ଥରେ କାମୁଡ଼ିଲେ ୧୦ ଦିନ, ଦ୍ୱିତୀୟବାର କାମୁଡ଼ିଲେ ଆଜୀବନ

କୁକୁରଙ୍କୁ ମିଳିବ ଆଜୀବନ ଜେଲ୍‌ଦଣ୍ଡାଦେଶ। ଶୁଣି ଆଶ୍ଚର୍ଯ୍ୟ ଲାଗୁଛି କି? କିନ୍ତୁ କଥାଟି ସତ। ଉତ୍ତର ପ୍ରଦେଶ ସରକାର ଦେଇଛନ୍ତି ଏଭଳି କିଛି ନିର୍ଦ୍ଦେଶ।

ସେପ୍ଟେମ୍ବର ୧୦ ତାରିଖରେ ଉତ୍ତର ପ୍ରଦେଶର ପ୍ରମୁଖ ସଚିବ ଅମୃତ ଅଭିଜିତ ସମସ୍ତ ଗ୍ରାମ ପଞ୍ଜାୟତ, ଏନ୍‌ଏସି, ମ୍ୟୁନିସିପାଲିଟିକୁ ଏକ ଚିଠି ପଠାଇଛନ୍ତି। ସେଥିରେ ସ୍ପଷ୍ଟ ଭାବେ ଉଲ୍ଲେଖ କରାଯାଇଛି ଯେ ଯଦି ଗୋଟିଏ କୁକୁର ବିନା ଉସୁକାଇବାରେ କୌଣସି ମଣିଷକୁ କାମୁଡ଼େ, ତା’ହେଲେ ତାକୁ ୧୦ ଦିନ ପର୍ଯ୍ୟନ୍ତ ପ୍ରାଣୀ ଜନ୍ମ ନିୟନ୍ତ୍ରଣ କେନ୍ଦ୍ରରେ ରଖାଯିବ। ଯଦି ସେହି କୁକୁର ବିନା ଉସୁକାଇବାରେ ପୁଣି ଥରେ କାହାକୁ କାମୁଡ଼େ, ତା’ହେଲେ ତାକୁ ସାରା ଜୀବନ ପାଇଁ ପ୍ରାଣୀ ଜନ୍ମ ନିୟନ୍ତ୍ରଣ କେନ୍ଦ୍ରରେ ରଖାଯିବ। ଏଥିରୁ ବର୍ତ୍ତିବ ପାଇଁ ସେହି କୁକୁର ପାଖରେ କେବଳ ଗୋଟିଏ ବିକଳ୍ପ ରହିବ। ଯଦି କୌଣସି ବ୍ୟକ୍ତି ତାକୁ ଘରେ ରଖି ପାଳିବା ପାଇଁ ଚାହିଁବେ, ତା’ହେଲେ ସେହି କ୍ଷେତ୍ରରେ ତାକୁ ପ୍ରାଣୀ ଜନ୍ମ ନିୟନ୍ତ୍ରଣ କେନ୍ଦ୍ରରେ ରଖାଯିବ ନାହିଁ। କିନ୍ତୁ ସେହି କୁକୁରକୁ ପାଳିବା ପାଇଁ ଆଗ୍ରହୀ ଥିବା ବ୍ୟକ୍ତିଙ୍କୁ ଏଥିପାଇଁ ସତ୍ୟପାଠ ଦାଖଲ କରି ନିଶ୍ଚିତ କରିବାକୁ ପଡ଼ିବ ଯେ ସେ ସେହି କୁକୁରକୁ କଦାପି ବାହାରକୁ ବା ରାସ୍ତାକୁ ଛାଡ଼ିବେ ନାହିଁ। ଯଦି ଏହି ନିୟମ ଉଲ୍ଲଂଘନ କରିବେ, ତାଙ୍କ ବିରୋଧରେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ।

ଏହି ଚିଠିରେ ଆହୁରି ଉଲ୍ଲେଖ କରାଯାଇଛି ଯେ ଯଦି କୌଣସି ବ୍ୟକ୍ତି ବୁଲା କୁକୁର କାମୁଡ଼ିବା ପରେ ଆଣ୍ଟି-ରେବିଜ ଭ୍ୟାକ୍‌ସିନ ନିଅନ୍ତି, ତା’ହେଲେ ସେହି ଘଟଣାର ତଦନ୍ତ ହେବ। ସେହି କୁକୁରକୁ ନିକଟସ୍ଥ ପ୍ରାଣୀ ଜନ୍ମ ନିୟନ୍ତ୍ରଣ କେନ୍ଦ୍ରକୁ ନିଆଯିବ। ଯଦି ତାକୁ ପୂର୍ବରୁ ଟିକା ଦିଆଯାଇନଥିବ, ତା’ହେଲେ ଟିକା ଦିଆଯିବ। ସେହିପରି ଯଦି ପୂର୍ବରୁ ତା’ର ବନ୍ଧ୍ୟାକରଣ କରାଯାଇନଥିବ, ତା’ହେଲେ ସେହି କାର୍ଯ୍ୟ ସଂପାଦନ କରାଯିବ। ସେଠାରେ ତାକୁ ୧୦ ଦିନ ନିରୀକ୍ଷଣରେ ରଖାଯିବ ଓ ତା’ର ବ୍ୟବହାରକୁ ଲକ୍ଷ୍ୟ କରାଯିବ। ସେଠାରୁ ଛାଡ଼ିବା ପୂର୍ବରୁ ତା’ ଶରୀରରେ ଏକ ମାଇକ୍ରୋଚିପ୍ ଲଗାଯିବ, ଯାହା ତା’ ବିଷୟରେ ସବିଶେଷ ସୂଚନା ଦେଇପାରିବ ଓ ସେ କେଉଁ ସ୍ଥାନରେ ରହୁଛି, ତାହା ଚିହ୍ନଟ କରିହେବ। ଯଦି ସେହି କୁକୁର ବିନା ଉସୁକାଇବାରେ ପୁଣି କାହାକୁ କାମୁଡ଼େ, ତା’ହେଲେ ତାକୁ ପ୍ରାଣୀ ଜନ୍ମ ନିୟନ୍ତ୍ରଣ କେନ୍ଦ୍ରରେ ସାରା ଜୀବନ ରଖାଯିବ।

ତେବେ କୁକୁରଟିକୁ କେହି ଉସୁକାଇଛନ୍ତି ନା ନାହିଁ, କେମିତି ଜଣାପଡ଼ିବ? ଏହାର ଜବାବରେ ପ୍ରୟାଗରାଜ ପୌରପାଳିକାର ପ୍ରାଣୀ ଚିକିତ୍ସକ ଡାକ୍ତର ବିଜୟ ଅମୃତ ରାଜ କହିଛନ୍ତି ଯେ ଏଥିପାଇଁ ଏକ ୩ ଜଣିଆ କମିଟି ଗଠନ କରାଯିବ। କମିଟିରେ ଜଣେ ପ୍ରାଣୀ ଚିକିତ୍ସକ, ପ୍ରାଣୀମାନଙ୍କ ବ୍ୟବହାରକୁ ବୁଝି ପାରୁଥିବା ଜଣେ ବିଶେଷଜ୍ଞ ଓ ପୌରପାଳିକା ବା ଏନ୍‌ଏସିର ଜଣେ କର୍ମଚାରୀଙ୍କୁ ସାମିଲ କରାଯିବ। ସେମାନେ ଉକ୍ତ ଘଟଣାର ତଦନ୍ତ କରିବେ ଓ କୁକୁରଟିକୁ ଉସୁକାଯାଇଥିଲା ନା ନାହିଁ, ତାହା ନିର୍ଣ୍ଣୟ କରିବେ। ଯଦି କୌଣସି ବ୍ୟକ୍ତି ପଥର ଫିଙ୍ଗିବା ପରେ କୁକୁର ତାଙ୍କୁ କାମୁଡ଼ି ଥିବ, ତା’ହେଲେ, ତାହାକୁ ଉସୁକାଇବା ବର୍ଗରେ ହିସାବ କରାଯିବ।

ଦିଲ୍ଲୀ-ଏନସିଆରରେ ବୁଲୁ ଥିବା କୁକୁରମାନଙ୍କୁ ଧରି ତୁରନ୍ତ ଆଶ୍ରୟସ୍ଥଳକୁ ନେବାକୁ ସୁପ୍ରିମକୋର୍ଟ ଅଗଷ୍ଟ ୮ରେ ଏକ ରାୟ ଦେଇଥିଲେ। ଏହାକୁ ନେଇ ଦେଶରେ ବେଶ୍‌ ବିବାଦ ଓ ବିତର୍କ ହୋଇଥିଲା। ପରେ ଅଗଷ୍ଟ ୨୨ରେ ସୁପ୍ରିମକୋର୍ଟ ତାଙ୍କର ଏହି ରାୟରେ ସାମାନ୍ୟ ସଂଶୋଧନ କରିଥିଲେ। କୋର୍ଟ କହିଥିଲେ ଯେ ବୁଲା କୁକୁରମାନଙ୍କୁ ପୌର ପାଳିକାର ଅଧିକାରୀମାନେ ଧରି ଟିକା ଦେବା ସହ ସେମାନଙ୍କର ବନ୍ଧ୍ୟାକରଣ କରିବେ। ଏହାପରେ ସେମାନଙ୍କୁ ଯେଉଁ ସ୍ଥାନରୁ ଧରିଥିବେ, ସେଠାରେ ଛାଡ଼ିବେ। ଅନିର୍ଦ୍ଦିଷ୍ଟ କାଳ ପାଇଁ ବୁଲା କୁକୁରଙ୍କୁ ଆଶ୍ରୟ ସ୍ଥଳରେ ରଖାଯାଇ ପାରିବ ନାହିଁ। କିନ୍ତୁ ରୋଗ ଗ୍ରସ୍ତ ଓ କାମୁଡ଼ିବାକୁ ଗୋଡ଼ାଉଥିବା କୁକୁରମାନଙ୍କୁ ପୌର ପାଳିକା ସର୍ବସାଧାରଣରେ ଛାଡ଼ିବ ନାହିଁ। ସେମାନଙ୍କୁ ଆଶ୍ରୟସ୍ଥଳରେ ଅଲଗା ରଖାଯିବ।