ମେଡିକାଲ ପ୍ରବେଶିକା ବା NEET-UG ପରୀକ୍ଷା ପ୍ରଶ୍ନପତ୍ର ଲିକ୍ ଓ ବ୍ୟାପକ ଅନିୟମିତତାକୁ ନେଇ ଦେଶ ଭରି ବିବାଦ ଲାଗି ରହିଛି। ଏହାକୁ ନେଇ ଦେଶର ଶିକ୍ଷା ବ୍ୟବସ୍ଥା ଉପରେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ଏହାରି ମଧ୍ୟରେ ପୂର୍ବରୁ ପ୍ରଶ୍ନପତ୍ର ଲିକ୍ କରି ଗିରଫ ହୋଇଥିବା ଜଣେ ବ୍ୟକ୍ତି NEET-UG ପେପର୍ ଲିକକୁ ନେଇ କରିଥିବା ପୂର୍ବାନୁମାନର ଏକ ଭିଡିଓ ଭାଇରାଲ୍ ହେଉଛି।
ଏହି ବ୍ୟକ୍ତି ଜଣକ ହେଉଛନ୍ତି ବିଜେନ୍ଦର ଗୁପ୍ତା। ସେ ଏକାଧିକ ରାଜ୍ୟ ସରକାର ନିଯୁକ୍ତି ପରୀକ୍ଷାରେ ପେପର୍ ଲିକ୍ କରି ଗିରଫ ହୋଇଥିଲେ। ୨୦୨୩ ଓଡିଶା କର୍ମଚାରୀ ଚୟନ ଆୟୋଗ (ଓଏସଏସସି), ବିହାର ଜନସେବା ଆୟୋଗ ଏବଂ ମଧ୍ୟପ୍ରଦେଶ ଜନସେବା ଆୟୋଗ ପ୍ରଶ୍ନପତ୍ର ଲିକ୍ ମାମଲାରେ ଜଡିତ ଥିଲେ।
ବିଜେନ୍ଦର ମାର୍ଚ୍ଚରେ NEET-UG ପ୍ରଶ୍ନପତ୍ର ଲିକ୍ ହେବ ବୋଲି ଦାବି କରି ଏକ ଭିଡିଓ ପୋଷ୍ଟ କରିଥିଲେ, ଯାହା ଏବେ ଭାଇରାଲ୍ ହେଉଛି। ନିକଟରେ ଏକ ଜାତୀୟ ଗଣମାଧ୍ୟମ ସଂସ୍ଥା ବିଜେନ୍ଦରଙ୍କଠୁ ପ୍ରଶ୍ନପତ୍ର ଲିକ୍ ପଛରେ ଥିବା ଅନ୍ଧାରୀ କାହାଣୀ ବିଷୟରେ ସମ୍ପୂର୍ଣ୍ଣ ତଥ୍ୟ ପଚାରି ବୁଝିଛି।
ସେ କହିଛନ୍ତି ଯେ, NEET-UG ପ୍ରଶ୍ନପତ୍ର ଲିକ୍ ୭୦୦ ଛାତ୍ରଛାତ୍ରୀଙ୍କୁ ଟାର୍ଗେଟ କରି ହୋଇଛି ଏବଂ ଏହି ରାକେଟ୍ ୨୦୦-୩୦୦ କୋଟି ଟଙ୍କା ଲକ୍ଷ୍ୟ ରଖିଥିଲା। କେବଳ ଏତିକି ନୁହେଁ, ରାସ୍ତାରେ ନେବା ସମୟରେ କିପରି ପ୍ରଶ୍ନ ବାକ୍ସ ଭଙ୍ଗାଯାଏ ଏବଂ କଳା ତାଲିକାଭୁକ୍ତ କମ୍ପାନୀଗୁଡିକ କିପରି ଟେଣ୍ଡର ପରିଚାଳନା କରନ୍ତି ସେ ବିଷୟରେ ବ୍ୟାଖ୍ୟା କରିଛନ୍ତି। ସେ ମଧ୍ୟ NEET ପ୍ରଶ୍ନପତ୍ର ଲିକର ମୁଖ୍ୟ ଅଭିଯୁକ୍ତ ସଞ୍ଜିବ ମୁଖିଆ ଏବଂ ଗିରଫ ହୋଇଥିବା ବିଶାଲ ଚୌରାସିଆଙ୍କୁ ଜାଣିଥିବା କହିଛନ୍ତି।
ପରିବହନ ସମୟରେ କିପରି ପ୍ରଶ୍ନପତ୍ର ଲିକ୍ ହୁଏ, ସେ ବାବଦରେ ବିଜେନ୍ଦର କହିଛନ୍ତି ଯେ, ଯେତେବେଳେ ଲଜିଷ୍ଟିକ୍ କମ୍ପାନୀଗୁଡିକ ପ୍ରଶ୍ନପତ୍ରକୁ ବିଭିନ୍ନ ପରୀକ୍ଷା କେନ୍ଦ୍ରକୁ ପରିବହନ କରନ୍ତି ସେତେବେଳେ ପ୍ରଶ୍ନ ବାକ୍ସ ଭଙ୍ଗା ଯାଇଥାଏ। ସେହିପରି ଲିକ୍ ପାଇଁ ଏକାଧିକ ପଦ୍ଧତି ଗ୍ରହଣ କରାଯାଏ, ଯେପରି ସରକାରୀ ସୂଚନା ଜାଣିଥିବା ବ୍ୟକ୍ତି, ପ୍ରଶ୍ନପତ୍ର ଛାପା ଯାଉଥିବା ପ୍ରିଣ୍ଟିଂ କେନ୍ଦ୍ର ଇତ୍ୟାଦି।
ସେ କିପରି ପେପର୍ ଲିକରେ ଜଡିତ ହେଲେ ପ୍ରଶ୍ନରେ ବିଜେନ୍ଦର କହିଛନ୍ତି, "ଆପଣ ଭାରତର ସବୁଠୁ ବଡ଼ ପେପର୍ ଲିକ୍ ମାଫିଆ, ବେଦୀ ରାମଙ୍କ ବିଷୟରେ ଶୁଣିଛନ୍ତି କି? ସେ ଏବେ ତ୍ତରପ୍ରଦେଶର ଜଉନପୁରର ଜଣେ ବିଧାୟକ। ଜଉନପୁରରେ ହୋଇଥିବା ପେପର୍ ଲିକ୍ ସମୟରେ ମୁଁ ତାଙ୍କ ଆସିଷ୍ଟାଣ୍ଟ ଥିଲି। ଏହି ସମୟରେ ଜଣେ ଛାତ୍ରଙ୍କୁ ଚାକିରି ପାଇବାରେ ସାହାଯ୍ୟ କରିବା ପାଇଁ ପ୍ରଶ୍ନପତ୍ର ଲିକ୍ କରାଯାଇଥିଲା। ଏହି ସମୟରେ ମୁଁ ଜେଲ୍ ଯାଇଥିଲି।"
ପେପର୍ ଲିକ୍ ମାଫିଆମାନେ ଜେଲ୍ ଯାଆନ୍ତି ପୁଣି କଣ କରନ୍ତି ବୋଲି ପ୍ରଶ୍ନରେ ବିଜେନ୍ଦର କହିଛନ୍ତି, ଜେଲ୍ ଯାଆନ୍ତି, ପୁଣି ବେଲ୍, ତା ପରେ ଆରମ୍ଭ ହୁଏ ଖେଳ। NEET-UG ପେପର୍ ଲିକ୍ ହେବ ବୋଲି ପୂର୍ବାନୁମାନ କରୁଥିବା ଭିଡିଓ ପରେ ତାଙ୍କୁ କଲ ଆସିଛି କି ବୋଲି ପଚରାଯିବାରୁ ଗୁପ୍ତା କହିଛନ୍ତି ଯେ, ତାଙ୍କ ନମ୍ବର କାହାରି ପାଖରେ ନାହିଁ।
କିଛି ଭୁଲ୍ ହେଲେ ସବୁ କଥା ସାମ୍ନାକୁ ଆସେ, ଯାହା NEET ପେପର୍ ଲିକରେ ଘଟିଛି। ଅର୍ଥନୈତିକ ଅଫେନ୍ସ ୟୁନିଟ୍ ଦ୍ୱାରା ଅନୁସନ୍ଧାନ ଠିକ୍ ଦିଗରେ ଅଛି। ଏନଟିଆର ଏହା ବୁଝିପାରିବ ନାହିଁ ବୋଲି ବିଜେନ୍ଦର କହିଛନ୍ତି।