ଯୌତୁକ ମାମଲାରେ ନୂଆ ଟ୍ୱିଷ୍ଟ: ମୃତ ନିକ୍କିଙ୍କ ପରିବାର ବିରୋଧୀରେ ନିର୍ଯାତନା ଅଭିଯୋଗ ଆଣିଲେ ଭାଉଜ

ଗ୍ରେଟର ନୋଏଡା ଯୌତକ ଜନିତ ହତ୍ୟା ମାମଲା ନାଟକୀୟ ମୋଡ ନେଇଛି। ସ୍ୱାମୀ ଓ ଶାଶୁ ଘର ଲୋକଙ୍କ ଦ୍ୱାରା ହତ୍ୟାର ଶିକାର ହୋଇଥିବା ନିକ୍କି ଭାଟିଙ୍କ ପରିବାର ବିରୋଧରେ ଆସିଛି ସାଂଘାତିକ ଅଭିଯୋଗ। ନିକ୍କିଙ୍କ ସ୍ୱାମୀ ଓ ଶାଶୁ ଘର ଲୋକଙ୍କ ବିରୋଧରେ ଯୌତୁକ ନିର୍ଯାତନା ଅଭିଯୋଗ ଆସିଥିବା ବେଳେ ଏବେ ନିକ୍କିଙ୍କ ଭାଉଜ ସମସ୍ତଙ୍କୁ ଚକିତ କରିବା ଭଳି କଥା କଥା କହିଛନ୍ତି।

ନିକ୍କିଙ୍କ ପରିବାର ବିରୋଧରେ ଯୌତୁକ ନିର୍ଯାତନା ଅଭିଯୋଗ ଆଣିଛନ୍ତି ଭାଉଣ ମୀନାକ୍ଷୀ। ନିକ୍କଙ୍କ ଭାଇ ରୋହିତଙ୍କ ପୂର୍ବତନ ପତ୍ନୀ ହେଉଛି ମୀନାକ୍ଷୀ। ସେ ଏବେ ନିକ୍କିଙ୍କ ବାପା ଓ ଭାଇଙ୍କ ବିରୋଧରେ ଯୌତୁକ ନିର୍ଯାତନାର ଅଭିଯୋଗ ଆଣି ହଇଚଇ ସୃଷ୍ଟି କରିଛନ୍ତି।

୨୦୧୬ରେ ରୋହିତ ଓ ମୀନାକ୍ଷୀଙ୍କ ବିବାହ ହୋଇଥିଲା। ହେଲେ ନିକ୍କଙ୍କ ପରିବାର ଲୋକ ତାଙ୍କୁ ଯୌତୁକ ପାଇଁ ନିର୍ଯାତନା ଦେଉଥିଲେ। ଏଥିପାଇଁ ରୋହିତଙ୍କ ଠାରୁ ସେ ଅଲଗା ହୋଇ ଯାଇଥିଲେ ବୋଲି ମୀନାକ୍ଷୀ କହିଛନ୍ତି। ତାଙ୍କ କହିବା କଥା ଯେ ବାହାଘର ବେଳେ ମୀନାକ୍ଷୀଙ୍କ ବାପା ଯୌତୁକରେ ଗୋଟିଏ ମାରୁତି ସୁଜିକ ସିଆଜ ଓ ୩୧ ତୋଲା ସୁନା ଦେଇଥିଲେ। ହେଲେ ନିକ୍କିଙ୍କ ପରିବାର ଲୋକ ଗୋଟିଏ ସ୍କପ୍ରିଓ ପାଇଁ ଦାବି କରି ତାଙ୍କୁ ନିର୍ଯାତନା ଦେଉଥିଲେ।

ମୀନାକ୍ଷୀ କହିଛନ୍ତି, “ସମୟ ଗଡ଼ିବା ସହ ନିର୍ଯାତନା ବଢ଼ିଥିଲା। ନିକ୍କି ଓ କାଞ୍ଚନ ମଧ୍ୟ ଏଥିରେ ସାମିଲ ଥିଲେ। ଦୁଇ ଭଉଣୀ ମୋତେ ମାଡ଼ ମାରୁଥିଲେ। ରୋହିତଙ୍କ ମା’ ଓ ବାପା ଭିକାରୀ ସିଂହ ମଧ୍ୟ ମୋତେ ନିର୍ଯାତନା ଦେଉଥିଲେ।” ମୀନାକ୍ଷୀ ଆହୁରି କହିଛନ୍ତି ଯେ ତାଙ୍କ ସ୍ୱାମୀ ରୋହିତ ତାଙ୍କୁ ସବୁବେଳେ ମାଡ଼ ମାରନ୍ତି ଓ ଏକଦା ସେ ତାଙ୍କ ଭାଇଙ୍କୁ ଗୁଳି ମଧ୍ୟ ମାରିଥିଲେ। ବଳପୂର୍ବକ ତାଙ୍କର ଦୁଇ ଥର ଗର୍ଭପାତ କରାଯାଇଥିବା ମଧ୍ୟ ମୀନାକ୍ଷୀ ଅଭିଯୋଗ କରିଛନ୍ତି।

୨୦୨୪ରେ ମୀନାକ୍ଷୀଙ୍କ ଭାଇ ଦୀପକ ଭାଟି ପୁଲିସ୍‌ରେ କରିଥିବା ଏଫଆଇଆର କପି ଏବେ ସାମ୍ନାକୁ ଆସିଛି। ଏଥିରେ ମୀନାକ୍ଷୀ ସାମ୍ନା କରୁଥିବା ନିର୍ଯାତନାର ଗୋଟି ଗୋଟି କରି ସବୁ କଥା ଉଲ୍ଲେଖ କରାଯାଇଥିଲା। ନିକ୍କିଙ୍କ ଶାଶୁ ଘର ଲୋକ ବିବାଦ ଘେରରେ ଥିବା ବେଳେ ମୀନାକ୍ଷୀ ସେମାନଙ୍କ ପକ୍ଷ ନେଇଛନ୍ତି। ସେ କହିଛନ୍ତି, “ସେମାନେ ଆଦୌ ସେମିତି ନୁହନ୍ତି। ସେମାନେ ବହୁତ ଭଲ।”

ନିକ୍କିଙ୍କ ହତ୍ୟା ମାମଲା

୨୦୧୬ ଡିସେମ୍ବର ୧୦ରେ ନୋଏଡାର ବିପିନ ଓ ଭାଇ ରୋହିତ ଗୋଟିଏ ମଣ୍ଡପରେ ନିକ୍କି ଓ କାଞ୍ଚନଙ୍କୁ ବିବାହ କରିଥିଲେ। ନିକ୍କି ଓ କାଞ୍ଚନ ମଧ୍ୟ ଦୁଇ ଭଉଣୀ। ଦୁଇ ପରିବାର ବର କନ୍ୟା ଠିକ କରିଥିଲେ। ବାହାଘର ବେଳେ ନିକ୍କି ଓ କାଞ୍ଚନଙ୍କ ପରିବାର ଲୋକ ନିଜର ସକ୍ଷମ ଅନୁସାରେ କାର, ପୋଷାକ, ଗହଣା ଠାରୁ ଆରମ୍ଭ କରି ସବୁ କିଛି ଦେଇଥିଲେ। ନିକ୍କି ମା’ ହେବା ପରେ ପରିବାର ଲୋକ ଉପହାରରେ ବାଇକ ଦେଇଥିଲେ।

କିନ୍ତୁ ନିକ୍କି ଓ କାଞ୍ଚନଙ୍କ ବାପା ଭିକାରୀ ସିଂହ ପୟଲାଙ୍କ ପାଖରେ ଥିବା ମର୍ସିଡିଜ ଉପରେ ବିପିନର ନଜର ରହିଥିଲା। ବର୍ଷେ ହେଲାଣି ସେ କାର ପାଇଁ ନିକ୍କିଙ୍କ ଉପରେ ଚାପ ପକାଉଥିଲା। ନିକ୍କିଙ୍କ ବାପା କାର ଦିଅନ୍ତୁ ନଚେତ ୬୦ ଲକ୍ଷ ଟଙ୍କା ପଠାନ୍ତୁ ବୋଲି ସେ କହୁଥିଲା। ସମୟ ଗଡ଼ିବା ସହ ନିକ୍କିଙ୍କ ଉପରେ ବିପିନର ଅତ୍ୟାଚାର ବଢ଼ି ଚାଲିଥିଲା।

ଗୁରୁବାର ସ୍ଥିତି ପୂରା ବଦଳି ଯାଇଥିଲା। ନିକ୍କିଙ୍କୁ ତାଙ୍କ ସ୍ୱାମୀ ଓ ଶାଶୁ ଗୁରବାର ସନ୍ଧ୍ୟାରେ ପ୍ରବଳ ମାଡ଼ ମାରିଥିଲେ। ଭଉଣୀ କାଞ୍ଚନ ଏଥିରେ ହସ୍ତକ୍ଷେପ କରିବାରୁ ତାଙ୍କୁ ମଧ୍ୟ ମାଡ଼ ମରାଯାଇଥିଲା। ଏତିକି ବେଳେ ବିପିନ କିଛି ଦହନ ଯୁକ୍ତ ତୈଳ ନିକ୍କିଙ୍କ ଉପରେ ଢାଳି ନିଆଁ ଲଗାଇ ଦେଇଥିଲା।

କାଞ୍ଚନ ମୋବାଇଲରେ ରେକର୍ଡ କରିଥିବା ଭିଡିଓରେ ଦେଖାଯାଉଛି ଯେ ବିପିନ ଭୟଙ୍କର ଢଙ୍ଗରେ ନିକ୍କିଙ୍କୁ ମାଡ଼ ମାରୁଛି। ଆଉ ଏକ ଭିଡିଓରେ ଜଳି ସାରିଥିବା ନିକ୍କି ପାହାଚରେ ଜୀବନ ବଞ୍ଚାଇବାକୁ ଛଟପଟ ହେଉଛନ୍ତି। ଘଟଣା ପରେ ନିକ୍କିଙ୍କୁ ସ୍ଥାନୀୟ ହସ୍ପିଟାଲକୁ ନିଆଯାଇଥିଲା। ସେଠାରୁ ତାଙ୍କୁ ଦିଲ୍ଲୀର ସଫଦର୍ଜଙ୍ଗ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। କିନ୍ତୁ ସେଠାରେ ତାଙ୍କର ମୃତ୍ୟୁ ହୋଇଥିଲା।

ନିକ୍କି ଓ ବିପିନଙ୍କ ଜଣେ ୬ ବର୍ଷର ପୁଅ ରହିଛନ୍ତି। ସେ ମଧ୍ୟ ମା’ଙ୍କ ଭୟଙ୍କର ହତ୍ୟାର ସାକ୍ଷୀ ବନିଛନ୍ତି। ସେ କହିଛନ୍ତି, “ସେମାନେ ପ୍ରଥମେ କିଛି ତେଲ ମୁମ୍ମା(ମା’) ଉପରେ ଢାଳିଥିଲେ। ସେମାନେ ତା’ପରେ ତାକୁ ଚାପୁଡ଼ା ମାରିଥିଲେ। ଶେଷରେ ଲାଇଟର ଦ୍ୱାରା ନିଆଁ ଲଗାଇ ଦେଇଥିଲେ।”

ପୁଲିସ୍‌ ଏହି ଘଟଣାରେ ବିପିନ, ରୋହିତ, ମା’ ଦୟା ଓ ବାପା ସତ୍ୟବୀରଙ୍କୁ ଗିରଫ କରିଛି।