ଖଟ୍ଟର ସରକାରଙ୍କ ବଡ଼ ଘୋଷଣା; କୃଷି ଋଣ ଉପରୁ କଲେ ସୁଧ ଛାଡ଼

ଖଟ୍ଟର ସରକାର ଆଜି ବଜେଟ ଆଗତ କରି କହିଛନ୍ତି, କୃଷି ନୀତି ଅନୁଯାୟୀ ଋଣ ନେଇଥିବା ରାଜ୍ୟର ସବୁ କୃଷକଙ୍କ ଉପରୁ ସୁଧ ଛାଡ଼ କରାଯିବ ।

Haryana CM

ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ।

Niharika Rout
  • Published: Friday, 23 February 2024
  • Updated: 23 February 2024, 01:31 PM IST

ଏମଏସ୍‌ପି ଗ୍ୟାରେଣ୍ଟି ଦାବିରେ ଶମ୍ଭୁ ବର୍ଡର ଓ ଖାନାଉରି ବର୍ଡରରେ ହଜାର ହଜାର ସଂଖ୍ୟାରେ ଚାଷୀ ଜୋରଦାର ଆନ୍ଦୋଳନ ଚଳାଇଛନ୍ତି। ଦାବି ପୂରଣ ନ ହେଲା ଯାଏ ପଛକୁ ହଟିବାର ପ୍ରଶ୍ନ ଉଠୁନି ବୋଲି ବି ସଫା ସଫା ଶୁଣାଇ ଦେଇଛନ୍ତି। ଏପରି ସମୟରେ ରାଜ୍ୟ ବଜେଟରେ ଚାଷୀଙ୍କ ପ୍ରତି କୋହଳ ମନୋଭାବ ପୋଷଣ କରିଛନ୍ତି ହରିୟାଣାର ମନୋହର ଲାଲ ଖଟ୍ଟର ସରକାର।

ଖଟ୍ଟର ସରକାର ଆଜି ବଜେଟ ଆଗତ କରି କହିଛନ୍ତି, କୃଷି ନୀତି ଅନୁଯାୟୀ ଋଣ ନେଇଥିବା ରାଜ୍ୟର ସବୁ କୃଷକଙ୍କ ଉପରୁ ସୁଧ ଛାଡ଼ କରାଯିବ । ସେପ୍ଟେମ୍ବର ୨୦୨୩ ପର୍ଯ୍ୟନ୍ତ ଚାଷୀମାନେ କରିଥିବା କୃଷି ଋଣ ଉପରୁ ସୁଧ ଛାଡ଼ କରାଯିବ । ଏହାବାଦ ଚାଷୀଙ୍କ ଉପରେ ଲାଗିଥିବା ଜରିମାନାକୁ ବି ଛାଡ଼ କରିଛନ୍ତି ଖଟ୍ଟର ସରକାର। ଚଳିତ ବର୍ଷ ମେ’ ମାସ ପର୍ଯ୍ୟନ୍ତ ଚାଷୀମାନେ ଏହି ସୁବିଧା ପାଇପାରିବେ। ଏହାପରେ କିନ୍ତୁ ନୂଆ ଭାବେ ଲାଗିବାକୁ ଥିବା ଋଣ ଓ ଜରିମାନା ଅର୍ଥ ଦେବାକୁ ପଡ଼ିବ ।

ଚାଷୀମାନେ ମୁଖ୍ୟତଃ ଏମଏସ୍‌ପି ଗ୍ୟାରେଣ୍ଟି ଦାବିରେ ଏହି ଆନ୍ଦୋଳନ ଚଳାଇଥିବା ବେଳେ ସେମାନଙ୍କୁ ସୁହାଇଲା ପରି ଘୋଷଣା କରିଛନ୍ତି ଖଟ୍ଟର ସରକାର । ଲଗାତର ଭାବେ ପଞ୍ଚମ ଥର ପାଇଁ ବଜେଟ ଆଗତ କରିଥିବା ମନୋହର ଖଟ୍ଟର କହିଛନ୍ତି, ରାଜ୍ୟ ସରକାର ଚଳିତ ବର୍ଷ ୧୪ ପ୍ରକାର ଫସଲକୁ ଏମଏସ୍‌ପିରେ କିଣିବେ।

Also Read

ଏଥିସହ ହରିୟାଣା ସରକାର ଏକ ଅନଲାଇନ୍‌ ପୋର୍ଟାଲର ଶୁଭାରମ୍ଭ କରିଛନ୍ତି। ଚାଷୀମାନେ ନିଜ ଫସଲ ନଷ୍ଟ ସମ୍ପର୍କୀତ ତଥ୍ୟ ଏହି ପୋର୍ଟାଲରେ ଅପଲୋଡ୍‌ କରି ପାରିବେ। ଏଯାବତ ଫସଲ ନଷ୍ଟ ବାବଦକୁ ହରିୟାଣା ସରକାର ୨୯୭ କୋଟି ଟଙ୍କା ଆର୍ଥିକ ସହାୟତା ଦେଇ ସାରିଥିବା କହିଛନ୍ତି।

ଇତି ମଧ୍ୟରେ ଚାଷୀ ଆନ୍ଦୋଳନକୁ ନେଇ କଠୋର ଆଭିମୁଖ୍ୟ ପୋଷଣ କରି ନାହାନ୍ତି ଖଟ୍ଟର ସରକାର। ଚାଷୀ ଆନ୍ଦୋଳରେ ହିଂସାକାଣ୍ଡ ଘଟାଉଥିବା ବ୍ୟକ୍ତିଙ୍କ ବିରୋଧରେ ରାଷ୍ଟ୍ରୀୟ ସୁରକ୍ଷା ଆଇନ୍‌ ଲାଗୁ କରିବାକୁ କୁହାଯାଇଥିଲା। ମାତ୍ର ଏବେ ଏପରି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବନି ବୋଲି   ସୂଚନା ଦିଆଯାଇଛି। ଏଥିସହ କୌଣସି ହିଂସା ନ ଘଟାଇବାକୁ ବି ଚାଷୀମାନଙ୍କୁ ଅପିଲ୍‌ କରାଯାଇଛି।

ଦିଲ୍ଲୀମୁହାଁ ହଜାର ହଜାର ଚାଷୀଙ୍କୁ ହରିୟାଣା ପୁଲିସ୍‌ ଶମ୍ଭୁ ବର୍ଡର ଓ ଖାନାଉରି ବର୍ଡରରେ ଅଟକାଇ ରଖିଛି। ଏପରି ସମୟରେ ଖାନାଉରି ସୀମାରେ ଆନ୍ଦୋଳନକାରୀ ଚାଷୀ ଶୁଭକରଣ ସିଂଙ୍କ ମୃତ୍ୟୁ ହୋଇ ଯାଇଛି। ପଞ୍ଜାବ ସରକାର ମୃତକଙ୍କ ପରିବାରକୁ ୧ କୋଟିର ସହାୟତା ରାଶି ଘୋଷଣା କରିଛନ୍ତି।

telegram ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।

Related Stories

Trending

Photos

Videos