ପୁଅର ମୃତଦେହ ସହ ଚାରି ଦିନ ବିତାଇଲେ ଦୃଷ୍ଟିହୀନ ବାପାମାଆ

ତେଲାଙ୍ଗାନା ରାଜଧାନୀ ହାଇଦ୍ରାବାଦରେ ଏକ ହୃଦୟ ବିଦାରକ ଘଟଣା ଘଟିଛି। ପୁଅର ମୃତଦେହ ସହ ଚାରି ଦିନ ବିତାଇଛନ୍ତି ଦୃଷ୍ଟିହୀନ ବାପା-ମାଆ। ପୁଅ ଘରେ ମରି ପଡ଼ିଥିଲେ ବି ବାପା-ମାଆ ଦୃଷ୍ଟିହୀନ ହୋଇଥିବାରୁ ଜାଣିପାରିଲେନି। ଘରୁ ଦୁର୍ଗନ୍ଧ ବାହାରିବା ପରେ ପଡୋଶୀ ଘଟଣାକୁ ସାମ୍ନାକୁ ଆଣିଛନ୍ତି।

ସୂଚନା ଅନୁସାରେ, ଗତକାଲି ପୁଲିସ ସ୍ଥାନୀୟ ଲୋକଙ୍କଠାରୁ କଲ୍ ପାଇ ଘଟଣାସ୍ଥଳରେ ପହଞ୍ଚିଥିଲା। ଖାନତଲାସି କରିବା ପରେ ଏକ ଘରୁ ତିନି ଜଣ ଲୋକଙ୍କୁ ପାଇଥିଲା। ମାତ୍ର ସେମାନଙ୍କ ମଧ୍ୟରୁ ଜଣେ ମୃତ ଅବସ୍ଥାରେ ତଳେ ପଡ଼ିଥିଲେ, ଆଉ ଘରୁ ଖୁବ୍ ଜୋରରେ ଦୁର୍ଗନ୍ଧ ଆସୁଥିଲା। ମାତ୍ର ବାପାମାଆ ଦୁହେଁ ଦୃଷ୍ଟିହୀନ ହୋଇଥିବାରୁ ନା ବାହାରକୁ ଆସି ପାରୁଥିଲେ, ନା କାହାକୁ ଖବର ଦେଇ ପାରୁଥିଲେ। ସେହିପରି ଶବ ପାଖରେ ଅଖିଆ ଅପିଆ ଶବ ପାଖରେ ବିତାଇଥିଲେ।

ପୁଲିସ କହିଛି ଯେ, ବୃଦ୍ଧ ଦମ୍ପତି ହେଉଛନ୍ତି, ୬୦ ବର୍ଷିୟ କେ ରମଣା ଏବଂ ୬୫ ବର୍ଷୀୟ କେ ଶାନ୍ତା କୁମାରୀ। ତାଙ୍କ ୩୦ ବର୍ଷୀୟ ପୁଅ କେ ପ୍ରମୋଦର ମୃତ୍ୟୁ ହୋଇଛି। ଚାରି ଦିନ ତଳେ ପ୍ରମୋଦ ବାପାମାଆଙ୍କୁ ଖାଇବାକୁ ଦେଇ ନିଜେ ଖାଇ ଶୋଇଥିଲେ। ମାତ୍ର ପର ଦିନ ସକାଳୁ ତାଙ୍କର ମୃତ୍ୟୁ ହୋଇଯାଇଛି।

ଶୋଇଥିବା ଅବସ୍ଥାରେ ହିଁ ତାଙ୍କର ମୃତ୍ୟୁ ଘଟିଥିବା ସନ୍ଦେହ କରାଯାଉଛି। ମାତ୍ର କେଉଁ କାରଣରୁ ମୃତ୍ୟୁ ହେଲା, ଏହାର ପ୍ରକୃତ କାରଣ କଣ ଶବ ବ୍ୟବଚ୍ଛେଦ ରିପୋର୍ଟ ପରେ ଜଣାପଡ଼ିବ ବୋଲି ପୁଲିସ କହିଛି। ସେପଟେ, ପୁଲିସ ଉକ୍ତ ଘରୁ ବୃଦ୍ଧ ବାପାମାଆଙ୍କୁ ବାହାରକୁ ଆଣିବା ସହ ମୃତଦେହ ଜବତ କରି ଅଧିକ ତଦନ୍ତ ଆରମ୍ଭ କରିଛି।