ମଧ୍ୟ ପ୍ରଦେଶର ବେତୁଲ ଜିଲ୍ଲାର ବଜ୍ଜର୍ୱାଡା ଗାଁର ଜଣେ ବ୍ୟକ୍ତି ତାଙ୍କ ନବଜାତ ଶିଶୁପୁତ୍ରକୁ ମାରି ଦେଇଥିବା ଅଭିଯୋଗ ହୋଇଛି। ତେବେ ସେ ଏଭଳି ଏକ କାଣ୍ଡ ଭିଆଇବା ପଛର କାରଣ ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
ପୁଲିସ୍ କହିବା ମୁତାବକ, ଅଭିଯୁକ୍ତ ଅନୀଲ ଉଇକେଙ୍କର ୨ଟି ପୁଅ ଅଛନ୍ତି। ପତ୍ନୀ ତୃତୀୟ ଥର ଗର୍ଭବତୀ ହେବା ପରେ ଝିଅଟିଏ ହେବ ବୋଲି ସେ ଆଶା ରଖିଥିଲେ। କିନ୍ତୁ ପୁଣି ପୁଅ ହେବାରୁ ସେ ରାଗି ଯାଇଥିଲେ ଓ ଛୁଆଟିକୁ ମାରି ଦେଇଥିଲେ। ପଚରାଉଚରା ବେଳେ ଅଭିଯୁକ୍ତ ଏହି କଥା କହିଥିବା ପୁଲିସ କହିଛି।
ରବିବାର ସନ୍ଧ୍ୟାରେ ଏହି ଘଟଣା ଘଟିଥିଲା। ଅନୀଲ ଉଇକେ ମଦ ପିଇ ଘରକୁ ଆସିଥିଲେ। ସେ ତାଙ୍କ ପତ୍ନୀଙ୍କୁ ଗାଳିଗୁଲଜ କରିବା ସହିତ ମାଡ଼ ମାରିଥିଲେ ଓ ୧୨ ଦିନର ଶିଶୁ ପୁତ୍ରକୁ ତାଙ୍କ ଠାରୁ ଛଡ଼ାଇ ନେଇଥିଲେ। ଏହା ପରେ ଭୟରେ ଅନୀଲଙ୍କ ପତ୍ନୀ ସେଠାରୁ ଦୌଡ଼ି ପଳାଇଥିଲେ। କିଛି ସମୟ ପରେ ତାଙ୍କ ପତ୍ନୀ ଘରକୁ ଫେରିଥିଲେ। ସେତେବେଳେ ତାଙ୍କ ନବଜାତ ଶିଶୁପୁତ୍ର ଅଚେତ ହୋଇ ପଡ଼ିଥିବା ସେ ଦେଖିବାକୁ ପାଇଥିଲେ। ପରେ ଶିଶୁଟି ମରି ଯାଇଥିବା ଜଣାପଡ଼ିଥିଲା।
Also Read
କୋତୱାଲି ପୁଲିସ୍ କହିଛି ଯେ ତଣ୍ଟି ଚିପି ଶିଶୁଟିକୁ ହତ୍ୟା କରାଯାଇଥିଲା। ଶିଶୁଟିର ବେକରେ ଦାଗ ସ୍ପଷ୍ଟ ଭାବେ ଦେଖାଯାଉଥିଲା। ଏହି କାଣ୍ଡ ଭିଆଇବା ବେଳେ ଅଭିଯୁକ୍ତ ନିଶାରେ ଥିଲେ ବୋଲି ପୁଲିସ କହିଛି।
ଅଭିଯୋଗ ପାଇବା ପରେ ପୁଲିସ୍ ମାମଲା ରୁଜୁ କରି ଅନୀଲ ଉଇକେଙ୍କୁ ଗିରଫ କରିଥିଲା। ପଚରାଉଚରା ବେଳେ ଅଭିଯୁକ୍ତ ଦୋଷ ସ୍ୱୀକାର କରିଥିବା ପୁଲିସ୍ କହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
