ପୂରା ପରିବାର ଛୁଟି କାଟିବାକୁ ଯାଇଥିଲା ଲୋନାୱାଲା । ଛୁଟି ସାରି ପୁଣି ଘରକୁ ଫେରି ଆସିଥାନ୍ତେ। ମାତ୍ର ତା’ ପୂର୍ବରୁ ଘୋଟି ଆସିଲା କଳା ବାଦଲ । ଆଉ ପୂରା ପରିବାରର ୫ ସଦସ୍ୟଙ୍କୁ ମୃତ୍ୟୁ ନିଜ କୋଳକୁ ଟାଣିନେଲା।
ଏପରି ଏକ ଛାତିଥରା ଘଟଣା ମହାରାଷ୍ଟ୍ରର ଲୋନାୱାଲାରେ ଘଟିଛି। ମୃତକଙ୍କ ମଧ୍ୟରେ ଜଣେ ୩୬ ବର୍ଷୀୟା ମହିଳା, ଓ ୪ ପିଲା ଅଛନ୍ତି। ସେମାନେ ମହାରାଷ୍ଟ୍ରର ହଡପସର ଅଞ୍ଚଳର ଅନସାରୀ ପରିବାର ସଦସ୍ୟ ବୋଲି ଜଣାଯାଇଛି।
ଭୁସି ଡ୍ୟାମ ବ୍ୟାକ ୱାଟର ନିକଟରେ ଏହି ଅଘଟଣ ହୋଇଛି । ଲୋନାୱାଲାକୁ ଛୁଟି କାଟିବାକୁ ଆସିଥିବା ଏକ ପରିବାର ଏକ ଝରଣା ନିକଟରେ ବୁଲୁଥିଲେ। ଏହି ସମୟରେ ପ୍ରବଳ ବର୍ଷା ଫଳରେ ଝରଣାରେ ଫ୍ଲାସ ଫ୍ଲଡ୍ ଆସିଥିଲା । ଫଳରେ ଘଟଣା ସ୍ଥଳରେ ହିଁ ୫ ଜଣ ଭାସିଯାଇଥିଲେ । ବଞ୍ଚିବା ପାଇଁ ସେମାନେ ଆର୍ତ୍ତ ଚିତ୍କାର କରୁଥିବା ବେଳେ ସ୍ଥାନୀୟ ଲୋକେ ପୁଲିସ୍କୁ ଖବର ଦେଇଥିଲେ।ଏପରି ଛାତି ଥରା ଘଟଣାର ସମସ୍ତ ଚିତ୍ର କ୍ୟାମେରାରେ କଏଦ ହୋଇଥିବା ବେଳେ ତାହା ଏବେ ଭାଇରାଲ ହେଉଛି ।
ପୁଲିସ୍ ଓ ଉଦ୍ଧାରକାରୀ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଏହାପରେ ଗତକାଲି ଦୁଇ ମୃତଦେହ ମିଳିଥିବା ବେଳେ ଆଜି ଆଉ ୩ଟି ମୃତଦେହ ଉଦ୍ଧାର ହୋଇଛି।