ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି ସାଂଘାତିକ ଅଭିଯୋଗ ଆଣିଛନ୍ତି। ରାଜ୍ୟରେ ରହୁଥିବା ଅନୁସୂଚିତ ଜାତି, ଜନଜାତି ଓ ଅନ୍ୟ ପଛୁଆ ବର୍ଗର ଲୋକଙ୍କ ଆଧାର କାର୍ଡ ହଠାତ୍ ଅଚଳ ହୋଇଯାଉଛି। ଏହା ପ୍ରକୃତ ନ୍ୟାୟର ଘୋର ଉଲ୍ଲଙ୍ଘନ ବୋଲି ସେ ଚିଠିରେ ଅଭିଯୋଗ କରିଛନ୍ତି।
ମମତା ଲେଖିଛନ୍ତି ଯେ “ମୁଁ ଆପଣଙ୍କ ଧ୍ୟାନ ଆକର୍ଷଣ କରିବାକୁ ଚାହୁଁଛି ଯେ ହଠାତ୍ ଗୁରୁତର ପାତରଅନ୍ତର ଘଟଣା ବେଙ୍ଗଲରେ ଘଟୁଛି। ଲୋକଙ୍କ ଆଧାର କାର୍ଡ ଅଚଳ ହୋଇଯାଉଛି। ବିଶେଷ କରି ପଶ୍ଚିମବଙ୍ଗରେ ରହୁଥିବା ଅନୁସୂଚିତ ଜାତି, ଜନଜାତି ଓ ଅନ୍ୟ ପଛୁଆ ବର୍ଗର ଲୋକଙ୍କ ଆଧାର କାର୍ଡ ଡି-ଆକ୍ଟିଭେଟ ହୋଇଯାଇଛି। ପୂର୍ବରୁ କୌଣସି ସୂଚନା ନ ଦେଇ ଆଧାର କାର୍ଡଗୁଡ଼ିକ ଅଚଳ କରି ଦିଆଯାଇଛି।
ଆମେ ଜାଣିବାକୁ ପାଇଛୁ ଯେ ନୂଆଦିଲ୍ଲୀରେ ଥିବା UIDAIର ମୁଖ୍ୟାଳୟ କୌଣସି ଯାଞ୍ଚ କିମ୍ବା ଶୁଣାଣି ନ କରି କିମ୍ବା ରାଜ୍ୟ ସରକାରଙ୍କ ସହ ଆଲୋଚନା ନ କରି ସିଧାସଳଖ ଲୋକଙ୍କ ପାଖକୁ ଆଧାର କାର୍ଡ ଅଚଳ ହୋଇଯାଇଥିବା ନୋଟିସ ପଠାଇ ଦେଉଛି।
Also Read
ଏହାକୁ ଦେଖି ଲୋକମାନେ ଆଶ୍ଚର୍ଯ୍ୟ ହେବା ସହ କାରଣ ଜାଣିବା ପାଇଁ ରାଜ୍ୟ ପ୍ରଶାସନ ପାଖରେ ଭିଡ଼ ଲଗାଉଛନ୍ତି। ଲୋକମାନେ ଏପରି ଅଚଳ ଘଟଣାରେ ଭୟଭୀତ ହୋଇପଡ଼ିଛନ୍ତି। କୌଣସି କାରଣ ନଥାଇ ହଠାତ୍ ଆଧାର କାର୍ଡ ଅଚଳ କରିବା ପଛର କାରଣ ମୁଁ ଆପଣଙ୍କ ଠାରୁ ଜାଣିବାକୁ ଚାହୁଁଛି।”
ଦିଦି ଆହୁରି ଅଭିଯୋଗ କରିଛନ୍ତି ଯେ ଯୋଗ୍ୟ ହିତାଧିକାରୀଙ୍କୁ ବିଭିନ୍ନ ସାମାଜିକ କଲ୍ୟାଣକାରୀ ଯୋଜନାରୁ ବାଦ ଦେବା ପାଇଁ ଏହା ଏକ ଯୋଜନାବନ୍ଧ ଷଡ଼ଯନ୍ତ୍ର। ଚିଠି ଲେଖିବା ପୂର୍ବରୁ ମମତା ବାନାର୍ଜୀ ଏ ପ୍ରସଙ୍ଗରେ ମଧ୍ୟ ସାମ୍ବାଦିକ ସମ୍ମିଳନୀ କରିଥିଲେ। ସେ ବିଜେପି ନେତୃତ୍ୱାଧୀନ କେନ୍ଦ୍ର ସରକାରଙ୍କ ଉପରେ ଜୋରଦାର ବର୍ଷିଥିଲେ।
ସେ କହିଥିଲେ. “ଏକଦା କେନ୍ଦ୍ର ସରକାର ବିମୁଦ୍ରାକରଣକୁ ବ୍ୟବହାର କରି ଲୋକଙ୍କୁ ନିର୍ଯାତନା ଦେଇଥିଲେ। ଏହାପରେ ଲୋକଙ୍କ ପାଇଁ ଆଧାର କାର୍ଡ ବାଧ୍ୟତାମୂଳକ କରିଥିଲେ। କାର୍ଡ ତିଆରି କରିବା ପାଇଁ ଆପଣ ୧ ହଜାର ଟଙ୍କାର ଫି’ ବ୍ୟବସ୍ଥା କରିଥିଲେ। ଏହା ରାଜ୍ୟ ସରକାରଙ୍କ ହାତରେ ନଥିଲା। ଏହି ସବୁ କାର୍ଡ ଲୋକଙ୍କ ବ୍ୟାଙ୍କ ଆକାଉଣ୍ଟ ସହ ଲିଙ୍କ ରହିଛି। ଏବେ ଲୋକମାନେ କ’ଣ ସମସ୍ତ ପ୍ରକାରର ସରକାରୀ ଯୋଜନାରୁ ବଞ୍ଚିତ ହେବେ?”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
