ଦିନକରେ କରୋନା ଆକ୍ଟିଭ କେସ୍‌ ହେଲା ଡବଲ, ଗଲା ୨ ଜୀବନ

ପୁଣି ଥରେ କଡ଼ ଲେଉଟାଇଲାଣି କରୋନା। ଦେଖାଇଲାଣି ତା’ର ଭୟଙ୍କର ରୂପ । ଗତ ୨୪ ଘଣ୍ଟାରେ ମହାରାଷ୍ଟ୍ରରେ କରୋନା ଆକ୍ଟିଭ କେସ୍‌ ଡବଲ ହୋଇଛି। କେବଳ ସେତିକି ନୁହେଁ ଦିନକ ମଧ୍ୟରେ ଏହି ମହାମାରୀ ଯୋଗୁ ୨ ଜଣ ଆଖି ବୁଜିଲେଣି। ହଠାତ୍‌ କରୋନାର ଏ ପ୍ରକାର ଭୟଙ୍କର ରୂପ ଦେଖି ଆତଙ୍କିତ ହୋଇ ପଡ଼ିଛନ୍ତି ରାଜ୍ୟବାସୀ।

ଗତ ସୋମବାର ମହାରାଷ୍ଟ୍ରରେ କରୋନାର ୬୧ କେସ୍‌ ଚିହ୍ନଟ ହୋଇଥିଲା। ମଙ୍ଗଳବାର ଏହା ଡବଲ ହୋଇ ୧୫୫ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି।

ମହାରାଷ୍ଟ୍ରରେ ଏଯାବତ ୮୧, ୩୮, ୬୫୩ କରୋନା କେସ୍‌ ମିଳି ସାରିଲାଣି। କରୋନା ଏ ଯାବତ ରାଜ୍ୟରେ ୧.୪୮ ଲକ୍ଷ ଲୋକଙ୍କ ଜୀବନ ନେଇସାରିଲାଣି।

ମହାରାଷ୍ଟ୍ରର ପୁଣେରେ କରୋନାର ନୂଆ ୭୫ କେସ୍‌ ମିଳିଥିବା ବେଳେ ମୁମ୍ବାଇରେ ୪୯, ନାସିକରେ ୧୩, ନାଗପୁରରେ ୮, କୋହ୍ଲାପୁରରେ ୫ ନୂଆ କେସ୍‌ ସାମନାକୁ ଆସିଛି। ମୃତ୍ୟୁମୁଖରେ ପଡ଼ିଥିବା ୨ କରୋନା ଆକ୍ରାନ୍ତ ପୁଣେରେ ରହୁଥିବା ଜଣାଯାଇଛି।

ରାଜ୍ୟରେ ଆକ୍ଟିଭ କେସ୍‌ ୬୬୨ ରହିଛି। ସବୁଠୁ ଅଧିକ ଆକ୍ଟିଭ କେସ୍‌ ପୁଣେରେ ୨୦୬ ରହିଛି। ମୁମ୍ବାଇରେ ୧୪୪, ଠାଣେରେ ୯୮ ଆକ୍ଟିଭ କେସ୍‌ ରହିଛି। ମହାରାଷ୍ଟ୍ରରେ ଏ ପର୍ଯ୍ୟନ୍ତ ୭୯,୮୯,୫୬୫ କରୋନା ଆକ୍ରାନ୍ତ ସୁସ୍ଥ ହୋଇ ସାରିଲେଣି।

ସମଗ୍ର ଦେଶରେ ଗତ ୨୪ ଘଣ୍ଟାରେ ୪୦୨ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏବେ ଦେଶରେ ଆକ୍ଟିଭ କେସ୍‌ ୩୯୦୩ ରହିଛି।