ଶନିବାର ହେବ ବଡ଼ ବିସ୍ଫୋରଣ, ସରକାରଙ୍କୁ ମିଳିଲା ଧମକ

ଇ-ମେଲ ଯୋଗେ ବଡ଼ ବିସ୍ଫୋରଣର ଧମକ ଦେଇଛନ୍ତି ଦୁର୍ବୃତ୍ତ। ଶନିବାର ବେଙ୍ଗାଲୁରୁରେ ବିସ୍ଫୋରଣ କରାଯିବ ବୋଲି ସରକାରଙ୍କୁ ମିଳିଛି ଧମକ। ଶନିବାର ଦିନ ୨.୪୮ ମିନିଟରେ ହେବାକୁ ଥିବା ବିସ୍ଫୋରଣରେ ପୂରା ବେଙ୍ଗାଲୁରୁ ସହର ଦୋହଲିଯିବ ବୋଲି ଇ-ମେଲ ଯୋଗେ ଧମକ ଆସିଛି।

ଧମକପୂର୍ଣ୍ଣ ଇ-ମେଲ କର୍ଣ୍ଣାଟକା ମୁଖ୍ୟମନ୍ତ୍ରୀ ସିଦ୍ଦରମୈୟା, ଉପ ମୁଖ୍ୟମନ୍ତ୍ରୀ ଡିକେ ଶିବକୁମାର, ରାଜ୍ୟର ଗୃହ ମନ୍ତ୍ରୀ ଓ ବେଙ୍ଗାଲୁରୁ ପୁଲିସ୍‌ କମିଶନରଙ୍କ ପାଖକୁ ପଠାଯାଇଛି। ଶାହିଦ ଖାନ ନାମକ କେହି ଦୁର୍ବୃତ୍ତ ଏପରି ଧମକପୂର୍ଣ୍ଣ ଇ-ମେଲ ପଠାଇଛି।

ଇ-ମେଲରେ କୁହାଯାଇଛି ଯେ ଶନିବାର ବେଙ୍ଗାଲୁରୁର ଜନଗହଳୀପୂର୍ଣ୍ଣ ଅଞ୍ଚଳ ଯଥା ରେଷ୍ଟୁରାଣ୍ଟ, ମନ୍ଦିର, ବସ କିମ୍ବା ଟ୍ରେନରେ ବିସ୍ଫୋରଣ କରାଯିବ। ବିଭିନ୍ନ ସାଧାରଣ ସଭାରେ ମଧ୍ୟ ବୋମା ଖଞ୍ଜା ଯିବ ବୋଲି ମଧ୍ୟ ଇ-ମେଲ ପ୍ରେରଣକାରୀ କହିଛି।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଇ-ମେଲ ପଠାଇଥିବା ଶାହିନ ଖାନ ବିସ୍ଫୋରଣ ରୋକିବା ପାଇଁ ସରକାରଙ୍କ ଆଗରେ ସର୍ତ୍ତ ମଧ୍ୟ ରଖିଛି। ଯଦି ସରକାର ବିସ୍ଫୋରଣ ଚାହୁଁ ନାହାନ୍ତି, ତା’ହେଲେ ତୁରନ୍ତ ୨.୫ ମିଲିୟନ ଡଲାର ବା ୨୦ କୋଟିରୁ ଅଧିକ ଟଙ୍କା ପଠାନ୍ତୁ।

ତେବେ ଏହି ଇ-ମେଲରେ କେତେ ସତ୍ୟତା ଅଛି, ସେକଥା ଜଣାପଡ଼ିନି। ପୁଲିସ୍‌ ନିଜ ଆଡ଼ୁ ମାମଲାକୁ ଗୁରୁତ୍ୱର ସହ ନେଇ ମାମଲା ରୁଜୁ କରିଛି। ଏଥିସହ ଆଇପି ଠିକଣା ଦ୍ୱାରା ପ୍ରେରଣକାରୀ ପାଖରେ ପହଞ୍ଚିବାକୁ ଚେଷ୍ଟା କରୁଛି।