ANI 
ଆଗକୁ କର୍ଣ୍ଣାଟକ ବିଧାନସଭା ନିର୍ବାଚନ ରହିଛି। ପ୍ରଚାର ପାଇଁ ସବୁ ଦଳ ତତ୍ପର ହେଉଥିବା ବେଳେ ଆସନ୍ତା ମାର୍ଚ୍ଚ ୧୨ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କର୍ଣ୍ଣାଟକର ମାଣ୍ଡିଆ ଏବଂ ହୁବୁଲି-ଧରୱାଡ ଜିଲ୍ଲା ଗସ୍ତରେ ଯିବେ। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଯୋଶୀ ରବିବାର ଏହା କହିଛନ୍ତି। ପ୍ରଧାନମନ୍ତ୍ରୀ ମାଣ୍ଡ୍ୟ ଜିଲ୍ଲାର ମଦୁରରେ ଏକ କାର୍ଯ୍ୟକ୍ରମରେ ଯୋଗଦେବେ। ପରେ ଦିନ ୨ଟା ସୁଦ୍ଧା ହୁବୁଳିରେ ପହଞ୍ଚି ଆଇଆଇଟି ଧରୱାଡର ଉଦଘାଟନ କରିବେ ବୋଲି ଶ୍ରୀ ଯୋଶୀ କହିଛନ୍ତି। ସାମ୍ବାଦିକମାନଙ୍କ ସହ ଅଲୋଚନା କରି ସେ କହିଛନ୍ତି ଯେ, ଏହି ଗସ୍ତ ସମ୍ପର୍କରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ସ୍ପଷ୍ଟ କରାଯାଇଛି। ମଦୁରରେ ଏକ ବୃହତ ଜନ ସଭାକୁ ମୋଦି ସମ୍ବୋଧିତ କରିବେ। ଆଗାମୀ ନିର୍ବାଚନରେ ମଦୁର ଅଞ୍ଚଳରେ ବିଜେପି ଅଧିକ ଆସନ ଜିତିବା ଉପରେ ଧ୍ୟାନ ଦେଉଛି ।
କାରଣ ଏହି ଅଞ୍ଚଳରେ ବିଜେପି ଦୁର୍ବଳ ବୋଲି ବିବେଚନା କରାଯାଉଛି। ମାଣ୍ଡ୍ୟ ଅଞ୍ଚଳରେ ବିଜେପିକୁ ଅଧିକ ଶକ୍ତିଶାଳୀ କରିବାକୁ ପଡ଼ିବ ବୋଲି ଯୋଶୀ ଦର୍ଶାଇଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ମୋଦୀଙ୍କ ନେତୃତ୍ୱରେ ରାଜ୍ୟରେ ବିଜେପି ସପକ୍ଷରେ ହିଁ ମତ ରହିବ। ଦଳ ଆରାମରେ ଏକକ ସଂଖ୍ୟାଗରିଷ୍ଠତା ହାସଲ କରି ଜିତିବ।
ପ୍ରଧାନମନ୍ତ୍ରୀ ମୋଦୀ ଗତ ଫେବୃଆରୀ ୨୭ ରେ ଶିବାମୋଗଗା ବିମାନବନ୍ଦର ଉଦଘାଟନ ଏବଂ ବେଲାଗାଭିରେ ବିଭିନ୍ନ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ। ସୂଚନା ଅନୁଯାୟୀ, ଚଳିତ ବର୍ଷ ଆରମ୍ଭରୁ ପ୍ରଧାନମନ୍ତ୍ରୀ ମୋଦି ବିଭିନ୍ନ ରାଜ୍ୟକୁ ବାରମ୍ବାର ଗସ୍ତ କରି ଭିତ୍ତିପ୍ରସ୍ତର ସ୍ଥାପନ କିମ୍ବା ବିଭିନ୍ନ ପ୍ରକଳ୍ପର ଶିଳାନ୍ୟାସ କରୁଛନ୍ତି। ଏଥିସହ ସେ କ୍ରମାଗତ ସାଧାରଣ ସଭାକୁ ସମ୍ବୋଧିତ କରୁଛନ୍ତି। କର୍ଣ୍ଣାଟକରେ ଆସନ୍ତା ମେ ମାସରେ ନିର୍ବାଚନ ରହିଛି। ତେଣୁ ସେ କର୍ଣ୍ଣାଟକ ଗସ୍ତ କରୁଥିବା କୁହାଯାଉଛି।
Also Read
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
