ଦକ୍ଷିଣପୂର୍ବ ଓ ଦକ୍ଷିଣପଶ୍ଚିମ ଆରବ ସାଗର ଉପରେ ସୃଷ୍ଟି ହୋଇଥିବା ଲଘୁଚାପ କ୍ରମଶଃ ଘନୀଭୂତ ହୋଇ ଅବପାତର ରୂପ ନେଇଛି। ଆସନ୍ତାକାଲି ସକାଳ ସୁଦ୍ଧା ଏହା ଆହୁରି ଘନୀଭୂତ ହୋଇ ବାତ୍ୟାର ରୂପ ନେବ ବୋଲି ଭାରତୀୟ ପାଣିପାଗ ବିଭାଗ ସୂଚନା ଦେଇଛି।
ଚଳିତ ବର୍ଷ ଆରବ ସାଗରରେ ଦ୍ୱିତୀୟ ଥର ପାଇଁ ବାତ୍ୟା ସୃଷ୍ଟି ହେବାକୁ ଯାଉଛି। ଯଦି ଆସନ୍ତାକାଲି ବାତ୍ୟା ସୃଷ୍ଟି ହେଉଛି, ତା’ହେଲେ ଏହାର ନାଁ ତେଜ୍ ରହିବ। ଭାରତ ମହାସାଗର ଅଞ୍ଚଳ ଆଧାରରେ ବାତ୍ୟାର ନାଁ ନାମିତ କରାଯାଇଛି।
Also Read
ଭାରତୀୟ ପାଣିପାଗ ବିଭାଗ କହିଛି ଯେ ବାତ୍ୟା ତେଜ୍ ରବିବାର ସୁଦ୍ଧା ଆହୁରି ଘନୀଭୂତ ହେବ। ଏହାପରେ ଏହା ଭୀଷଣ ବାତ୍ୟାର ରୂପ ନେଇ ଓମାନର ଦକ୍ଷିଣ ଉପକୂଳ ଆଡ଼େ ଯିବ।
ତେବେ ପାଣିପାଗ ବିଜ୍ଞାନୀମାନେ ମତ ରଖିଛନ୍ତି ଯେ ବାତ୍ୟା ତେଜ୍ ତା’ର ଟ୍ରାକ ବଦଳାଇବା ସହ ଆହୁରି ଭୟଙ୍କର ହୋଇପାରେ। ବାତ୍ୟା ବିପର୍ଯ୍ୟୟ ବେଳେ ଯେଉଁଭଳି ସ୍ଥିତି ସୃଷ୍ଟି ହୋଇଥିଲା, ଏବେ ସେଭଳି କିଛି ହୋଇପାରେ। ଜୁନ ମାସରେ ସୃଷ୍ଟି ହୋଇଥିବା ବାତ୍ୟା ବିପର୍ଯ୍ୟୟ ଉତ୍ତର-ଉତ୍ତର ପଶ୍ଚିମ ଦିଗରେ ଗତି କରୁଥିଲା। ହେଲେ ଏହା ଦିଗ ବଦଳାଇ ଗୁଜରାଟର ମାଣ୍ଡଭି ଓ ପାକିସ୍ତାନର କରାଚି ମଧ୍ୟରେ ଲ୍ୟାଣ୍ଡଫଲ କରିଥିଲା।
ଘରୋଇ ପାଣିପାଗ ସଂସ୍ଥା ସ୍କାଏମେଟ ୱେଦର କହିଛି ଯେ ଅଧିକାଂଶ ମଡେଲର ତଥ୍ୟ କହୁଛି, ବାତ୍ୟା ତେଜ୍ ୟେମେନ ଓ ଓମାନ ଉପକୂଳ ଆଡ଼କୁ ଯିବ। କିନ୍ତୁ ଗ୍ଲୋବାଲ ଫୋରକାଷ୍ଟ ସିଷ୍ଟମର ମଡେଲ କହିଛି ଯେ ବାତ୍ୟା ତେଜ୍ ରିକର୍ଭ କରି ପାକିସ୍ତାନ ଓ ଗୁଜରାଟ ଉପକୂଳ ଆଡ଼େ ଆସିବ। ବାତ୍ୟାର ପ୍ରଭାବରେ ପବନର ସର୍ବାଧିକ ବେଗ ଘଣ୍ଟା ପ୍ରତି ୧୧୭ କିମି ରହିବ।
ବିଭିନ୍ନ ପାଣିପାଗ ସଂସ୍ଥା ଭିନ୍ନଭିନ୍ନ କଥା କହୁଥିଲେ ହେଁ ଆସନ୍ତାକାଲି ବାତ୍ୟା ସୃଷ୍ଟି ହେବା ପରେ ପୂରା ତଥ୍ୟ ସାମ୍ନାକୁ ଆସିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
