ସ୍ୱାମୀଙ୍କ ଉପରେ ଥିଲା ପ୍ରବଳ ରାଗ । ଦାମ୍ପତ୍ୟ ଜୀବନ ଠିକ୍ ଭାବେ ଚାଲୁ ନ ଥିବା ବେଳେ ଆର୍ଥିକ ସମସ୍ୟା ବି ଲାଗି ରହୁଥିଲା। ଏଥିରେ ଉତ୍କ୍ଷିପ୍ତ ରହୁଥିବା ମହିଳାଜଣକ ନିଜ ରାଗ କିନ୍ତୁ ନିରୀହ ଛୁଆ ଉପରେ ଶୁଝାଇଲେ। ଏପରି ଏକ ଘଟଣା ଉତ୍ତରାଖଣ୍ଡର ହରିଦ୍ୱାରରେ ଘଟିଥିବା ବେଳେ ତାହା ଏବେ ସୋଶାଲ ମିଡିଆରେ ଖୁବ୍ ଭାଇରାଲ ହେଉଛି।
ଭିଡିଓରେ ଦେଖିବାକୁ ମିଳୁଛି, ମହିଳାଜଣକ ନିଜ ୧୧ ବର୍ଷର ପୁଅର ଛାତି ଉପରେ ବସି ତା’ ଦୁଇ ହାତକୁ ଧରି ନିର୍ଧୂମ ଚାପୁଡ଼ା, ବିଧା ମାରୁଛନ୍ତି। ଛାଡ଼ିଦେବାକୁ ପିଲାଟି କାକୁତିମିନତି ହେଲେ ବି ମା’ ହୃଦୟ ତରଳୁନି। ଏଥିରେ ମନ ଶାନ୍ତି ନ ହେବାରୁ ସେ ପିଲାଟିକୁ କାମୁଡ଼ିବାକୁ ବି ପଛାଉ ନାହାନ୍ତି। ଆଉ ନିଜ ବଡ଼ ପୁଅ ଦ୍ୱାରା ଏହାର ଭିଡିଓ କରି ମହିଳାଜଣକ ସ୍ୱାମୀଙ୍କ ନିକଟକୁ ପଠାଇଥିଲେ। ମାତ୍ର ମହିଳାଙ୍କ ସ୍ୱାମୀ ଏହି ଭିଡିଓକୁ ଭାଇରାଲ କରିଦେବାରୁ କଥା ସାମନାକୁ ଆସିଛି।
ପୁଲିସ୍ ଏହି ଘଟଣାର ଖୋଳତାଡ଼ କରି କହିଛି, ଏହି ଭିଡିଓଟି ଦୁଇ ମାସ ତଳର। ମହିଳାଙ୍କର ଗତ ୧୦ ବର୍ଷ ହେବ ସ୍ୱାମୀଙ୍କ ସହ ବିବାଦ ଚାଲିଛି। ତାଙ୍କ ସ୍ୱାମୀ ଏକ କପଡ଼ା ଦୋକାନରେ କାମ କରୁଥିବା ବେଳେ ଘରକୁ ଟଙ୍କା ଦେଉ ନାହାନ୍ତି। ଫଳରେ ଘର ଚଳାଇବା ନିମନ୍ତେ ମହିଳାଜଣକ ସବୁବେଳେ ଚିନ୍ତାରେ ରହୁଛନ୍ତି। ତେଣୁ ନିଜ ସ୍ୱାମୀଙ୍କୁ ଡରାଇବା ନିମନ୍ତେ ଏପରି ଭିଡିଓ କରି ସେ ଛାଡ଼ିଥିବା କହିଛନ୍ତି।
Also Read
ଏହି ଘଟଣା ଦେଇ ହରିଦ୍ୱାରର ଚାଇଲ୍ଡ ହେଲପ ଲାଇନ୍ ପକ୍ଷରୁ ମହିଳା ଓ ତାଙ୍କ ପୁଅଙ୍କୁ ଡାକି କାଉନସିଲିଂ କରାଯାଇଛି । ଏଥିସହ CWC ଅଧିକାରୀ ମଝିରେ ମଝିରେ ମହିଳାଙ୍କ ଘରକୁ ଯାଇ ପିଲାଙ୍କ କଥା ବୁଝିବେ ବୋଲି କହିଛନ୍ତି। ଏଥିସହ ମହିଳାଙ୍କୁ ଫୋନ୍ କରି ପିଲାଙ୍କ ସହ କଥା ହେବେ ବୋଲି କୁହାଯାଇଛି। ଏପରି ଘଟଣାର ପୁନରାବୃତ୍ତି ହେଲେ ମହିଳାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦିଆଯାଇଛି।
ମହିଳାଜଣକ ନିଜ ପକ୍ଷ ରଖି କହିଛନ୍ତି, ମୁଁ କେବଳ ମୋ’ ସ୍ୱାମୀଙ୍କୁ ଡରାଇବା ନିମନ୍ତେ ଏପରି ଭିଡିଓ କରି ଛାଡ଼ିଥିଲି। ମାତ୍ର ପିଲାକୁ ଆଘାତ ପହଞ୍ଚାଇବା ମୋ’ ଉଦ୍ଦେଶ୍ୟ ନ ଥିଲା ବୋଲି ସେ କହିଛନ୍ତି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
