ଭୟଙ୍କର ଭୂସ୍ଖଳନ, ଧୋଇ ହୋଇଗଲା ଭାରତ-ଚୀନ ସୀମାନ୍ତ ରାସ୍ତା

ଭୟଙ୍କର ବର୍ଷା ପରେ ହେଲା ଭୂସ୍ଖଳନ। ଧୋଇ ହୋଇଗଲା ଭାରତ-ଚୀନ୍‌ ସୀମାନ୍ତ ରାସ୍ତା। ଅରୁଣାଚଳ ପ୍ରଦେଶର ଅନେକ ଅଞ୍ଚଳରେ ଭୟଙ୍କର ଭୂସ୍ଖଳନ ହୋଇଥିବା ଖବର ସାମ୍ନାକୁ ଆସିଛି। ଏହି କାରଣ ଯୋଗୁ ଚୀନ୍‌ ସୀମାବର୍ତ୍ତୀ ଅଞ୍ଚଳ ସହିତ ଯୋଗାଯୋଗ ନଷ୍ଟ ହୋଇଯାଇଛି। ଏଥିରେ ଦିବ୍ୟାଙ୍ଗ ଉପତ୍ୟକା ମଧ୍ୟ ସାମିଲ ଅଛି।

ଜଣେ ଅଧିକାରୀଙ୍କ କହିବାନୁସାରେ, ଗତ କିଛି ଦିନ ହେବ ସଂପୃକ୍ତ ଅଞ୍ଚଳରେ ପ୍ରବଳ ବର୍ଷା ହୋଇଛି। ଏହି କାରଣରୁ ଅନେକ ସ୍ଥାନରେ ଭୂସ୍ଖଳନ ଘଟିଛି। ଏଥିଯୋଗୁ ଜାତୀୟ ରାଜପଥ -୩୩ ପ୍ରଭାବିତ ହୋଇଛି। ଜାତୀୟ ରାଜପଥ -୩୩ରେ ହନଲି ଏବଂ ଅନିନୀଙ୍କ ମଧ୍ୟରେ ପ୍ରବଳ ଭୂସ୍ଖଳନ ହେବାର ସୂଚନା ମିଳିଛି।

ଜାତୀୟ ରାଜପଥ ଏବଂ ଭିତ୍ତିଭୂମି ବିକାଶ ନିଗମ ଲିମିଟେଡ୍ (NHIDCL) ରାଜପଥର କ୍ଷତିଗ୍ରସ୍ତ ଅଂଶଗୁଡିକର ମରାମତି କାର୍ଯ୍ୟ ଆରମ୍ଭ କରିଛି। କିନ୍ତୁ ଲଗାତାର ବର୍ଷା ହେତୁ ମରାମତି ବେଳେ ଅନେକ ସମସ୍ୟାର ସମ୍ମୁଖୀନ ହେବାକୁ ପଡୁଛି। ପ୍ରଶାସନର କହିବା ଅନୁଯାୟୀ, ପରିସ୍ଥିତି ସ୍ୱାଭାବିକ ହେବା ପାଇଁ ଅତି କମରେ ତିନି ଦିନ ଲାଗିବ।

ଅନ୍ୟପଟେ ପ୍ରବଳ ଭୂସ୍ଖଳନକୁ ଦୃଷ୍ଟିରେ ରଖି ରାଜ୍ୟ ସରକାର ଏହି ଅଞ୍ଚଳ ପରିଦର୍ଶନ କରିବାକୁ ଆସୁଥିବା ଲୋକଙ୍କ ପାଇଁ ଟ୍ରାଭେଲ ଆଡଭାଇଜରୀ ଜାରି କରିଛନ୍ତି। କହିରଖୁ ଯେ, ଜାତୀୟ ରାଜପଥ NH-33 ସ୍ଥାନୀୟ ଲୋକଙ୍କ ସମେତ ସେନା ପାଇଁ ମଧ୍ୟ ବେଶ୍‌ ମହତ୍ତ୍ୱ ରଖେ। କାରଣ ଏହା ଚୀନ୍‌ ସୀମାକୁ ସଂଯୋଗ କରୁଥିବା ରାସ୍ତା ଅଟେ।