ସ୍କୁଲ, ହସ୍ପିଟାଲ, ବିମାନ ପରେ ଏବେ ଟ୍ରେନ୍ ପାଳି। ଜମ୍ମୁ ତଓ୍ୱିରୁ ଅହମ୍ମଦାବାଦ ଯାଉଥିବା ଟ୍ରେନ୍ରେ ବୋମା ଥିବା ଧମକ ମିଳିଛି। ଫଳରେ ଯାତ୍ରୀ ଛାନିଆ ହୋଇପଡିଛନ୍ତି। ଏହାକୁ ନେଇ ଟ୍ରେନ୍ ଭିତରେ ହଇଚଇ ସୃଷ୍ଟି ହୋଇଛି। ପରେ ଟ୍ରେନ୍କୁ ଫିରୋଜପୁର ଷ୍ଟେସନରେ ଅଟକାଇ ଯାଞ୍ଚ କରାଯାଇଛି।
କାସୁ ବେଗୁ ରେଲଓ୍ୱେ ଷ୍ଟେସନରେ ଟ୍ରେନ୍ର ତଲାସି କରାଯାଇଛି। ଟ୍ରେନ୍ରେ ଥିବା ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବାହାରକୁ ବାହାର କରାଯାଇଛି। ରେଲଓ୍ୱେ ଓ ପୁଲିସ ଅଧିକାରୀ ଘଟଣାସ୍ଥଳରେ ଉପସ୍ଥିତ ଅଛନ୍ତି।
ସୂଚନା ମୁତାବକ, ଜମ୍ମୁ ତବିରୁ ଅହମ୍ମଦାବାଦ ଯାଉଥିବା ଏକ୍ସପ୍ରେସ ଟ୍ରେନ୍ ଆଜି ସକାଳୁ ଫିରୋଜପୁର ରେଲଓ୍ୱେ ଷ୍ଟେସନରୁ ଫରିଦକୋଟ୍ ରେଲଓ୍ୱେ ଷ୍ଟେସନ ଆଡକୁ ଯାତ୍ରା କରିଥିଲା। ତେବେ ଏତିକି ବେଳେ ଟ୍ରେନ୍ ବୋମା ଥିବା ସୂଚନା ମିଳିବା ପରେ ଏହାକୁ କାସୁ ବେଗୁ ରେଲଓ୍ୱେ ଷ୍ଟେସନରେ ଅଟକାଇ ଦିଆଯାଇଛି। ଫିରୋଜପୁର କ୍ୟାଣ୍ଟ ରେଳ ଷ୍ଟେସନରୁ ବହୁ ସଂଖ୍ୟକ ଆମ୍ବୁଲାନ୍ସ ଏବଂ ମେଡିକାଲ ଦଳ ଡକାଯାଇଛି।
ତେବେ ଦୁଇ ଘଣ୍ଟା ଧରି ଚେକିଂ ପରେ ବି ଟ୍ରେନରୁ ସେଭଳି କିଛି ସନ୍ଧିଗ୍ଧ ବିସ୍ଫୋରକ ଜିନିଷ ମିଳିନାହିଁ। ପୁଲିସ ସୂଚନା ମୁତାବକ, ଏହା କେବଳ ଗୁଜବ ଥିଲା। ଚେକିଂ ପରେ ଟ୍ରେନ୍ଟି ନିଜ ଗନ୍ତବ୍ୟସ୍ଥଳ ଅଭିମୁଖେ ଯାତ୍ରା କରିଛି।
କହିରଖୁ ଯେ, ଗତମାସ ଜୁନ୍ରେ ପଞ୍ଜାବର ବିଭିନ୍ନ ରେଲଓ୍ୱେ ଷ୍ଟେସନକୁ ବୋମାରେ ଉଡ଼ାଇ ଦେବାକୁ ଧମକପୂର୍ଣ୍ଣ ଚିଠି ମିଳିଥିଲା। ଏହାପରେ ପଞ୍ଜାବର ସମସ୍ତ ରେଲଓ୍ୱେ ଷ୍ଟେସନର ସୁରକ୍ଷାକୁ ବଢ଼ାଇ ଦିଆଯାଇଥିଲା।