ଜୁଲାଇରେ ବସିବ ବଜେଟ ଅଧିବେଶନ!

ଜୁଲାଇରେ ଉପସ୍ଥାପନ ହୋଇପାରେ ମୋଦି ୩.୦ ସରକାରର ପ୍ରଥମ ବଜେଟ ଅଧିବେଶନ। ବିଶେଷ ସୂତ୍ରରୁ ପ୍ରକାଶ ରିପୋର୍ଟ ଅନୁସାରେ, ୨୦୨୪-୨୫ ଆର୍ଥିକ ବର୍ଷ ପାଇଁ ଜୁଲାଇ ୨୦ ସୁଦ୍ଧା ପୂର୍ଣ୍ଣ ବଜେଟ ଅଧିବେଶନ ବସିବାର ସମ୍ଭାବନା ରହିଛି। 

ଅଧିବେଶ ପୂର୍ବରୁ ଅର୍ଥ ମନ୍ତ୍ରଣାଳୟ ଜୁନ୍ ୧୭ ସୁଦ୍ଧା ପୂର୍ବ-ପରାମର୍ଶ ବଜେଟ୍ ବୈଠକ କରିବ। ଏହା ପୂର୍ବରୁ ଜୁନ୍ ୨୪ରୁ ଜୁଲାଇ ୩ ପର୍ଯ୍ୟନ୍ତ ନୂଆ ସରକାରର ପ୍ରଥମ ଅଧିବେଶନ ବସିବ। ଏନେଇ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜୁଜୁ ଏକ୍ସ ପୋଷ୍ଟ ଯୋଗେ ସୂଚନା ଦେଇଛନ୍ତି।

ରିଜୁଜୁ ଏକ ଏକ୍ସ ପୋଷ୍ଟରେ କହିଥିଲେ ଯେ, ୧୮ତମ ଲୋକସଭାର ପ୍ରଥମ ଅଧିବେଶନ ଜୁନ୍ ୨୪ରୁ ଜୁଲାଇ ୩ ପର୍ଯ୍ୟନ୍ତ ଅନୁଷ୍ଠିତ ହେବ। ଏହି ଅଧିବେଶନରେ ନବନିର୍ବାଚିତ ସାଂସଦମାନେ ଶପଥ ନେବା ସହ ବାଚସ୍ପତି ନିଯୁକ୍ତି ହେବ। 

ଅଧିବେଶନର ପ୍ରଥମ ଓ ଦ୍ୱିତୀୟ ଦିନ ସାଂସଦମାନେ ଶପଥ ଗ୍ରହଣ କରିବେ ଏବଂ ଜୁନ୍ ୨୬ରେ ଲୋକସଭା ବାଚସ୍ପତି ନିର୍ବାଚନ ହେବ ଏବଂ ଜୁଲାଇ 3 ପର୍ଯ୍ୟନ୍ତ ବିଭିନ୍ନ ପ୍ରସଙ୍ଗରେ ଆଲୋଚନା ହେବ।

ଏହା ପରେ ଜୁଲାଇ ମଧ୍ୟ ଭାଗରେ ପୂର୍ଣ୍ଣ ବଜେଟ ଉପସ୍ଥାପନ ହେବ। ରିପୋର୍ଟରେ ଉଲ୍ଲେଖ କରାଯାଇଛି ଯେ, ୨୦୨୩-୨୪ ଆର୍ଥିକ ବର୍ଷ ପାଇଁ ଅର୍ଥନୈତିକ ସର୍ବେକ୍ଷଣର ଉପସ୍ଥାପନା ସହିତ ବଜେଟ ଅଧିବେଶନ ଆରମ୍ଭ ହେବ ଏବଂ ପରେ ୨୦୨୫ ଆର୍ଥିକ ବର୍ଷ ପାଇଁ ପୂର୍ଣ୍ଣ ବଜେଟ୍ ଆସିବ।