ଦେଶରେ ହ୍ରାସ ପାଇଛି ଗରିବି। ପୂର୍ବ ଅପେକ୍ଷା ଦେଶରେ ଦାରିଦ୍ର୍ୟତା ପାଞ୍ଚ ପ୍ରତିଶତ ହ୍ରାସ ପାଇଥିବା ନିତି ଆୟୋଗ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ବି.ଭି.ଆର ସୁବ୍ରମଣ୍ୟମ କହିଛନ୍ତି। ସଦ୍ୟତମ ଘରୋଇ ଖର୍ଚ୍ଚ ବ୍ୟୟ ସର୍ବେକ୍ଷଣ (HCES)ରେ ଏହି ରିପୋର୍ଟ ଦର୍ଶାଯାଇଛି।
ଅଗଷ୍ଟ ୨୦୨୨ରୁ ଜୁଲାଇ ୨୦୨୩ ମଧ୍ୟରେ କରାଯାଇଥିବା ଏହି ସର୍ଭେରେ ଘରୋଇ ଉପଯୋଗ ବିଷୟରେ ସୂଚନା ଦିଆଯାଇଛି। ଏଥିରେ ଦାରିଦ୍ର୍ୟ ସ୍ତର ଏବଂ ସରକାରଙ୍କ ଦ୍ୱାରା କାର୍ଯ୍ୟକାରୀ ହୋଇଥିବା ଦାରିଦ୍ର୍ୟ ଦୂରୀକରଣ ପଦକ୍ଷେପଗୁଡ଼ିକର କାର୍ଯ୍ୟକାରିତା ଉପରେ ଆଲୋକପାତ କରାଯାଇଛି।
HCES ସର୍ଭରେ ଜଣାପଡିଛି ଯେ, ଉଭୟ ଗ୍ରାମାଞ୍ଚଳ ଏବଂ ସହରାଞ୍ଚଳରେ ବ୍ୟବହାର ପ୍ରାୟ ୨.୫ ଗୁଣ ବୃଦ୍ଧି ପାଇଛି। ୨୦୧୧-୧୨ଠାରୁ ସହରାଞ୍ଚଳ ପରିବାରରେ ମୁଣ୍ଡପିଛା ହାରାହାରି ମାସିକ ଖର୍ଚ୍ଚ (MPCE) ୩୩.୫ ପ୍ରତିଶତ ବୃଦ୍ଧି ଘଟି ୩,୫୧୦ ଟଙ୍କାରେ ପହଞ୍ଚି ଥିବାବେଳେ ଗ୍ରାମାଞ୍ଚଳରେ ୪୦.୪୨ ପ୍ରତିଶତ ବୃଦ୍ଧି ଘଟି ୨,୦୦୮ ଟଙ୍କାରେ ପହଞ୍ଚିଛି।
ସର୍ବେକ୍ଷଣରୁ ଏକ ପ୍ରମୁଖ ପର୍ଯ୍ୟବେକ୍ଷଣ ହେଉଛି, ଖାଦ୍ୟ ଖର୍ଚ୍ଚ ଦୃଷ୍ଟିରୁ ଖର୍ଚ୍ଚ ଢାଞ୍ଚାରେ ପରିବର୍ତ୍ତନ। ସର୍ବେକ୍ଷଣ ଅନୁଯାୟୀ, ଗ୍ରାମୀଣ ପରିବାର ପ୍ରଥମ ଥର ପାଇଁ ସେମାନଙ୍କର ମୋଟ ଖର୍ଚ୍ଚର ୫୦ ପ୍ରତିଶତରୁ କମ୍ ଖାଦ୍ୟ ବଣ୍ଟନ କରିଛନ୍ତି। ଏହି ସର୍ବେକ୍ଷଣରେ କୁହାଯାଇଛି ଯେ, ସହରାଞ୍ଚଳ-ଗ୍ରାମୀଣ ବ୍ୟବହାର ୨୦୦୪-୦୫ରେ ୯୧%ରୁ ୨୦୨୨-୨୩ରେ ୭୧%କୁ ହ୍ରାସ ପାଇଛି, ଯାହା ଅସମାନତା ହ୍ରାସ କରିଛି।
ସୁବ୍ରମଣ୍ୟମ କହିଛନ୍ତି ଯେ, "ଘରୋଇ ଉପଯୋଗ ଉପରେ କରାଯାଇଥିବା ସର୍ଭେ ଦାରିଦ୍ର୍ୟ ଦୂରିକରଣ ପାଇଁ କରାଯାଉଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟକ୍ରମର ସଫଳତାକୁ ମୂଲ୍ୟାଙ୍କନ କରିବା ପାଇଁ ଏକ ପ୍ରମୁଖ ମାଟ୍ରିକ ଅଟେ। ଖାଦ୍ୟରେ ପାନୀୟ, ପ୍ରକ୍ରିୟାକୃତ ଖାଦ୍ୟ (processed food), କ୍ଷୀର ଏବଂ ଫଳର ବ୍ୟବହାର ବଢୁଛି। ଏହା ବିବିଧ ଏବଂ ସନ୍ତୁଳିତ ବ୍ୟବହାରର ସୂଚକ।"
ସେ ଆହୁରି କହିଛନ୍ତି, ଆୟୁଷ୍ମାନ ଭାରତ ଯୋଜନା ଅଧୀନରେ ସ୍ୱାସ୍ଥ୍ୟସେବା ଏବଂ ମାଗଣା ଶିକ୍ଷା ବ୍ୟବସ୍ଥାକୁ ଏହି ସର୍ଭେରେ ସାମିଲ କରାଯାଇ ନାହିଁ। ଏଥିରୁ ଜଣା ଯାଉଛି ଯେ, ଦେଶରେ ଦାରିଦ୍ର୍ୟ ଏବଂ ଅଭାବ ହ୍ରାସ ପାଇଛି।