ଡିଜେ ଶବ୍ଦରେ କମ୍ପୁଥିଲା ରାସ୍ତା । ଧୀରେ ଧୀରେ ଆଗକୁ ବଢ଼ୁଥିଲା ବର ଗାଡ଼ି। ଆଉ ତା’ ଆଗରେ ଧୁମ ମଚାଉଥିଲେ ବର ଯାତ୍ରୀ। ଗୀତର ତାଳେ ତାଳେ ଝୁମିବାରେ ବ୍ୟସ୍ତ ଥିଲେ । ହେଲେ ଠିକ୍ ଏହି ସମୟରେ ଘଟିଲା ଅଘଟଣ । ବରକୁ ନେଇ ବିବାହ ମଣ୍ଡପକୁ ଯାଉଥିବା ଜିପ୍ଟି ବର ଯାତ୍ରୀଙ୍କ ଉପରେ ମାଡ଼ିଗଲ। ଫଳରେ ଯେଉଁ ଅଞ୍ଚଳ ହସଖୁସିରେ ଫାଟି ପଡ଼ୁଥିଲା ସେଠି ଶୁଣିବାକୁ ମିଳିଲା କାନ୍ଦ ବୋବାଳି । ଲୋକଙ୍କ ଆର୍ତ୍ତ ଚିତ୍କାରରେ ଫାଟି ଉଠିଲା ସମଗ୍ର ଅଞ୍ଚଳ । ଏହି ଦୁର୍ଘଟଣାରେ ୧୧ ବର ଯାତ୍ରୀ ଗୁରୁତର ହୋଇଛନ୍ତି।
ଏପରି ଏକ ଛାତିଥରା ଘଟଣା ମହାରାଷ୍ଟ୍ରର ଉଲ୍ଲାସନଗରରେ ଘଟିଛି । ଅଭିଯୁକ୍ତ ଡ୍ରାଇଭରଜଣକ ବରଯାତ୍ରୀ ସହ ସେଲଫି ନେବାକୁ ଚେଷ୍ଟା କରୁଥିବା ବେଳେ ଏପରି ଦୁର୍ଘଟଣା ଘଟିଥିବା ଜଣାଯାଇଛି।
ଗତ ସୋମବାର ସନ୍ଧ୍ୟା ସମୟରେ ଉଲ୍ଲାସନଗରସ୍ଥିତ ପ୍ରବୀଣ ଇଣ୍ଟର ନ୍ୟାସନାଲ ହୋଟେଲରେ ଏକ ବିବାହ କାର୍ଯ୍ୟକ୍ରମ ଆୟୋଜିତ ହେଉଥିଲା। ଏହି ସମୟରେ ବର ଏକ ସୁସଜ୍ଜିତ ଜିପ୍ରେ ହୋଟେଲକୁ ଯାଉଥିବା ବେଳେ ଡ୍ରାଇଭର ସେଲଫି ନେଉଥିଲେ। ମାତ୍ର ହଠାତ୍ ସେ ଗାଡ଼ି ଉପରୁ ନିୟନ୍ତ୍ରଣ ହରାଇ ଦେବାରୁ ଗାଡ଼ିଟି ଜଣକ ପରେ ଜଣେ ବର ଯାତ୍ରୀଙ୍କ ଉପରେ ଚଢ଼ି ଯାଇଥିଲା। ଏଥିରେ ୧୧ ଜଣ ଗୁରୁତର ହୋଇଥିବା ବେଳେ ସେମାନଙ୍କ ମଧ୍ୟରେ ବହୁ ମହିଳା ଥିବା ଜଣାଯାଇଛି।
Also Read
ତୁରନ୍ତ ଗୁରୁତରଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ସେଠାରେ କିଛି ବରଯାତ୍ରୀଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାଯାଇଛି। ସେଣ୍ଟ୍ରାଲ ପୁଲିସ୍ ଗାଡ଼ିକୁ ଜବତ କରି ଏହି ଘଟଣାର ତଦନ୍ତ ଆରମ୍ଭ କରିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
