'ମୁଁ ଜେଲ୍ରେ ନୁହେଁ ଜନତାଙ୍କ ହୃଦୟରେ ଅଛି।' ଜେଲ୍ ଭିତରୁ ଏଭଳି କିଛି ଚିଠି ଲେଖି କହିଛନ୍ତି ତେଲୁଗୁ ଦେଶମ ପାର୍ଟିର ମୁଖ୍ୟ ଚନ୍ଦ୍ରବାବୁ ନାଇଡୁ। ତିନି ଥର ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ହୋଇସାରିଥିବା ଟିଡିପି ମୁଖ୍ୟ ନିଜ କାର୍ଯ୍ୟକର୍ତ୍ତାଙ୍କ ନିକଟକୁ ଚିଠି ଲେଖି ସେ ଦେଇଥିବା ପ୍ରତିଶ୍ରୁତିକୁ ଦୋହରାଇଛନ୍ତି। ପୂର୍ବ ପ୍ରତିଶ୍ରୁତି ମୁତବକ ଦଶହରାରେ ହିଁ ଦଳର ଘୋଷଣା ପତ୍ର ଜାରି କରିବାକୁ ସେ ନିଜ କାର୍ଯ୍ୟକର୍ତ୍ତାଙ୍କୁ କହିଛନ୍ତି।
ଜେଲ ଭିତରୁ ଦଳର କର୍ମୀଙ୍କୁ ଲେଖିଥିବା ଚିଠିରେ ଚନ୍ଦ୍ରବାବୁ ନାଇଡୁ କହିଛନ୍ତି ଯେ ଦଶହରା ଦିନ ହିଁ ଦଳର ସମ୍ପୂର୍ଣ୍ଣ ସରକାରୀ ମନିଫେଷ୍ଟୋ ପ୍ରକାଶ ପାଇବ। ସେ ଜେଲରେ ନାହାଁନ୍ତି ବରଂ ଲୋକଙ୍କ ହୃଦୟରେ ଅଛନ୍ତି। ତେଲୁଗୁ ଲୋକଙ୍କ କଲ୍ୟାଣ ତଥା ବିକାଶ ପାଇଁ କାର୍ଯ୍ୟ କରିବା ତାଙ୍କର ପ୍ରଥମ ପ୍ରାଥମିକତା। ସେ ଅଭିଯୋଗ କରିଛନ୍ତି ଯେ ଶାସକ YSRCP ତାଙ୍କୁ ଜେଲରେ ରଖି ଲୋକମାନଙ୍କଠାରୁ ଦୂରେଇ ରଖିବାକୁ ଚାହୁଁଛନ୍ତି କାରଣ ସେମାନେ ନିର୍ବାଚନରେ ହାରିବାକୁ ଭୟ କରୁଛନ୍ତି। ନାଇଡୁ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ ତାଙ୍କ ବିରୋଧରେ ଆସିଥିବା ଅଭିଯୋଗ ମିଥ୍ୟା ଏବଂ ତାଙ୍କ ପ୍ରତିଛବିକୁ ବଦନାମ କରିବା ପାଇଁ ଏସବୁ କରାଯାଉଛି।
Also Read
ସେ ଆହୁରି କହିଛନ୍ତି, ତାଙ୍କ ଅନୁପସ୍ଥିତିରେ ତାଙ୍କ ପତ୍ନୀ ନାରା ଭୁବନେଶ୍ୱରୀ ଦଳର ନେତୃତ୍ୱ ନେବେ ଏବଂ ନିଜାମ ଗେଲାୱାଲି ଅଭିଯାନ ଅଧୀନରେ ଲୋକଙ୍କୁ ଭେଟିବେ। ନାଇଡୁଙ୍କ ପୁଅ ନାରା ଲୋକେଶ ମଧ୍ୟ ସୋସିଆଲ ମିଡିଆ ପୋଷ୍ଟ ମାଧ୍ୟମରେ YSRCP ମୁଖ୍ୟ ତଥା ମୁଖ୍ୟମନ୍ତ୍ରୀ ଓ୍ୱାଇ ଏସ୍ ଜଗନ୍ ମୋହନ ରେଡ୍ଡୀଙ୍କୁ ସମାଲୋଚନା କରିଛନ୍ତି।
ଦକ୍ଷତା ବିକାଶ ଦୁର୍ନୀତି ମାମଲାରେ ଏକ ମାସରୁ ଅଧିକ ସମୟ ହେବ ଚନ୍ଦ୍ରବାବୁ ନାଇଡୁ ଜେଲରେ ଅଛନ୍ତି। ତାଙ୍କୁ ସେପ୍ଟେମ୍ବର ୯ ତାରିଖରେ ରାଜମହେନ୍ଦ୍ରବର୍ମନରୁ ଗିରଫ କରାଯାଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
