ସ୍କୁଲର ପିଟି କ୍ଲାସରେ ହଠାତ୍ ବସିଥିବା ବେଳେ ଚାଲି ଯାଇଛି ଜଣେ ୧୩ ବର୍ଷୀୟ ପିଲାର ଜୀବନ। ମୁମ୍ବାଇର କାଣ୍ଡିଭ୍ଲିର ଗୋଟିଏ ସ୍କୁଲରେ ଏପରି ଘଟଣା ଘଟିଛି। ପିଲାଟିର ଘର ଗୁଜରାଟରେ ହୋଇଥିବା ବେଳେ ସେ ସ୍କୁଲ ହଷ୍ଟେଲରେ ରହୁଥିଲେ।
ନିକଟରେ ସେ ଡେଙ୍ଗୁ ଜ୍ୱରରେ ପୀଡ଼ିତ ଥିଲେ। କିନ୍ତୁ କିଛି ଦିନ ତଳେ ସେ ସୁସ୍ଥ ହୋଇଯାଇଥିଲେ। ତଥାପି ହଠାତ୍ କାହିଁକି ତାଙ୍କର ମୃତ୍ୟୁ ଘଟିଲା, ସେକଥା ଜଣାପଡ଼ି ନାହିଁ।
Also Read
ପ୍ରାଣ ହରାଇଥିବା ଛାତ୍ର ଜଣଙ୍କ ହେଲେ ଓମ ଗାନ୍ଦେଚା। ସେ କାଣ୍ଡିଭ୍ଲିର ଆରଜେ ମଖେଚା ସ୍କୁଲରେ ୮ମ ଶ୍ରେଣୀରେ ପଢ଼ୁଥିଲେ। ସୋମବାର ସ୍କୁଲର ପିଟି ସାର୍ ଅଷ୍ଟମ ଶ୍ରେଣୀର ଶିକ୍ଷାର୍ଥୀମାନଙ୍କୁ ସ୍କୁଲକୁ ଲାଗିଥିବା ଗୋଟିଏ ପଡ଼ିଆକୁ ନେଇଥିଲେ।
ସବୁ ପିଲା ଗୋଟିଏ ଗଛ ତଳେ ବସିଥିବା ବେଳେ ହଠାତ୍ ଓମ ଅସୁସ୍ଥ ଅନୁଭବ କରିଥିଲେ। ସେ ଅଚେତ ହୋଇଯାଇଥିଲେ। ତୁରନ୍ତ ଅନ୍ୟ ପିଲାମାନେ ଏ ସମ୍ପର୍କରେ ପିଟି ସାରଙ୍କୁ ଖବର ଦେଇଥିଲେ। ସେ ଆସି ଓମଙ୍କ ମୁହଁରେ ପାଣି ପକାଇବା ସହ ତାଙ୍କୁ ଉଠାଇବାକୁ ଚେଷ୍ଟା କରିଥିଲେ। ହେଲେ କିଛି ବି ଲାଭ ମିଳି ନଥିଲା।
ଓମକଙ୍କୁ ସେଠାରୁ ତୁରନ୍ତ ଗୋଟିଏ ଘରୋଇ ହସ୍ପିଟାଲକୁ ନିଆଯାଇଥିଲା। ସେଠାରୁ ତାଙ୍କୁ ବାବାସାହେବ ଆମ୍ବେଦକର ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। କିନ୍ତୁ ସକାଳ ପ୍ରାୟ ୧୦.୧୫ ମିନଟରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଏ ସମ୍ପର୍କରେ ପୁଲିସ୍ ଓ ସ୍କୁଲ କର୍ତ୍ତୃପକ୍ଷ ଓମଙ୍କ ପରିବାର ଲୋକଙ୍କୁ ଖବର ଦେଇଥିଲେ। ସେହିପରି ପୁଲିସ୍ ପିଟି ସାର୍ଙ୍କ ବୟାନ ମଧ୍ୟ ରେକର୍ଡ କରିଛି। କେଉଁ ପରିସ୍ଥିତିରେ ଓମଙ୍କ ମୃତ୍ୟୁ ହେଲା, ତା’ର କାରଣ ଜାଣିବା ପାଇଁ ପୁଲିସ୍ ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
