ହିରାନନ୍ଦାନୀଙ୍କୁ ଲଗ୍‌ଇନ୍‌ ପାସଓ୍ୱାର୍ଡ ଦେଇଥିଲେ, ସତ ମାନିଲେ ମହୁଆ

ପଦାକୁ ଆସିଲା ସତ! ବିଜେପି ସାଂସଦ ନିଶିକାନ୍ତ ଦୁବେ ଅଭିଯୋଗ ଆଣିବା ପରେ  ମମତାଙ୍କ ଘନିଷ୍ଠ ସହଯୋଗୀ ତଥା ଟିଏମ୍‌ସି ନେତ୍ରୀ ମହୁଆ ମୋଇତ୍ରା ଶେଷରେ ମାନିଛନ୍ତି ସତ। ସେ ଲୋକସଭାରୁ ତାଙ୍କ ପାଇଁ ଦିଆଯାଇଥିବା ୟୁଜର୍‌ ଆଇଡି ଓ ପାସଓ୍ୱାର୍ଡ ହିରାନନ୍ଦାନୀଙ୍କୁ ଦେଇଥିବା ସ୍ୱୀକାର କରିଛନ୍ତି। ଯାହାଙ୍କ ପାଖରୁ ଲୋକସଭାରେ ଶିଳ୍ପପତି ଗୌତମ ଅଦାନୀ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିବା ପାଇଁ ଯେଉଁ ପ୍ରଶ୍ନ ଉଠାଉଥିଲେ, ସେଥିପାଇଁ ସେ ଲାଞ୍ଚ ଆଣିଥିବା ଅଭିଯୋଗ ରହିଛି।

ଲୋକସଭା ସାଂସଦ ମହୁଆ ଶୁକ୍ରବାର ଦେଇଥିବା ଏକ ସାକ୍ଷାତକାରରେ ଏହି ସତ ମାନିଛନ୍ତି। ଏଥିସହ ପଚରାଉଚରା ମାମଲାରେ ତାଙ୍କ ବିରୋଧରେ ଆସିଥିବା ସମସ୍ତ ଅଭିଯୋଗକୁ ଖଣ୍ଡନ ସେ କରିଛନ୍ତି। ସେ କହିଛନ୍ତି ଯେ ଯେକେହି ଅଭିଯୋଗ କରିପାରିବେ, କିନ୍ତୁ ଏହାକୁ ପ୍ରମାଣ କରିବାର ସମର୍ଥ ସର୍ବଦା ଅଭିଯୋଗକାରୀଙ୍କ ପାଖରେ ଅଛି।

ମହୁଆ କହିଛନ୍ତି, ସେ ତାଙ୍କ ସଂସଦର ଲଗଇନ ଏବଂ ପାସୱାର୍ଡ ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କୁ ଦେଇଛନ୍ତି କାରଣ କାହାର ଲଗଇନ ରହିପାରିବ, କିଏ ପାରିବ ଏବଂ କିଏ କରିପାରିବ ନାହିଁ ସେନେଇ କୌଣସି ନିୟମ ନାହିଁ। ସେ ଆହୁରି କହିଛନ୍ତି,  କୌଣସି ସାଂସଦ ନିଜେ ପ୍ରଶ୍ନ ପଚାରନ୍ତି ନାହିଁ। ଲଗଇନ ଏବଂ ପାସୱାର୍ଡ ତାଙ୍କ ଦଳ ସହିତ ରହିଥାଏ।

ତାଙ୍କ ବିରୋଧରେ ବିଜେପି ସାଂସଦ ନିଶିକାନ୍ତ ଦୁବେ କରିଥିବା ସମସ୍ତ ଅଭିଯୋଗକୁ ମହୁଆ ପ୍ରତ୍ୟାଖ୍ୟାନ କରି କହିଛନ୍ତି, କେବଳ ପାସୱାର୍ଡ ଦ୍ୱାରା ଲଗଇନ କରାଯାଇପାରିବ ନାହିଁ। ଏଥିପାଇଁ ଏକ ଓଟିପି ଆସେ ଏବଂ ଏହା କେବଳ ମୋ ଫୋନରେ ଆସେ। ଏହା ଦର୍ଶନ ହିରାନନ୍ଦାନୀଙ୍କ ଫୋନକୁ ଯାଏ ନାହିଁ। ଯେତେବେଳେ ମୁଁ ଓଟିପି ଦେବି, ପ୍ରଶ୍ନଗୁଡ଼ିକ ଦାଖଲ ହୁଏ। ହିରାନନ୍ଦାନୀଙ୍କୁ ଲଗ୍‌ ଇନ୍‌ ପାସ୍‌ଓ୍ୱାର୍ଡ ଦେବା କଥା ସ୍ୱୀକାର କରି କହିଛନ୍ତି ଯେ, ସେ ଦୁର୍ଗମ ଅଞ୍ଚଳରେ କାମ କରନ୍ତି। ଏଥିପାଇଁ ବ୍ୟସ୍ତ ରୁହନ୍ତି।

ଏଥିକ୍ସ କମିଟି ନଭେମ୍ବର ୨ ତାରିଖରେ ମହୁଆଙ୍କୁ ହାଜର ହେବାକୁ କହିଛି। ଏହା ପୂର୍ବରୁ ମହୁଆ ମୋଇତ୍ରାଙ୍କ ଏହି ସ୍ୱୀକାରୋକ୍ତି ସାମ୍ନାକୁ ଆସିବା ପରେ ତାଙ୍କ ଅଡୁଆ ଆହୁରି ବଢ଼ିପାରେ। ତାଙ୍କୁ ଏବେ ତାଙ୍କ ନିଜ ଦଳ ତଥା ଟିଏମ୍‌ସି ଘେରିପାରେ। ସେ ଟିଏମ୍‌ସି କାର୍ଯ୍ୟାନୁଷ୍ଠାନର ଶିକାର ମଧ୍ୟ ହୋଇପାରନ୍ତି ବୋଲି କୁହାଯାଉଛି।