ସୂଚନା କମିଶନ ପଦ ପୂରଣ ପାଇଁ କେନ୍ଦ୍ର ଓ ରାଜ୍ୟକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ

କେନ୍ଦ୍ରୀୟ ସୂଚନା କମିଶନ ଓ ରାଜ୍ୟ ସୂଚନା କମିଶନରେ ଖାଲି ପଡ଼ିଥିବା ପଦଗୁଡ଼ିକୁ ତୁରନ୍ତ ପୂରଣ କରିବା ଦଗରେ ପଦକ୍ଷେପ ନେବାକୁ ଆଜି କେନ୍ଦ୍ର ଓ ରାଜ୍ୟ ସରକାରଗୁଡ଼ିକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ।

ସୂଚନା କମିଶନର ପଦବୀ ପୂରଣ ନ ହେଲେ, ସୂଚନା ଅଧିକାର ଆଇନ ୨୦୦୫ ମୃତ ଚିଠିରେ ପରିଣତ ହୋଇଯିବ ବୋଲି ସର୍ବୋଚ୍ଚ ଅଦାଲତ କହିଛନ୍ତି। ପ୍ରଧାନ ବିଚାରପତି ଜଷ୍ଟିସ ଡିୱାଇ ଚନ୍ଦ୍ରଚୂଡ଼, ଜଷ୍ଟିସ ଜେବି ପାରଡିୱାଲା ଓ ଜଷ୍ଟିସ ମନୋଜ ମିଶ୍ରାଙ୍କ ଖଣ୍ଡପୀଠ ଏପରି କହିବା ସହ କାର୍ମିକ ଓ ପ୍ରଶିକ୍ଷଣ ବିଭାଗ ପାଇଁ ସ୍ୱତନ୍ତ୍ର ନିର୍ଦ୍ଦେଶ ଜାରି କରିଛନ୍ତି।

କେଉଁ ରାଜ୍ୟରେ କେତେ ସଂଖ୍ୟକ ପଦ ଖାଲି ପଡ଼ିଛି, କେତେ ପୂରଣ ହୋଇଛି ଓ କେତେ ଆବେଦନ ପଡ଼ି ରହିଛି, ତା’ର ତଥ୍ୟ ସଂଗ୍ରହ କରିବାକୁ କାର୍ମିକ ବିଭାଗକୁ ସର୍ବୋଚ୍ଚ ଅଦାଲତ କହିଛନ୍ତି।

ଝାରଖଣ୍ଡ, ତ୍ରିପୁରା ଓ ତେଲେଙ୍ଗାନା ଭଳି ରାଜ୍ୟରେ ସୂଚନା କମିଶନ ସଂପୂର୍ଣ୍ଣ ଭାବେ ସ୍ଥାଣୁ ପାଲଟି ଯାଇଥିବା ଅଭିଯୋଗ ହୋଇଥିଲା। ଏହାର ଶୁଣାଣି କରି ସୁପ୍ରିମକୋର୍ଟ କେନ୍ଦ୍ର ଓ ରାଜ୍ୟ ସରକାରମାନଙ୍କୁ ଜବାବ ରଖିବା ଏବଂ ପଦବୀ ପୂରଣ କରିବା ପାଇଁ ୩ ସପ୍ତାହର ସମୟ ଦେଇଛନ୍ତି।

କେନ୍ଦ୍ରୀୟ ଓ ରାଜ୍ୟସ୍ତରୀୟ ସୂଚନା କମିଶନରେ ଖାଲି ପଡ଼ୁଥିବା ପଦବୀଗୁଡ଼ିକୁ ତୁରନ୍ତ ପୂରଣ କରିବାକୁ ୨୦୧୯ରେ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଥିଲେ। କିନ୍ତୁ ଏହାକୁ କାର୍ଯ୍ୟକାରୀ କରାଯାଉ ନଥିବା ଦାବି କରି ଆରଟିଆଇ କର୍ମୀ ଅଞ୍ଜଳୀ ଭରଦ୍ୱାଜ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।