Terrorists Attack: ଆର୍ମି କ୍ୟାମ୍ପ ଉପରେ ଆତଙ୍କବାଦୀ ହମଲା, ୩ ଯବାନ ଆହତ

ଭାରତୀୟ ସ୍ଥଳ ସେନାର କ୍ୟାମ୍ପ ଉପରେ ଆତଙ୍କବାଦୀ ଆକ୍ରମଣ। ଆସାମ(Assam)ର କାକୋପଥର ଅଞ୍ଚଳରେ ଥିବା ସେନା କ୍ୟାମ୍ପ ଉପରେ ଆତଙ୍କବାଦୀମାନେ ଆଖି ବୁଜା ଗୁଳିମାଡ଼ କରିଛନ୍ତି। ରାତି ପ୍ରାୟ ୧୨.୩୦ରେ ଆତଙ୍କବାଦୀ(Terrorist)ମାନେ ଗୋଟିଏ ଚଳନ୍ତା ଗାଡ଼ିରୁ ଯବାନଙ୍କୁ ଟାର୍ଗେଟ କରିଥିଲେ। ସେଠାରେ ମୁତୟନ ଥିବା ଯବାନମାନେ ଏହାର ତୁରନ୍ତ ଜବାବ ଦେବାରୁ ଆତଙ୍କବାଦୀମାନେ ସେମାନଙ୍କ ଉଦ୍ଦେଶ୍ୟରେ ସଫଳ ହୋଇ ନାହାନ୍ତି। 

ସ୍ଥାନୀୟ ଅଞ୍ଚଳରେ ଥିବା ସାଧାରଣ ଲୋକମାନେ ଆକ୍ରମଣରୁ ବର୍ତ୍ତି ଯାଇଛନ୍ତି। ତେବେ ଆତଙ୍କବାଦୀଙ୍କ ଗୁଳି ମାଡ଼ରେ ୩ ଜଣ ଯବାନ ଆହତ ହୋଇଛନ୍ତି। ସେମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। 

ଆତଙ୍କବାଦୀମାନେ ୩ଟି ଅଣ୍ଡ ବାରେଲ ଗ୍ରେନେଡ ଲଞ୍ଚର୍ସ ଦ୍ୱାରା ଆକ୍ରମଣ କରିବା ପରେ ଗୁଳି ମାଡ଼ କରିଥିଲେ। ପ୍ରାୟ ଅଧା ଘଣ୍ଟା ଧରି ଆତଙ୍କବାଦୀ ଓ ଯବାନଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଆତଙ୍କବାଦୀମାନେ ବଡ଼ ଧରଣର କ୍ଷତି ଘଟାଇବାକୁ ଯୋଜନା କରିଥିଲେ ହେଁ ୩ ଜଣ ଯବାନ ସାମାନ୍ୟ ଆହତ ହୋଇଥିବା ସେନା ପକ୍ଷରୁ କୁହାଯାଇଛି। 

ସେନା ପକ୍ଷରୁ କୁହାଯାଇଛି ଯେ କୌଣସି ଯବାନ ଗୁରୁତର ଆହତ ହୋଇ ନାହାନ୍ତି। ସେମାନଙ୍କ ଆହତ ସମସ୍ୟା ସମାନ୍ୟ ରହିଛି। ପୂରା ଅଞ୍ଚଳରେ ପୁଲିସ୍‌ ସହ ମିଶି ସର୍ଚ୍ଚ ଅପରେଦନ କରାଯାଇଛି। ତଥାପି ଆତଙ୍କବାଦୀମାନେ ରାତିର ଅନ୍ଧକାରରେ ଖସି ଯିବାକୁ ସକ୍ଷମ ହୋଇଛନ୍ତି। 

କୁହାଯାଉଛି ଯେ ଆତଙ୍କବାଦୀମାନେ ଗୋଟିଏ ଟ୍ରକରେ ଡୋମଡୋମା ଦିଗରୁ ଆସିଥିଲେ। ସେ ଆଖିବୁଜା ଗୁଳିମାଡ଼ କରିବା ପରେ ଅରୁଣାଳ ପ୍ରଦେଶକୁ ଲମ୍ବି ଥିବା ରାସ୍ତାରେ ଚାଲି ଯାଇଥିଲେ। ଆତଙ୍କବାଦୀମାନେ ବ୍ୟବହାର କରିଥିବା ସନ୍ଦିଗ୍ଧ ଟ୍ରକକୁ ସୁରକ୍ଷାକର୍ମୀମାନେ ଟେଙ୍ଗାପାଣି ଘାଟ ନିକଟରୁ ଜବତ କରିଛନ୍ତି।

ଏହା ଆସାମ-ଅରୁଣାଚଳ ପ୍ରଦେଶର ସୀମାବର୍ତ୍ତୀ ଅଞ୍ଚଳ। କୌଣସି ଆତଙ୍କୀ ସଂଗଠନ ଏଯାଏ ଆକ୍ରମଣ ପାଇଁ ନିଜକୁ ଦାୟୀ କରି ନାହାନ୍ତି। କିନ୍ତୁ ଉଲଫା ସଂଗଠନ ଏହା ପଛରେ ଥିବା ସନ୍ଦେହ କରାଯାଉଛି। 

ଘଟଣା ପରେ ପୂରା ଅଞ୍ଚଳରେ ଚେକିଂ ଓ ପ୍ୟାଟ୍ରୋଲିଂକୁ ବଢ଼ାଇ ଦିଆଯାଇଛି। ସୁରକ୍ଷାକର୍ମୀମାନେ ଯିବା ଆସିବା କରୁଥିବା ସମସ୍ତ ଗାଡ଼ିକୁ ତନତନ କରି ଯାଞ୍ଚ କରୁଛନ୍ତି।