ୍ୱାମୀଙ୍କ ଠାରୁ ଅଲଗା ହୋଇ ଯାଇଛନ୍ତି। ଫେବୃଆରୀ ୧୧ରୁ ସୁମିତା କୋଲକାତାର ମଧ୍ୟମଗ୍ରାମରେ ୨ ବର୍ଷ ହେଲା ଭଡ଼ାରେ ରହୁଥିବା ଫାଲଗୁନି ଓ ମା’ ଆରତୀଙ୍କ ପାଖରେ ରହିବା ଆରମ୍ଭ କରିଥିଲେ।
ଫାଲଗୁନିଙ୍କର ତାଙ୍କ ସ୍ୱାମୀଙ୍କ ସହ ପଡ଼େ ନାହିଁ। ତେଣୁ ସେ ମଧ୍ୟ ଅଲଗା ହୋଇ ମା’ ଆରତୀଙ୍କ ସହ ରହୁଥିଲେ। ୩ ଜଣ ଗୋଟିଏ ସ୍ଥାନରେ ରହୁଥିବା ବେଳେ ସୋମବାର ଅପରାହ୍ନ ୪ଟା ବେଳେ ପ୍ରବଳ ପାଟିତୁଣ୍ଡ ହୋଇଥିଲା। ଫାଲଗୁନି ଏତିକି ବେଳେ ସୁମିତାଙ୍କୁ ଧକ୍କା ମାରିଥିଲେ। ତାଙ୍କ ମୁଣ୍ଡ କାନ୍ଥରେ ମାଡ଼ ହୋଇ ଯିବାରୁ ସେ ଅଚେତ ହୋଇ ଯାଇଥିଲେ। କିଛି ଘଣ୍ଟା ପରେ ତାଙ୍କ ଚେତା ଆସିବା କ୍ଷଣି ପୁଣି ପାଟିତୁଣ୍ଡ ଆରମ୍ଭ ହୋଇଥିଲା। ଏଥର ଫାଲଗୁନି ଗୋଟିଏ ଇଟାରେ ସୁମିତାଙ୍କ ମୁଣ୍ଡ ଓ ବେକକୁ ପିଟି ଦେଇଥିଲେ। ଏଥିଯୋଗୁ ତାଙ୍କର ମୃତ୍ୟୁ ହୋଇଯାଇଥିଲା।
ଏହାପରେ ମା’ ଝିଅ ମିଳିତ ଭାବେ ସୁମିତାଙ୍କ ମୃତଦେହକୁ ଟ୍ରଲି ବ୍ୟାଗରେ ଭର୍ତ୍ତି କରିଥିଲେ ଓ ଏହାକୁ ଗଙ୍ଗା ନଦୀରେ ଫିଙ୍ଗିବାକୁ ନେଇ ଯାଇଥିଲେ। କିନ୍ତୁ ସବୁ କିଛିର ପର୍ଦ୍ଦାଫାସ ହୋଇ ଯାଇଛି। ଉତ୍ତର ପୋର୍ଟ ପୁଲିସ ଷ୍ଟେସନରେ ଏନେଇ ଗୋଟିଏ ମାମଲା ହେବା ସହ ଅଧିକ ତଦନ୍ତ ଆରମ୍ଭ ହୋଇଛି।
ସ୍ଥାନୀୟ ସୂତ୍ର ଅନୁସାରେ, ଫାଲଗୁନିଙ୍କ ଘରକୁ ରାତି ସମୟରେ ପ୍ରାୟ ଅଜଣା ଲୋକମାନେ ଆସନ୍ତି। କିନ୍ତୁ ଏ ସମ୍ପର୍କରେ କାହା ପାଖରେ ବିସ୍ତୃତ ସୂଚନା ନାହିଁ। କାରଣ ସେମାନେ ସବୁବେଳେ ଅନ୍ୟମାନଙ୍କ ଠାରୁ ଦୂରେଇ ରହୁଥିଲେ। କିଛି ଦିନ ତଳେ ଜଣେ ମହିଳା ରାତି ସମୟରେ ଉକ୍ତ ଘରକୁ ଆସିବାର ଦେଖିବାକୁ ମିଳିଥିଲା। ତେଣୁ ସେ ସୁମିତା ହୋଇ ପାରନ୍ତି ବୋଲି କୁହାଯାଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
