ପଞ୍ଜାବର ସଙ୍ଗ୍ରୁର ଜେଲ୍ ଭିତରେ କଏଦୀଙ୍କ ମଧ୍ୟରେ ହୋଇଛି ଘମାଘୋଟ ସଂଘର୍ଷ । ଏଥିରେ ୨ କଏଦୀଙ୍କ ମୃତ୍ୟୁ ହୋଇଥିବା ବେଳେ ୨ ଜଣଙ୍କ ଅବସ୍ଥା ଗୁରୁତର ରହିଛି।
ଗତକାଲି ବିଳମ୍ବିତ ରାତିରେ ଜେଲ୍ ଭିତରେ ୪ କଏଦୀଙ୍କ ମଧ୍ୟରେ କୌଣସି କାରଣରୁ ଗଣ୍ଡଗୋଳ ହୋଇଥିଲା। ଏହା କ୍ରମଶଃ ଉଗ୍ରରୂପ ଧାରଣ କରି ରକ୍ତାକ୍ତ ସଂଘର୍ଷରେ ପରିଣତ ହୋଇଥିଲା। ଏଥିରେ ୪ ଜଣ ଗୁରୁତର ହୋଇଥିବା ବେଳେ ତୁରନ୍ତ ଜେଲ୍ କର୍ତ୍ତୃପକ୍ଷ ସମସ୍ତଙ୍କୁ ସଙ୍ଗ୍ରୁର ହସ୍ପିଟାଲରେ ଭର୍ତ୍ତି କରିଥିଲେ।
ସେମାନଙ୍କ ମଧ୍ୟରୁ ୨ ଜଣଙ୍କୁ ଡାକ୍ତର ମୃତ ଘୋଷଣା କରିଥିଲେ। ଆଉ ୨ ଜଣଙ୍କ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ପଟିଆଲା ମେଡିକାଲରେ ଭର୍ତ୍ତି କରାଯାଇଛି।
ଜେଲ୍ ଭିତରେ କ’ଣ ପାଇଁ ଏତେ ଭୟଙ୍କର ସଂଘର୍ଷ ହେଲା, କିପରି ଭିତରକୁ ମାରଣାସ୍ତ୍ର ଆସିଲା ତାହାର ତଦନ୍ତ ଆରମ୍ଭ କରିଛି ପୁଲିସ୍ । ତେବେ ଏନେଇ ପୁଲିସ୍ ତରଫରୁ କୌଣସି ସୂଚନା ଦିଆଯାଇନି।