ଜେଲରୁ ଇସ୍ତଫା ଦେଲେ ମନ୍ତ୍ରୀ, ଚାକରଙ୍କ ଘରୁ ବାହାରିଥିଲା ଟଙ୍କାର ପାହାଡ

ଜେଲ୍‌ରୁ ଇସ୍ତଫା ଦେଲେ ମନ୍ତ୍ରୀ। ମନି ଲଣ୍ଡରିଂ ମାମଲାରେ ଜେଲ୍‌ରେ ବନ୍ଦ ଥିବା ଆଲମଗିର ଆଲମ ଝାଡଖଣ୍ଡ ସରକାର କ୍ୟାବିନେଟ୍‌ ମନ୍ତ୍ରୀ ତଥା କଂଗ୍ରେସ ବିଧାୟକ ଦଳ(ସିଏଲ୍‌ପି) ନେତା ପଦରୁ ଇସ୍ତଫା ଦେଇଛନ୍ତି। ତାଙ୍କ ପୁଅ ତନଭୀର ଆଲାମ ଏନେଇ ସୂଚନା ଦେଇଛନ୍ତି।

ତନଭୀର ଆଲାମଙ୍କ ଅନୁଯାୟୀ ତାଙ୍କ ବାପା ଜୁନ୍ ୮(ଶନିବାର) ରେ ଇସ୍ତଫା ଦେଇଛନ୍ତି। ସେହି ଦିନ ତାଙ୍କ ଇସ୍ତଫା ପତ୍ର ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଇଛି। ଏହି ଚିଠି ସୋମବାର ମୁଖ୍ୟମନ୍ତ୍ରୀ ଚମ୍ପାଇ ସୋରେନଙ୍କ କାର୍ଯ୍ୟାଳୟରେ ପହଞ୍ଚିଛି।

କହିରଖୁ ଯେ, ମନି ଲଣ୍ଡରିଂ ମାମଲାରେ ଅନୁସନ୍ଧାନକାରୀ ସଂସ୍ଥାର ଅଧିକାରୀମାନେ ପଚରାଉଚରା କରିବା ପରେ ପ୍ରବର୍ତ୍ତନ ନିର୍ଦ୍ଦେଶାଳୟ ଆଲାମଗିର ଆଲାମଙ୍କୁ ମେ' ୧୫ରେ ଗିରଫ କରିଥିଲା। ମେ ’୬ ତାରିଖରେ ଆଲାମଗିର ଆଲାମର ବ୍ୟକ୍ତିଗତ ସଚିବ ସଞ୍ଜୀବ ଲାଲଙ୍କ ଚାକର ଜାହାଙ୍ଗୀର ଆଲାମଙ୍କ ଆପାର୍ଟମେଣ୍ଟ ଉପରେ ଇଡି ଚଢ଼ାଉ କରି ୩୭ କୋଟି ଟଙ୍କାରୁ ଅଧିକ ନଗଦ ଜବତ କରିବା ପରେ ଏହା ଘଟିଥିଲା। ଏହି ଚଢ଼ାଉ ପରେ ଉଭୟ ଆଲାମ ଏବଂ ଲାଲଙ୍କୁ ଗିରଫ କରାଯାଇଥିଲା।

ଗତ ବର୍ଷ ଗିରଫ ହୋଇଥିବା ଝାଡଖଣ୍ଡର ଗ୍ରାମୀଣ ବିକାଶ ବିଭାଗର ପୂର୍ବତନ ମୁଖ୍ୟ ଇଞ୍ଜିନିୟର ବିରେନ୍ଦ୍ର କେ ରାମଙ୍କ ବିରୋଧରେ ଚାଲିଥିବା ଅର୍ଥ ହେରଫେର ମାମଲାର ଅନୁସନ୍ଧାନ ଅନୁଯାୟୀ ଇଡି ଏହି ଚଢ଼ାଉ କରିଥିଲା।