Teen Dies By Suicide: ନିଟ୍‌ରେ ୯୯.୯୯% ମାର୍କ ରଖିଥିଲେ, କିନ୍ତୁ ଡାକ୍ତର ହେବାକୁ ଚାହୁଁ ନଥିଲେ: ଜୀବନ ହାରିଦେଲେ ଛାତ୍ର

ମେଡିକାଲ ପାଠ୍ୟକ୍ରମରେ ନାଁ ଲେଖାଇବାକୁ ଅନୁଷ୍ଠିତ ନିଟ ପରୀକ୍ଷାରେ ଦମଦାର ପ୍ରଦର୍ଶନ କରିଥିଲେ। ୧୦୦ରୁ ୯୯.୯୯% ମାର୍କ ରଖି ନିଜ ଦକ୍ଷତାର ପରିଚୟ ଦେଇଥିଲେ। ମାର୍କ ଦେଖି ପରିବାର ଲୋକ ବେଶ ଖୁସି ହୋଇ ଯାଇଥିଲେ। ୧୯ ବର୍ଷୀୟ ପୁଅକୁ ମେଡିକାଲ କଲେଜରେ ନାଁ ଲେଖାଇବାକୁ ନିଷ୍ପତ୍ତି ନେଇଥିଲେ। ସେମାନେ ପୁଅକୁ ଡାକ୍ତର କରିବାକୁ ଚାହୁଁଥିଲେ। ଏଥିପାଇଁ ସବୁ ପ୍ରକାରର ପ୍ରସ୍ତୁତ ଶେଷ ହୋଇଥିଲା। 

ହେଲେ ଯେଉଁ ଦିନ ମେଡିକାଲ କଲେଜରେ ନାଁ ଲେଖାଇବାକୁ ଯିବାର ଥିଲା, ସେହିଦିନ ମେଧାବୀ ଛାତ୍ର ଜଣଙ୍କ ନେଇଛନ୍ତି ଚରମ ପଦକ୍ଷେପ। ସେ ଘରର ରୁମ ଭିତରେ କରିଛନ୍ତି ଆତ୍ମହତ୍ୟା। ମହାରାଷ୍ଟ୍ରର ଚନ୍ଦ୍ରପୁର ଜିଲ୍ଲାରୁ ଏପରି ଦୁଃଖଦ ଖବର ସାମ୍ନାକୁ ଆସିଛି। 

ଆତ୍ମହତ୍ୟା କରିଥିବା ଛାତ୍ର ଜଣଙ୍କ ହେଲେ ଅନୁରାଗ ଅନୀଲ ବୋରକର। ତାଙ୍କ ପାଖରୁ ଗୋଟିଏ ସୁଇସାଇଡ(Suicide) ନୋଟ ଜବତ ହୋଇଛି। ଏଥିରେ ସେ ଡାକ୍ତର ହେବାକୁ ଚାହୁଁ ନଥିବା ଉଲ୍ଲେଖ କରିଛନ୍ତି। ଖାସ ଏହି କାରଣ ପାଇଁ ଜୀବନ ହାରିଥିବା ସେ ସୁଇସାଇଡ ନୋଟରେ କହିଛନ୍ତି। 

ସିନ୍ଦେୱାହି ତାଲୁକାର ନବରଗାଓଁରେ ଅନୁରାଗ ତାଙ୍କ ପରିବାର ଲୋକଙ୍କ ସହ ରହୁଥିଲେ। ନିଟ୍ ୟୁଜି ୨୦୨୫(NEET UG 2025) ପରୀକ୍ଷାରେ ସେ ୯୯.୯୯% ମାର୍କ ରଖିଥିଲେ। ସର୍ବଭାରତୀୟ ସ୍ତରରେ ତାଙ୍କ ରାଙ୍କ ଓବିସି ବର୍ଗରେ ୧୪୭୫ ରହିଥିଲା। ଏହି ସଫଳତା ପରେ ପରିବାର ଲୋକ ତାଙ୍କୁ ଉତ୍ତର ପ୍ରଦେଶର ଗୋରଖପୁର ପଠାଇବାକୁ ଯୋଜନା କରିଥିଲେ।

ସେଠାରେ ସେ ଏମବିବିଏସ୍‌ ପାଠ୍ୟକ୍ରମରେ ନାଁ ଲେଖାଇ ଥାଆନ୍ତେ। ଏହାକୁ ନେଇ ବେଶ ଚିନ୍ତାରେ ଥିଲେ ଅନୁରାଗ। କାରଣ ସେ ଡାକ୍ତର ହେବାକୁ ଚାହୁଁ ନଥିଲେ। ତଥାପି ପରିବାର ଲୋକଙ୍କ ସ୍ୱପ୍ନ ଆଗରେ ସେ ମୁହଁ ଖୋଲି ପାରୁ ନଥିଲେ।  

କିନ୍ତୁ ପରିବାର ଲୋକ ତାଙ୍କୁ ଗୋରଖପୁର ପଠାଇବା ପୂର୍ବରୁ ଅନୁରାଗ ତାଙ୍କ ଘରେ ହିଁ ଆତ୍ମହତ୍ୟା କରିଛନ୍ତି। ତାଙ୍କ ଝୁଲନ୍ତା ମୃତଦେହ ଘରର ଗୋଟିଏ ରୁମରୁ ଜବତ କରାଯାଇଛି। ପୁଲିସ୍‌ ସୁଇସାଇଡ ନୋଟକୁ ଜବତ କରି ଘଟଣାର ଅଧିକ ତଦନ୍ତ କରୁଛି।