ବିହାର ପୁଲିସ୍ର ଗୋଟିଏ କାର୍ଯ୍ୟକ୍ରମରେ ଘଟିଛି ନାଟକୀୟ ଘଟଣା। ମଞ୍ଚ ଉପରେ ଭାଷଣ ଦେଉଥିବା ବେଳେ ମୁଖ୍ୟମନ୍ତ୍ରୀ ନୀତୀଶ କୁମାର ରାଜ୍ୟର ପୁଲିସ୍ ମୁଖିଆ ଅଲୋକ ରାଜଙ୍କୁ ହାତ ଯୋଡ଼ି କରିଛନ୍ତି ବଡ଼ ଅନୁରୋଧ। ପୁଲିସ୍ କର୍ମଚାରୀଙ୍କ ନିଯୁକ୍ତି ପ୍ରକ୍ରିୟାକୁ ତ୍ୱାରାନ୍ୱିତ କରିବାକୁ ସେ ହାତ ଯୋଡ଼ି ନିବେଦନ କରିଛନ୍ତି। ଏହାର ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି।
୧୨୩୯ ଜଣ ନୂଆ ପୁଲିସ୍ କର୍ମଚାରୀଙ୍କୁ ନିଯୁକ୍ତିପତ୍ର ଦେବାକୁ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନୀତୀଶ କୁମାର ଯୋଗ ଦେଇଥିଲେ। ସେ ନିଯୁକ୍ତିପତ୍ର ବାଣ୍ଟିବା ପରେ ଭାଷଣ ଦେଇଥିଲେ। ଭାଷଣ ଦେଉଥିବା ବେଳେ ସେ ଅଧାରୁ ଅଟକି ଷ୍ଟେଜ ଉପରେ ବସିଥିବା ବିହାର ଡିଜିପି ଆଲୋକ ରାଜଙ୍କୁ ଚାହିଁଥିଲେ। ଏହାପରେ ତାଙ୍କୁ ହାତ ଯୋଡ଼ି ଅଧିକରୁ ଅଧିକ ନିଯୁକ୍ତି ଶୀଘ୍ର କରିବାକୁ ଅନୁରୋଧ କରିଥିଲେ।
Also Read
ଏହା ଶୁଣି ଡିଜିପି ଆଲୋକ ରାଜ ଆଶ୍ଚର୍ଯ୍ୟ ହୋଇ ଯାଇଥିଲେ। ସେ ନିଜ ଆସନରୁ ଉଠି ମୁଖ୍ୟମନ୍ତ୍ରୀଙ୍କୁ ସାଲ୍ୟୁଟ ମାରିଥିଲେ। କିନ୍ତୁ କହିଥିଲେ, “ମୋତେ କୁହନ୍ତୁ, ଆପଣ ଏସବୁ କାମ ଶୀଘ୍ର କରିବେ।”
ଡିଜିପି ମଞ୍ଚର ଆଉ ଏକ ସ୍ଥାନରେ ଲାଗିଥିବା ମାଇକ ପାଖକୁ ଯାଇଥିଲେ। ସେଠାରେ ସେ କହିଥିଲେ ଯେ “ବିହାର ପୁଲିସ୍ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପାଳନ କରିବାକୁ ପ୍ରତିଶ୍ରୁତିବଦ୍ଧ। ଆମେ ଶୀଘ୍ର ନିଯୁକ୍ତି ଓ ତାଲିମ ପ୍ରକ୍ରିୟାକୁ ନିଶ୍ଚିତ କରିବୁ।” ଏହାର ଜବାବରେ ମୁଖ୍ୟମନ୍ତ୍ରୀ ତାଙ୍କୁ ଧନ୍ୟବାଦ ଦେଇଥିଲେ।
ଆସନ୍ତା ବର୍ଷ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଥିବ ବେଳେ ବିରୋଧୀ ବାରମ୍ବାର ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ ଉଠାଉଛନ୍ତି। ଏହାକୁ ନେଇ ନୀତୀଶ କୁମାରଙ୍କ ଜେଡିୟୁ ଓ ବିଜେପି ମିଳିତ ଭାବେ କରିଥିବା ସରକାର ବ୍ୟାକଫୁଟରେ ରହୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
