ରାଜଧାନୀ ଦିଲ୍ଲୀର ବାୟୁ ପ୍ରଦୂଷଣ ଏବେ ସାଂଘାତିକ ସ୍ଥିତିରେ ପହଞ୍ଚିଛି। ବାୟୁ ପ୍ରଦୂଷଣର ସ୍ତର ଗମ୍ଭୀର ହେବାରୁ ଦିଲ୍ଲୀ ସରକାର ସ୍କୁଲ ବନ୍ଦ କରିବା ଏବଂ ଗାଡ଼ିମଟର ଚଳାଚଳ ଉପରେ କଟକଣା କରିବା ଭଳି ବିଭିନ୍ନ ଜରୁରୀକାଳୀନ ପଦକ୍ଷେପ ଲାଗୁ କରିଛନ୍ତି। ତେବେ ଏହାରି ଭିତରେ ଭାରତରେ ବାୟୁ ପ୍ରଦୂଷଣର ଚିତ୍ର ଶେୟାର କରିଛି ନାସା।
ପଞ୍ଜାବ, ହରିୟାଣା, ଉତ୍ତର ପ୍ରଦେଶ ଓ ରାଜସ୍ଥାନର ଚାଷ ଜମିରେ ନଡ଼ା ନିଆଁର ଧୁଆଁ ଆସିବା ଯୋଗୁ ଦିଲ୍ଲୀରେ ପ୍ରଦୂଷଣର ମାତ୍ରା ବଢ଼ୁଛି। ଏହି ବିଷାକ୍ତ ଧୂଆଁ ପାକିସ୍ତାନରୁ ବଙ୍ଗୋପସାଗର ପର୍ଯ୍ୟନ୍ତ କିଭଳି ବ୍ୟାପିବାରେ ଲାଗିଛି ତାହା ନାସାର ଉପଗ୍ରହ ଚିତ୍ରରେ କଏଦ ହୋଇଛି।
ନାସାର ଉପଗ୍ରହ ଚିତ୍ରର ତଥ୍ୟ ଅନୁଯାଇ, ଗତ ଅକ୍ଟୋବର ୨୯ ତାରିଖ ଦିନ ୧,୦୬୮ଟି ଚାଷ ଜମିର ନଡ଼ାରେ ନିଆଁ ଲାଗିବା ସହ ୭୪୦ ପ୍ରତିଶତ ବୃଦ୍ଧି ପାଇଛି । ଯାହାକି ଚଳିତ ଅମଳ ଋତୁରେ ଗୋଟିଏ ଦିନରେ ସର୍ବାଧିକ ।
ବୁଧବାର ଦିନ ରାଜଧାନୀ ଦିଲ୍ଲୀ- ଏନସିଆର ସହ କେତେକ ଅଞ୍ଚଳରେ ଏୟାର କ୍ୱାଲିଟି ଇଣ୍ଡେକ୍ସ (AQI) ତଥା ବାୟୁର ମାନକ ୫୦୦ ଅତିକ୍ରମ କରିଥିବାବେଳେ ଗତ ୬ ଦିନ ଧରି ବିଶ୍ୱର ସବୁଠାରୁ ପ୍ରଦୂଷିତ ସହର ତାଲିକାର ଶୀର୍ଷରେ ରହିଛି ନୂଆଦିଲ୍ଲୀ। ଗ୍ରେଡେଡ୍ ରେସପନ୍ସ ଆକ୍ସନ୍ ପ୍ଲାନ୍ (GRAP)ର ଚତୁର୍ଥ ପର୍ଯ୍ୟାୟରେ ପ୍ରଦୂଷଣ ନିରୋଧୀ ଗାଇଡ଼ଲାଇନ ଜାରି କରାଯିବା ସହ ରାଜଧାନୀରେ ଡିଜେଲ ଟ୍ରକ୍ ଓ ନିର୍ମାଣ କାର୍ଯ୍ୟ ଉପରେ କଟକଣା ଜାରି କରାଯାଇଛି।
ସେହିଭଳି ଦିଲ୍ଲୀ, ପଞ୍ଜାବ, ହରିୟାଣା, ଉତ୍ତରପ୍ରଦେଶ ଓ ରାଜସ୍ଥାନ ସରକାର ତୁରନ୍ତ କେନ୍ଦ୍ର ସରକାରଙ୍କ ସହ ଆଲୋଚନା କରି କିପରି ନଡ଼ା ନିଆଁକୁ ରୋକାଯାଇପାରିବ ସେନେଇ ପଦକ୍ଷେପ ନେବାକୁ ସୁପ୍ରିମକୋର୍ଟ କହିଛନ୍ତି। ପୂର୍ବରୁ ରାଜ୍ୟ ସରକାରମାନେ ନଡ଼ା ଜଳିବା ଉପରେ ରୋକ ଲଗାଇବା ପାଇଁ ପଦକ୍ଷେପ ନିଅନ୍ତୁ ବୋଲି ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଥିଲେ।