ପ୍ରବର୍ତ୍ତନ ନିର୍ଦ୍ଦଶାଳୟରେ ହାଜର ହେଲେ ବିହାର ପୂର୍ବତନ ମୁଖ୍ୟମନ୍ତ୍ରୀ ତଥା ଆର୍ଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ। ଜମି ବଦଳରେ ଚାକିରି ଦୁର୍ନୀତିର ମନିଲଣ୍ଡରିଂ ମାମଲାରେ ଲାଲୁ ପ୍ରସାଦ ଯାଦବଙ୍କୁ ଇଡି ଜେରା କରୁଛି।
ଲାଲୁ ପ୍ରସାଦ ଯାଦବ ଓ ତାଙ୍କ ପୁଅ ତେଜସ୍ୱୀ ଯାଦବଙ୍କୁ ପାଟନା କାର୍ଯ୍ୟାଳୟରେ ଜେରା କରିବାକୁ ଇଡି ପୂର୍ବରୁ ସମନ କରିଥିଲା। ସମନ ଅନୁଯାୟୀ ଆଜି ତଥା ଜାନୁଆରୀ ୨୯ରେ ତାଙ୍କୁ ହାଜର ହେବାକୁ କୁହାଯାଇଥିଲା। ସେହିପରି ତେଜସ୍ୱୀଙ୍କ ଜାନୁଆରୀ ୩୦ରେ ହାଜର ହେବାକୁ କୁହାଯାଇଛି।
ସମନ ଦେବା ପାଇଁ ଇଡିର ଏକ ଟିମ୍ ଲାଲୁଙ୍କ ପତ୍ନୀ ତଥା ବିହାର ପୂର୍ବତନ ମୁଖ୍ୟମନ୍ତ୍ରୀ ରାବ୍ରୀ ଦେବୀଙ୍କ ପାଟନା ସ୍ଥିତ ବାସଭବନକୁ ଯାଇଥିଲା। ଲାଲୁ ଏବଂ ତେଜସ୍ୱୀଙ୍କ ବୟାନ ରେକର୍ଡ କରିବା ପାଇଁ ପାଟନାର ବ୍ୟାଙ୍କ ରୋଡ୍ ସ୍ଥିତ ଇଡି କାର୍ଯ୍ୟାଳୟରେ ହାଜର ହେବାକୁ କୁହାଯାଇଥିଲା। ଗତ ବର୍ଷ ଦିଲ୍ଲୀରେ ତେଜସ୍ୱୀ ଏହି ମାମଲାରେ ଇଡି ଅଫିସରେ ହାଜର ହୋଇଥିଲେ।
Land for Job scam case: Lalu Yadav arrives at ED's office in Patna, RJD supporters hit out at Centre
— ANI Digital (@ani_digital) January 29, 2024
Read @ANI Story | https://t.co/nWQWXbA6CY#LaluYadav #LandForJob #RJD #ED pic.twitter.com/WIiE8Btwpc
ଏହି ଦୁର୍ନୀତି ସେହି ସମୟରୁ ଆରମ୍ଭ ହୋଇଥିଲା ଯେତେବେଳେ ଲାଲୁ ପ୍ରସାଦ ପ୍ରଥମ ୟୁନାଇଟେଡ୍ ପ୍ରଗତିଶୀଳ ଆଲାଇନ୍ସ (ୟୁପିଏ) ସରକାରରେ ରେଳମନ୍ତ୍ରୀ ଥିଲେ। ଜାନୁଆରୀ ୯ ତାରିଖରେ ରେଲଓ୍ୱେରେ ଚାକିରି ପାଇଁ ଜମି ସମ୍ବନ୍ଧୀୟ ମନି ଲଣ୍ଡରିଂ ମାମଲାରେ ଇଡି ଏକ ଚାର୍ଜସିଟ୍ ଦାଖଲ କରି ରାବ୍ରି ଦେବୀ, ତାଙ୍କ ଝିଅ ତଥା ଆରଜେଡି ସାଂସଦ ମିସା ଭାରତୀ, ହେମା ଯାଦବ ଏବଂ ଲାଲୁ ପ୍ରସାଦଙ୍କ ପରିବାରର ଅନ୍ୟ ସଦସ୍ୟଙ୍କ ନାଁ ଏଥିରେ ଉଲ୍ଲେଖ କରି ସେମାନଙ୍କୁ ଅଭିଯୁକ୍ତ ଦର୍ଶାଇଥିଲା।
ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (PMLA) ର ଅପରାଧିକ ବିଭାଗ ଅଧୀନରେ ରୁଜୁ ହୋଇଥିବା ଏହି ମାମଲା କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଦ୍ୱାରା ଦାଖଲ କରାଯାଇଥିବା ଅଭିଯୋଗ ଉପରେ ଆଧାରିତ। ପୂର୍ବରୁ ସିବିଆଇ ଏହି ମାମଲାରେ ଚାର୍ଜସିଟ୍ ଦାଖଲ କରିସାରିଛି। ଗତ ବର୍ଷ ଅକ୍ଟୋବରରେ ସିବିଆଇ ଏହି ମାମଲାରେ ଲାଲୁ ପ୍ରସାଦ, ରାବ୍ରି ଦେବୀ ଏବଂ ତେଜସ୍ୱୀ ଯାଦବଙ୍କୁ ନିମ୍ନ ଅଦାଲତରୁ ଜାମିନ ମିଳିଥିଲା।