କିଏ ହେବ ଲୋକସଭା ବାଚସ୍ପତି? ଚାଲିଛି ମାନସ ମନ୍ଥନ

ଲୋକସଭା ବାଚସ୍ପତି ଓ ଉପବାଚସ୍ପତି ପଦକୁ ନେଇ NDAର ମାନସ ମନ୍ଥନ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଦିଲ୍ଲୀ ସ୍ଥିତ ବାସଭବନରେ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି । ଏଥିରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା, କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ, କେନ୍ଦ୍ରମନ୍ତ୍ରୀ ପୀୟୂଷ ଗୋୟଲ, ଜେଡିୟୁ ନେତା ତଥା କେନ୍ଦ୍ରମନ୍ତ୍ରୀ ଲଲ୍ଲନ ସିଂହ, ଏଲଜେପି ନେତା ତଥା କେନ୍ଦ୍ରମନ୍ତ୍ରୀ ଚିରାଗ ପାଶୱାନ ପ୍ରମୁଖ ଯୋଗ ଦେଇଥିଲେ।

ଆସନ୍ତା ୨୬ ତାରିଖରେ ୧୮ତମ ଲୋକସଭାର ବାଚସ୍ପତି ନିର୍ବାଚନ ହେବାକୁ ଥିବା ବେଳେ, ଏହା ପୂର୍ବରୁ ନିଜର ସମ୍ଭାବ୍ୟ ପ୍ରାର୍ଥୀମାନଙ୍କ ସଂପର୍କରେ ଆଲୋଚନା କରିବାକୁ ଏବଂ ଇଣ୍ଡି ମେଣ୍ଟକୁ ଚେକ୍ ଦେବା ଭଳି ରଣନୀତି ପ୍ରସ୍ତୁତ କରିବାକୁ ଏହି ବୈଠକ ବସିଥିବା କୁହାଯାଉଛି।

ବିଜେପି ପକ୍ଷରୁ ବାଚସ୍ପତି ରେସ୍‌ରେ ରାଧାମୋହନ ସିଂହ, ଓମ୍ ବିର୍ଲା ଏବଂ ଦଗ୍ଗୁବତୀ ପୁରନ୍ଦେଶ୍ୱରୀଙ୍କ ନାଁ ଚର୍ଚ୍ଚାରେ ଥିବା ବେଳେ, ବିରୋଧୀଙ୍କ ପକ୍ଷରୁ ଉପବାଚସ୍ପତି ପଦ ପାଇଁ ଦାବି କରିଛି ଇଣ୍ଡି ମେଣ୍ଟ। ଏଥିରେ ଏନଡିଏ ରାଜି ନହେଲେ ଇଣ୍ଡି ମେଣ୍ଟ ନିଜ ଆଡ଼ୁ ବାଚସ୍ପତି ପ୍ରାର୍ଥୀଙ୍କୁ ମଧ୍ୟ ମୈଦାନକୁ ଓହ୍ଲାଇପାରେ ବୋଲି ଚର୍ଚ୍ଚା ହେଉଛି।

ଜେଡିୟୁ ଜାତୀୟ ସାଧାରଣ ସମ୍ପାଦକ କେ.ସି ତ୍ୟାଗି ଇଣ୍ଡିଆନ ଏକ୍ସପ୍ରେସକୁ କହିଛନ୍ତି, କଂଗ୍ରେସ ଯାହା କରୁଛି ତାହା ଧ୍ୟାନକୁ ବିଭ୍ରାନ୍ତ କରୁଛି, ଏହା ଭୁଲ ଅଟେ। କାରଣ ପରମ୍ପରା ହେଉଛି ଯେ ଶାସକ ଦଳର ସବୁଠାରୁ ବଡ ଦଳ ବାଚସ୍ପତିଙ୍କ ବିଷୟରେ ନିଷ୍ପତ୍ତି ନିଅନ୍ତି। ବିଜେପି ଯାହା ନିଷ୍ପତ୍ତି ନେବ, ଆମେ ଏହାକୁ ସମର୍ଥନ କରିବୁ।

ସେପଟେ ଟିଡିପି କହିଛି ଯେ ଶାସକ ଦଳ ବାଚସ୍ପତି ପଦ ପାଇଁ ପ୍ରାର୍ଥୀ ଦେବା ଉଚିତ। ବାଚସ୍ପତି ପଦ ପାଇଁ ନିର୍ବାଚନ ସମ୍ପର୍କରେ ଏନଡିଏ ସହଯୋଗୀମାନେ ଏକାଠି ବସିବେ ଏବଂ ବାଚସ୍ପତି ପ୍ରାର୍ଥୀ କିଏ ହେବେ ତାହା ସ୍ଥିର କରିବେ। ଥରେ ସହମତି ହୋଇଗଲେ, ଆମେ ସେହି ପ୍ରାର୍ଥୀ ଦେବୁ ଏବଂ ଟିଡିପି ସମେତ ସମସ୍ତ ସହଯୋଗୀ ପ୍ରାର୍ଥୀଙ୍କୁ ସମର୍ଥନ କରିବେ। ତେବେ ବାଚସ୍ପତିଙ୍କ ଚେୟାରରେ ଦାବି ଉପସ୍ଥାପନ କରିବାର ବିକଳ୍ପକୁ ଟିଡିପି ଏଡ଼ାଇ ଦେଇନାହିଁ। ଏଭଳି ପରିସ୍ଥିତିରେ ଜେଡିୟୁଙ୍କ ଷ୍ଟାଣ୍ଡ ଦ୍ୱାରା ବିଜେପିର ସ୍ଥିତି ମଜବୁତ ହୋଇଛି।