ଟ୍ରାକ୍ଟରରେ ମନ୍ଦିର ଯାଉଥିଲେ ପରିବାର ସଦସ୍ୟ; ଓଲଟିବାରୁ ଚାଲିଗଲା ୪ ଜୀବନ

ନିଜ ପିଲାର ମୁଣ୍ଡନ ନିମନ୍ତେ ହସଖୁସିରେ ମନ୍ଦିରକୁ ଯାଉଥିଲେ ପରିବାର ସଦସ୍ୟ ଓ ବନ୍ଧୁବାନ୍ଧବ । ସେମାନେ ଏକ ଟ୍ରାକ୍ଟର ଡାଲାରେ ବସି ଯାଉଥିଲେ ମନ୍ଦିର । ମାତ୍ର ମନ୍ଦିରରେ ପହଞ୍ଚିବା ପୂର୍ବରୁ ଘଟିଗଲା ଅଘଟଣ। ଅଧାରେ ରହିଗଲା ମୁଣ୍ଡନ କାର୍ଯ୍ୟକ୍ରମ । ଭାରସାମ୍ୟ ହରାଇ ଟ୍ରାକ୍ଟରଟି ଓଲଟି ପଡ଼ିବାରୁ ଘଟଣା ସ୍ଥଳରେ ୪ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୨ ନାବାଳକ ଓ ୨ ମହିଳା ଅଛନ୍ତି। ଏପରି ଏକ ଦୁଃଖଦ ଘଟଣା ମଧ୍ୟପ୍ରଦେଶର ଶୟୋପୁରରେ ଘଟିଛି।

ଶୟୋପୁରର ଖିରଖଇରା ଗାଁର ଭୁର ସିଂ ମାଲିଙ୍କ ପୁଅର ମୁଣ୍ଡନ ଶ୍ୟାମପୁରସ୍ଥିତ ଟୋଡି ମନ୍ଦିରରେ କରାଯିବାକୁ ନିଷ୍ପତ୍ତି ନିଆଯାଇଥିଲା। ବୁଧବାର ପରିବାର ସଦସ୍ୟ ଓ ବନ୍ଧୁବାନ୍ଧବ ୨ଟି ଟ୍ରାକ୍ଟରରେ ମନ୍ଦିର ଅଭିମୁଖେ ବାହାରିଥିଲେ। ମାତ୍ର ଚମ୍ବଲ ନହର ରୋଡ ଅତିକ୍ରମ କରୁଥିବା ବେଳେ ଏକ ଟ୍ରାକ୍ଟର ହଠାତ୍‌ ଭାରସାମ୍ୟ ହରାଇ ଓଲଟି ପଡ଼ିଥିଲା।

ଖବର ପାଇ ତୁରନ୍ତ ଆମ୍ବୁଲାନ୍ସ ପହଞ୍ଚିଥିବା ବେଳେ ଟ୍ରାକ୍ଟର ତଳୁ ୪ ମୃତଦେହ ଉଦ୍ଧାର ହୋଇଥିଲା। ସେମାନଙ୍କ ମଧ୍ୟରେ ଦୁଇ ମହିଳା ଓ ଦୁଇ ଶିଶୁ ଅଛନ୍ତି। ଏଥିସହ ଟ୍ରାକ୍ଟରରେ ଥିବା ୭ ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ନିକଟସ୍ଥ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସେଠାରେ ସେମାନଙ୍କ ଚିକିତ୍ସା ଚାଲିଛି।

ପୁଲିସ୍‌ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି। ଏଥିସହ ବରିଷ୍ଠ ପ୍ରଶାସନିକ ଅଧିକାରୀ ହସ୍ପିଟାଲରେ ପହଞ୍ଚି ଆହତଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଛନ୍ତି।