ଦେଢ ବର୍ଷର ଶିଶୁକୁ ଦୁଷ୍କର୍ମ କରି ଫେରାର ଥିଲା ଅଭିଯୁକ୍ତ, ପୁଲିସ୍‌ କଲା ଏନକାଉଣ୍ଟର

ଦେଢ ବର୍ଷର ଶିଶୁ କନ୍ୟାକୁ ଦୁଷ୍କର୍ମ କରି ଫେରାର ହୋଇ ଯାଇଥିବା ଅଭିଯୁକ୍ତ ବିରୋଧରେ ପୁଲିସ୍‌ ଗ୍ରହଣ କରିଛି କଡ଼ା କାର୍ଯ୍ୟାନୁଷ୍ଠାନ । ଅଭିଯୁକ୍ତକୁ ଟ୍ରାପ୍‌ କରି ଜଙ୍ଗଲରେ ପଶି ପୁଲିସ୍ ତାକୁ ଏନକାଉଣ୍ଟର କରିଛି। ଅଭିଯୁକ୍ତର ଗୋଡ଼ରେ ଗୁଳି ବାଜିଥିବା ବେଳେ ପୁଲିସ୍‌ ତାକୁ ଗିରଫ କରି ମେଡିକାଲରେ ଭର୍ତ୍ତି କରିଛି।

ଏପରି ଏକ ଘଟଣା ଉତ୍ତରପ୍ରଦେଶର ନୋଏଡାରେ ଘଟିଛି। ଗିରଫ ଅଭିଯୁକ୍ତଜଣକ ହେଲେ ୨୦ ବର୍ଷୀୟ ଉଦୟବୀର। ଉଦୟବୀର ଜଣେ ଦେଢ ବର୍ଷର ଶିଶୁକୁ ଦୁଷ୍କର୍ମ କରି ଫେରାର ହୋଇ ଯାଇଥିଲେ। ପୀଡ଼ିତଙ୍କ ପରିବାରବର୍ଗଙ୍କ ଅଭିଯୋଗ କ୍ରମେ ପୁଲିସ୍‌ ମାମଲା ରୁଜୁ କରି ଅଭିଯୁକ୍ତକୁ ଖୋଜିବାକୁ ଆରମ୍ଭ କଲା। ଏଥିନିମନ୍ତେ ବହୁ ଟିମ୍‌ ଗଠିତ ହୋଇଥିବା ବେଳେ ଉଦୟବୀର ଜଙ୍ଗଲରେ ଥିବା ଟ୍ରାକିଂରୁ ଜଣାପଡ଼ିଥିଲା।

ଏହାପରେ ପୁଲିସ୍‌ ପକ୍ଷରୁ ଯୋଜନା କରାଯାଇ ଜଙ୍ଗଲରେ କମ୍ବିଂ ଅପରେସନ ଆରମ୍ଭ ହୋଇଥିଲା। ପୁଲିସ୍‌କୁ ଆଖି ଆଗରେ ଦେଖି ଉଦୟବୀର ଗୁଳି ଚଳାଇଥିଲା। ଏହାର ପାଲଟା ଜବାବରେ ପୁଲିସ୍‌ ଫାୟାରିଂ କରିଥିବା ବେଳେ ତାହା ଉଦୟବୀରଙ୍କ ଗୋଡ଼ରେ ବାଜିଥିଲା।

ଏହାପରେ ପୁଲିସ୍‌ ଉଦୟବୀରଙ୍କୁ ଗିରଫ କରି ମେଡିକାଲରେ ଭର୍ତ୍ତି କରିଛି। ସେଠାରେ କଡ଼ା ସୁରକ୍ଷା ମଧ୍ୟରେ ତାଙ୍କ ଚିକିତ୍ସା ଚାଲିଛି।