ଦେଶର ରାଜଧାନୀ ଦିଲ୍ଲୀରେ ଏବେ ଗୋଟିଏ ଅଜବ ଘଟଣା ବାରମ୍ବାର ଘଟିବାରେ ଲାଗିଛି। ମହିଳାଙ୍କ ବସ୍ ଯାତ୍ରା ମାଗଣା ହୋଇଥିବାରୁ ସେମାନଙ୍କୁ ଦେଖିବା କ୍ଷଣି ଦିଲ୍ଲୀ ଟ୍ରାନ୍ସପୋର୍ଟ କର୍ପୋରେସନ(ଡିଟିସି) ଗାଡ଼ିଗୁଡ଼ିକ ନ ଅଟକି ଚାଲି ଯାଉଛନ୍ତି।
ବାରମ୍ବାର ଏପରି ଅଭିଯୋଗ ଆସୁଥିବା ବେଳେ ଆଜି ନିଜେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗୋଟିଏ ଭିଡିଓ ଜାରି କରି ଡିଟିସିର ବସ୍ର ସମସ୍ତ ଡ୍ରାଇଭରମାନଙ୍କୁ ଚେତାବନୀ ଦେଇଛନ୍ତି। ଯଦି ଆଗକୁ ମହିଳାଙ୍କୁ ଦେଖି ବସ୍ ଡ୍ରାଇଭର ଗାଡ଼ି ନ ଅଟକାଇବେ, ତା’ହେଲେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଡିଟିସିର ଗୋଟିଏ ବସ୍ କେମିତି ୩ ଜଣ ମହିଳାଙ୍କୁ ଦେଖି ନ ଅଟକି ଚାଲି ଯାଉଛି, ତା’ର ଭିଡିଓ ପୋଷ୍ଟ କରି କେଜ୍ରିୱାଲ ଲେଖିଛନ୍ତି, ଉକ୍ତ ଡ୍ରାଇଭର ଦଣ୍ଡିତ ହୋଇଛନ୍ତି। ଆପ୍ ସରକାର ଦେଶର ରାଜଧାନୀ ଦିଲ୍ଲୀରେ ୨୦୧୯ରୁ ମହିଳାଙ୍କ ବସ୍ ଯାତ୍ରାକୁ ମାଗଣା କରିଛନ୍ତି।
ସେବେଠାରୁ ସରକାର ପ୍ରତିବର୍ଷ କେତେ ମହିଳା ଏହି ଯୋଜନାରୁ ଫାଇଦା ଉଠାଉଛନ୍ତି, ତା’ର ତଥ୍ୟ ବଜେଟ ଉପସ୍ଥାପନ ବେଳେ ଦେଉଛନ୍ତି। ତଥାପି ଅନେକ ସ୍ଥାନରେ ଏବେ ଡିଟିସି ବସ୍ ମହିଳାଙ୍କୁ ଦେଖି ଚାଲି ଯାଉଥିବା ଅଭିଯୋଗ ହେଉଛି।
ऐसी शिकायतें आ रही हैं कि कुछ ड्राइवर महिलाओं को देखकर बस नहीं रोकते क्योंकि महिलाओं का सफ़र फ़्री है। इसे बिल्कुल बर्दाश्त नहीं किया जाएगा। इस बस ड्राइवर के ख़िलाफ़ सख़्त एक्शन लिया जा रहा है। pic.twitter.com/oqbzgMDoOB
— Arvind Kejriwal (@ArvindKejriwal) May 18, 2023
କେଜ୍ରିୱାଲ ଟ୍ୱିଟ କରି କହିଛନ୍ତି, “ଏମିତି ଅଭିଯୋଗ ଆସୁଛି ଯେ କିଛି ଡ୍ରାଇଭର ମହିଳାମାନଙ୍କୁ ଦେଖି ଗାଡ଼ି ଅଟକାଉ ନାହାନ୍ତି। ସେମାନଙ୍କ ଯାତ୍ରା ମାଗଣା ଥିବାରୁ ଡ୍ରାଇଭରମାନେ ଏମିତି କରୁଛନ୍ତି। କିନ୍ତୁ ଏପରି ଆଚରଣକୁ ଆଦୌ ବରଦାସ୍ତ କରାଯିବ ନାହିଁ। ଏପରି ଡ୍ରାଇଭରମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯାଉଛି।”
ଡିଟିସି ନ୍ୟାଶନାଲ କ୍ୟାପିଟାଲ ରିଜନ (ଏନସିଆର)ରେ ସେବା ଯୋଗାଉ ଥିବା ସବୁ ଠାରୁ ବଡ଼ ପରିବହନ ମାଧ୍ୟମ। ଏହା ଅଧୀନରେ ୩୯୨୦ଟି ବସ୍ ଚାଲୁଛି। ଏହା ମଧ୍ୟରୁ ୩୬୨୦ଟି ସିଏନଜି ବସ୍ ହୋଇଥିବା ବେଳେ ୩୦୦ଟି ହେଉଛି ଇଲେକ୍ଟ୍ରିକ ବସ୍।