ରାପ୍ପର ବାଦଶାହଙ୍କ କ୍ଲବ ଆଗରେ ବିସ୍ଫୋରଣ, ନିଜକୁ ଦାୟୀ କଲା ଏହି ଗ୍ୟାଙ୍ଗଷ୍ଟର

ଆଉ ମାତ୍ର ସପ୍ତାହକ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚଣ୍ଡିଗଡ଼ ଯିବେ। କିନ୍ତୁ ଏହାପୂର୍ବରୁ ସେକ୍ଟର ୨୬ରେ ଥିବା ଦୁଇଟି ନାଇଟ କ୍ଲବ ଆଗରେ ହୋଇଛି ଛୋଟ ଧରଣର ବିସ୍ଫୋରଣ। ଦୁଇଟି କ୍ଲବ ମଧ୍ୟରୁ ଗୋଟିଏ ବଲିଉଡ ରାପ୍ପର ବାଦଶାହଙ୍କ ନାଁରେ ରହିଛି।

ବିସ୍ଫୋରଣ ପଛର କାରଣ ଜଣପଡ଼ି ନଥିବା ବେଳେ ଏବେ ଏଥିପାଇଁ କାନାଡାରେ ରହିଥିବା କୁଖ୍ୟାତ ଗ୍ୟାଙ୍ଗଷ୍ଟର ଗୋଲ୍ଡୀ ବ୍ରାର ନିଜକୁ ଦାୟୀ କରିଛି। ଗୋଲ୍ଡୀ ହେଉଛି ଜେଲରେ ଥିବା ଲରେନ୍ସ ବିଷ୍ଣୋଇର ସହଯୋଗୀ। ଏବେ ସେ ଫେସବୁକରେ ଗୋଟିଏ ପୋଷ୍ଟ କରି ବାଦଶାହଙ୍କ କ୍ଲବ ଆଗରେ ହୋଇଥିବା ବିସ୍ଫୋରଣ ପାଇଁ ନିଜକୁ ଦାୟୀ କରିଛି।

ପୁଲିସ୍‌ର କହିବା କଥା ଯେ ବିସ୍ଫୋରଣରେ କୌଣସି ପ୍ରକାରର କ୍ଷୟକ୍ଷତି ହୋଇନାହିଁ। ତେବେ ସେକ୍ଟର ୨୬ରେ ଥିବା ପୁଲିସ୍‌ ଷ୍ଟେସନ ଠାରୁ ୧୦୦ ମିଟର ଦୂରରେ ଏପରି ବିସ୍ଫୋରଣ ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି।

ପୁଲିସ୍‌ କହିଛି ଯେ ଦୁଇ ଜଣ ଦୁର୍ବୃତ୍ତ ବାଇକରେ ଆସି କ୍ଲବ ଦ୍ୱୟ ସାମ୍ନାରେ ବୋମା ମାଡ଼ କରିଥିଲେ। ଗୋଟିଏ କ୍ଲବରେ ଲାଗିଥିବା କାଚ ଦ୍ୱାର ଏଥିଯୋଗୁ କ୍ଷତିଗ୍ରସ୍ତ ହୋଇଛି। ଏହାକୁ ଛାଡ଼ି ଦେଲେ କେହି ବି ଆହତ ହୋଇ ନାହାନ୍ତି। ଭୋର ୩.୧୪ରେ ଜଣେ ବୋମା ମାଡ଼ କରିବା ବେଳର ସିସିଟିଭି ଫୁଟେଜ ମଧ୍ୟ ସାମ୍ନାକୁ ଆସିଛି।

କ୍ଲବ ମାଲିକମାନଙ୍କୁ ଡରାଇବା ପାଇଁ ଦୁର୍ବୃତ୍ତମାନେ ଏପରି କମ କ୍ଷମତା ବିଶିଷ୍ଟ ବୋମା ମାଡ଼ କରିଥାଇ ପାରନ୍ତି। ଏହି ଘଟଣାରେ ସେକ୍ଟର ୨୬ ପୁଲିସ୍‌ ଗୋଟିଏ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ଡିଇ-ଓରା କ୍ଲବର ଜଣେ କର୍ମଚାରୀ କହିଛନ୍ତି ଯେ ସେ ଓ ତାଙ୍କର ୭ରୁ ୮ ଜଣ ସହଯୋଗୀ କ୍ଲବ ଭିତରେ ଥିବା ବେଳେ ପ୍ରଥମେ ବିସ୍ଫୋରଣର ଶବ୍ଦ ଶୁଣିଥିଲେ। ପ୍ରଥମେ ସେଭିଲ୍ଲେ କ୍ଲବ ନିକଟରେ ବିସ୍ଫୋରଣ ହୋଇଥିଲା। ଏହାପରେ ଡିଇ-ଓରା କ୍ଲବ ବାହାରେ ବୋମା ମାଡ଼ ହୋଇଥିଲା। ଏହି ବିସ୍ଫୋରଣରେ କ୍ଲବର କାଚ ଦ୍ୱାର ଭାଙ୍ଗି ଯାଇଥିବା କର୍ମଚାରୀ ଜଣଙ୍କ କହିଛନ୍ତି।