ମଣିପୁରରେ ପୁଣି ହିଂସା। ଭୟଙ୍କର ହେବାରେ ଲାଗିଛି ସ୍ଥିତି। କୁକି ଉଗ୍ରବାଦୀମାନେ ପୁଣି ଥରେ ସକ୍ରିୟ ହୋଇ ପଠିଛନ୍ତି। ଡ୍ରୋନ୍ ଆକ୍ରମଣ ପରେ ହୋଇଛି ରକେଟ୍ ମାଡ଼। ବିଷ୍ଣୁପୁର ଜିଲ୍ଲା ମୋଇରଙ୍ଗ ସହରରେ ଥିବା ପୂର୍ବତନ ମୁଖ୍ୟମନ୍ତ୍ରୀ ମୈରେମ୍ବମ କୋଇରେଙ୍ଗ ସିଂହଙ୍କ ଘର ଉପରେ ରକେଟ୍ ଆକ୍ରମଣ ହୋଇଛି।
ଏହି ହମ୍ଲାରେ ଜଣେ ବରିଷ୍ଠ ନାଗରିକଙ୍କ ମୃତ୍ୟୁ ହୋଇଛି। ସେହିପରି ଅନ୍ୟ ୫ ଜଣ ଆହତ ହୋଇଛନ୍ତି। ସେମାନଙ୍କ ଭିତରେ ଜଣେ ୧୩ ବର୍ଷୀୟ ବାଳିକା ରହିଛି। ରକେଟ୍ ମାଡ଼ରେ କମ୍ୟୁନିଟି ହଲ୍ ଓ ଅନ୍ୟ ଏକ ଘର କ୍ଷତିଗ୍ରସ୍ତ ହୋଇଛି। କୁହାଯାଉଛି ଯେ ପୂର୍ବତନ ମୁଖୃମନ୍ତ୍ରୀଙ୍କ ଘରେ ରକେଟ୍ ଆକ୍ରମଣ ସମୟରେ ସେଠାରେ ଏକ ଧାର୍ମିକ କାର୍ଯ୍ୟ ପାଇଁ ପ୍ରସ୍ତୁତି ଚାଲିଥିଲା। ଏହି ସମୟରେ, ରକେଟ ପୂର୍ବତନ ମୁଖ୍ୟମନ୍ତ୍ରୀଙ୍କ ବାସଭବନର ଛାତ ଉପରେ ପଡିଥିଲା।
Also Read
ଦିନକରେ ଏହା ଥିଲା ଦ୍ୱିତୀୟ ରକେଟ୍ ଆକ୍ରମଣ। ଏହା ପୂର୍ବରୁ ଶୁକ୍ରବାର ସକାଳୁ ମୋଇରଙ୍ଗଠାରୁ ୪ କି.ମି. ଦୂର ଟ୍ରୋଙ୍ଗଲଓବି ଅଞ୍ଚଳରେ ରକେଟ୍ ଆକ୍ରମଣ ଘଟିଥିଲା। ଏଥିରେ ଦୁଇଟି ଘର କ୍ଷତିଗ୍ରସ୍ତ ହୋଇଛି। ପୋଲିସର ସୂଚନା ଅନୁସାରେ, ମୋଇରଙ୍ଗରେ କେବେ ବି ବନ୍ଧୁକ କିମ୍ବା ବୋମା ଆକ୍ରମଣ ହୋଇନଥିଲା। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆତଙ୍କ ଖେଳି ଯାଇଛି।
ଗତ ୧୭ ମାସ ମଧ୍ୟରେ ପ୍ରଥମ ଥର ପାଇଁ ଉଗ୍ରବାଦୀମାନେ ରକେଟ୍ରେ ଆକ୍ରମଣ କରିଛନ୍ତି। ଏହାପୂର୍ବରୁ ଆକ୍ରମଣ ପାଇଁ ଡ୍ରୋନ୍ ସେମାନେ ବ୍ୟବହାର କରିଥିଲେ। ଏହି ଆକ୍ରମଣକୁ ଦୃଷ୍ଟିରେ ରଖି ମଣିପୁର ସରକାର ସମସ୍ତ ସରକାରୀ ଏବଂ ବେସରକାରୀ ସ୍କୁଲ କଲେଜକୁ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି।
ସେପଟେ ରାଜ୍ୟରେ ବଢ଼ୁଥିବା ଉତ୍ତେଜନାକୁ ଦୃଷ୍ଟିରେ ରଖି ମେତେଇ ସମ୍ପ୍ରଦାୟର ପ୍ରତିନିଧିତ୍ୱ କରୁଥିବା ମଣିପୁର ଇଣ୍ଟିଗ୍ରିଟି ଫର୍ ସମନ୍ୱୟ କମିଟି (COCOMI) ଇମ୍ଫାଲ ଉପତ୍ୟକାର ପାଞ୍ଚଟି ଜିଲ୍ଲାରେ “ଜରୁରୀକାଳୀନ ପରିସ୍ଥିତି” ଘୋଷଣା କରିଛି। ନାଗରିକଙ୍କ ସୁରକ୍ଷାକୁ ନେଇ ଏହି ଗୋଷ୍ଠୀ ସରକାରଙ୍କୁ ନିନ୍ଦା କରିଛନ୍ତି।
ସେପଟେ ଆଜି କୁକି ସମ୍ପ୍ରଦାୟର ଗ୍ରାମରେ ସେନା, CRPF ଏବଂ ପୁଲିସ ଦ୍ୱାରା ଅପରେସନ୍ ସମୟରେ କୁକି ଆତଙ୍କବାଦୀଙ୍କ ତିନିଟି ମୁଖ୍ୟ ବଙ୍କର ନଷ୍ଟ ହୋଇଛି। ସୂଚନାନୁସାରେ, କୁକି ଉଗ୍ରବାଦୀମାନେ ସୁରକ୍ଷା କର୍ମୀଙ୍କ ଉପରକୁ ଗୁଳି ଚଳାଇବା ପରେ ସୁରକ୍ଷା କର୍ମୀଙ୍କ ଦ୍ୱାରା ଏହି ଅପରେସନ୍ କରାଯାଇଥିଲା।
ପୂର୍ବରୁ ଗତ ୩ ତାରିଖରେ ଇମ୍ଫାଲ ୱେଷ୍ଟ ଜିଲ୍ଲାର ସେଜମ ଚିରାଙ୍ଗ ଗ୍ରାମରେ ଉଗ୍ରବାଦୀମାନେ ଡ୍ରୋନ୍ ଆକ୍ରମଣ କରିଥିଲେ। ଏଥିରେ ଜଣେ ମହିଳାଙ୍କ ସମେତ ୩ ଜଣ ଆହତ ହୋଇଥିଲେ। ସେପ୍ଟେମ୍ବର ୧ରେ ଏହି ଜିଲ୍ଲାର କୋନ୍ନୁକ ଗାଁରେ ମଧ୍ୟ ଏକ ଡ୍ରୋନ ଆକ୍ରମଣ କରାଯାଇଥିଲା। ଏଥିରେ ୨ ଜଣଙ୍କ ମୃତ୍ୟୁ ହେବା ସହ ଅନ୍ୟ ୯ ଜଣ ଆହତ ହୋଇଥିଲେ। ଡ୍ରୋନ୍ ଆକ୍ରମଣ ପରେ ଗାଁରେ ରହୁଥିବା ୧୭ଟି ପରିବାର ଗାଁ ଛାଡି ପଳାଇଛନ୍ତି। କୁହାଯାଉଛି କି ଏହି ଆକ୍ରମଣ ପଛରେ କୁକି ଉଗ୍ରବାଦୀଙ୍କ ହାତ ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
