ୱାକଫ ସଂଶୋଧନ ବିଲ ୨୦୨୪କୁ ଆଜି ଲୋକସଭାରେ ଆଗତ କରିଛନ୍ତି କେନ୍ଦ୍ରମନ୍ତ୍ରୀ କିରଣ ରିଜିଜୁ। ବିଲ ଆଗତ ହେବା ପରେ ଲୋକସଭାରେ ଶାସକ ଏନଡିଏ ଓ ବିରୋଧୀ ଇଣ୍ଡିଆ ବ୍ଲକ ମଧ୍ୟରେ ଘମାଘୋଟ ବିତର୍କ ଆରମ୍ଭ ହୋଇଛି। ୱାକଫ ଆକ୍ଟ ୧୯୯୫କୁ ସଂଶୋଧନ କରିବା ପାଇଁ ଆଜି ଲୋକସଭାର ପ୍ରଶ୍ନକାଳରେ ଏହାକୁ ଆଗତ କରାଯାଇଛି। ଏହା ଉପରେ ଦୀର୍ଘ ୮ ଘଣ୍ଟାରୁ ଅଧିକ ସମୟ ବିତର୍କ ହେବ।
ଶାସକ ବିଜେପିର କହିବା କଥା ଯେ ଏହି ସଂଶୋଧିତ ବିଲ ୱାକଫ ସମ୍ପତ୍ତିର ପରିଚାଳନାରେ ପାରଦର୍ଶିତା ଆଣିବ। କିନ୍ତୁ ବିରୋଧୀ ଏହାକୁ ଅସାମ୍ବିଧାନିକ ଓ ମୁସଲିମାନଙ୍କ କ୍ଷେତ୍ରରେ ପକ୍ଷପାତିତା ବୋଲି ଯୁକ୍ତି ବାଢ଼ିଛନ୍ତି। ବିରୋଧୀ ଇଣ୍ଡିଆ ବ୍ଲକ ଏହାକୁ ବିରୋଧ କରିବାକୁ ନିଷ୍ପତ୍ତି ନେଇ ଥିବାରୁ ଗୃହରେ ଘମାଘୋଟ ବାକଯୁଦ୍ଧ ହେବା ଏକ ପ୍ରକାରର ନିଶ୍ଚିତ।
ୱାକଫ ବିଲ କ’ଣ?
ମୁସଲମାନ ୱାକଫ ଆକ୍ଟ ୧୯୨୩ ପ୍ରକୃତରେ ଇଂରେଜଙ୍କ ଶାସନ ସମୟରେ ଲାଗୁ ହୋଇଥିଲା। ଭାରତ ସ୍ୱାଧୀନତା ପରେ ଏହାର ସ୍ଥାନ ୱାକଫ ଆକ୍ଟ ୧୯୫୪ ନେଇଥିଲା। ଏହି ଆଇନକୁ ୧୯୯୫ରେ ସଂଶୋଧନ ବି କରାଯାଇଥିଲା। ସମାଲୋଚକମାନେ ଯୁକ୍ତି କରିଛନ୍ତି ଯେ ୧୯୯୫ରେ ହୋଇଥିବା ସଂଶୋଧନ ମୁସଲିମ ସଂପ୍ରଦାୟର ଲୋକଙ୍କୁ ସନ୍ତୁଷ୍ଟ କରିବା ପାଇଁ କରାଯାଇଥିଲା। ସଂଶୋଧନ ଯୋଗୁ ୱାକଫ ସମ୍ପତ୍ତି ପରିଚାଳନାରେ ଅନେକ ଆଇନଗତ ସମସ୍ୟା ଦେଖା ଯାଉଥିବା ସେମାନେ କହିଛନ୍ତି।
୨୦୨୪ ସଂଶୋଧିତ ବିଲରେ କ’ଣ ବ୍ୟବସ୍ଥା କରାଯାଇଛି?
ୱାକଫ ଆକ୍ଟର ନାଁ ପରିବର୍ତ୍ତନ
ୱାକଫର ଅର୍ଥକୁ ଅଧିକ ସରଳ କରିବା
ପଞ୍ଜିକରଣ ପ୍ରକ୍ରିୟାରେ ପରିବର୍ତ୍ତନ ଆଣିବା
ରେକର୍ଡକୁ ଠିକ ଭାବେ ଯାଞ୍ଚ କରିବା ପାଇଁ ଟେକ୍ନୋଲୋଜିର ବ୍ୟବହାର କରିବା
ମୁସଲମାନ ୱାକଫ ଆକ୍ଟକୁ ହଟାଇବା ପାଇଁ ଆସିଥିବା ବିଧେୟକ ସହ ଏହି ବିଲକୁ ପ୍ରଥମେ ୨୦୨୪ ମସିହା ଅଗଷ୍ଟ ୮ରେ ଲୋକସଭାରେ ଆଗତ କରାଯାଇଥିଲା। ତେବେ ଏହା ଉପରେ ଅଧିକ ଆଲୋଚନା ପାଇଁ ବିଲକୁ ଜେପିସି ନିକଟକୁ ପଠାଇ ଦିଆଯାଇଥିଲା। ଏକାଧିକ ସଂଶୋଧନ ସହ ବିଲକୁ ଆଜି ପୁଣି ଲୋକସଭାରେ ଆଗତ କରାଯାଇଛି।
କେନ୍ଦ୍ର ସରକାର କ’ଣ ଯୁକ୍ତି ରଖିଛନ୍ତି?
ଗତବର୍ଷ ନଭେମ୍ବର ମାସରେ ବିଜେପି ମହାରାଷ୍ଟ୍ର ବିଧାନସଭାରେ ବଡ଼ ବିଜୟ ହାସଲ କରିଥିଲା। ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ “ କଂଗ୍ରେସର ତୃଷ୍ଟୀକରଣ ରାଜନୀତିରେ ୱାକଫ ହେଉଛି ଗୋଟିଏ ଆଇନ। ସମ୍ବିଧାନରେ ଏହାର କୌଣସି ସ୍ଥାନ ନାହିଁ।”
ସରକାର ଦାବି କରିଛନ୍ତି ଯେ ପୂର୍ବରୁ ଆଇନରେ ଥିବା ଗଳା ବାଟକୁ ଏହି ବିଲ ରୋକିବ ଓ ୱାକଫ ବୋର୍ଡଗୁଡ଼ିକର ପାରଦର୍ଶିତାକୁ ବୃଦ୍ଧି କରିବ। ୱାକଫ ସମ୍ପତ୍ତିର ପ୍ରଶାସନିକ ବ୍ୟବସ୍ଥାରେ ଉନ୍ନତି ଆଣିବା ଓ ରାଜ୍ୟ ୱାକଫ ବୋର୍ଡଗୁଡ଼ିକ ଭୋଗୁଥିବା ସମସ୍ୟାକୁ ସାଧାନ କରିବାରେ ଏହି ବିଲ ସହାୟକ ହେବ।
ବିରୋଧୀ କ’ଣ କହୁଛନ୍ତି?
ବିରୋଧୀ ଇଣ୍ଡିଆ ବ୍ଲକ ଯୁକ୍ତି କରିଛି ଯେ ୱାକଫ ସମ୍ପତ୍ତିର ନିୟନ୍ତ୍ରଣ ଜଣଙ୍କ ହାତରେ ରହିବ। ଏହା ଦ୍ୱାରା ସଂଖ୍ୟା ଲଘୁଙ୍କ ଅଧିକାର କ୍ଷୁଣ୍ଣ ହେବ। ବିଲ ଉପରେ ଆଲୋଚନା ପାଇଁ ଧାର୍ଯ୍ୟ ହୋଇଥିବା ୮ ଘଣ୍ଟାର ସମୟକୁ ମଧ୍ୟ ସେମାନେ ବିରୋଧ କରୁଛନ୍ତି। ବିଲକୁ ସେମାନେ ଅସାମ୍ବିଧାନିକ ବୋଲି କହିଛନ୍ତି। ଜେପିସିରେ ବିଲ ଥିବା ବେଳେ ବିରୋଧୀ ଏକାଧିକ ସଂଶୋଧନ ପାଇଁ ପ୍ରସ୍ତାବ ଦେଇଥିଲେ। କିନ୍ତୁ ଏହାକୁ ଜେପିସିର ଅଧ୍ୟକ୍ଷ ଥିବା ବିଜେପି ସାଂସଦ ଗ୍ରହଣ କରି ନାହାନ୍ତି।
ୱାକଫ ସମ୍ପତ୍ତିକୁ ନେଇ ଯଦି ବିବାଦ ଦେଖା ଯାଏ ତା’ହେଲେ ଏହାର ନିଷ୍ପତ୍ତି ରାଜ୍ୟର ସବୁଠାରୁ ବରିଷ୍ଠ ଅଧିକାରୀ ନେବେ। ଅଧିକାରୀ ଜଣଙ୍କ ସରକାରଙ୍କ ଅଧୀନରେ ଥିବାରୁ ସେ ପକ୍ଷପାତିତା କରିପାରନ୍ତି ବୋଲି ବିରୋଧୀ କହିଛନ୍ତି। ଧାର୍ମିକ ସ୍ୱଂୟଶାସିତକୁ ମଧ୍ୟ ବିଲ ଉଲ୍ଲଙ୍ଘନ କରିବ ବୋଲି ବିରୋଧୀ ଯୁକ୍ତି ଉପସ୍ଥାପନ କରିଛନ୍ତି।
ୱାକଫ ବିଲକୁ କେଉଁମାନେ ସମର୍ଥନ କରୁଛନ୍ତି?
ଭାରତୀୟ ଜନତା ପାର୍ଟି(ବିଜେପି)
ଜନତା ଦଳ ୟୁନାଇଟେଡ(ଜେଡିୟୁ)
ଲୋକ ଜନଶକ୍ତି ପାର୍ଟି(ରାମ ବିଳାଶ)
ତେଲୁଗୁ ଦେଶମ ପାର୍ଟି(ଟିଡିପି)
ଶିବସେନା(ଏକନାଥ ସିନ୍ଦେ)
କେଉଁମାନେ ବିରୋଧ କରୁଛନ୍ତି?
କଂଗ୍ରେସ
ଡିଏମକେ
ସମାଜବାଦୀ ପାର୍ଟି
ଏନସିପି(ଶରଦ ଚନ୍ଦ୍ର ପାୱାର)
ଟିଏମସି
ଆମ ଆଦମୀ ପାର୍ଟି(ଆପ୍)
ରାଷ୍ଟ୍ରୀୟ ଜନତା ଦଳ (ଆରଜେଡି)
ସିପିଆଇ(ଏମ)
ସିପିଆଇ
ବିଲକୁ ପାରିତ କରି ପାରିବ ତ ବିଜେପି?
ଲୋକସଭାରେ ବିଲକୁ ପାରିତ କରିବା ପାଇଁ ଶାସକ ଦଳକୁ ୨୭୨ ଖଣ୍ଡ ଭୋଟର ଆବଶ୍ୟକ ରହିଛି। ବର୍ତ୍ତମାନ ଏନଡିଏ ପାଖରେ ୨୯୩ ଜଣ ସାଂସଦ ରହିଛନ୍ତି।
ବିଜେପି: ୨୪୦ ସାଂସଦ
ଜେଡିୟୁ – ୧୨ ସାଂସଦ
ଟିଡିପି- ୧୬ ସାଂସଦ
ଏଲଜେପି(ଆରଭି)- ୫ ସାଂସଦ
ଆରଏଲଡି – ୨ ସାଂସଦ
ଶିବସେନା(ଏକନାଥ ସିନ୍ଦେ)- ୭ ସାଂସଦ
ଯଦି ଏନଡିଏର ସବୁ ସାଂସଦ ଏକାଠି ରହିବେ, ତା’ହେଲେ ବିଲ ଲୋକସଭାରେ ବେଶ ସହଜରେ ପାରିତ ହୋଇଯିବ।
୨୪୫ ସଦସ୍ୟ ବିଶିଷ୍ଟ ରାଜ୍ୟସଭାରେ ବିଲକୁ ପାରିତ କରିବା ପାଇଁ ୧୧୯ ସାଂସଦଙ୍କ ସମର୍ଥନ ଦରକାର। ଏନଡିଏ ପାଖରେ:
ବିଜେପି-୯୮ ସାଂସଦ
ଜେଡିୟୁ- ୪ ସାଂସଦ
ଟିଡିପି- ୨ ସାଂସଦ
ଏନସିପି(ଅଜିତ ପାୱାର)- ୩ ସାଂସଦ
ଶିବସେନା(ଏକନାଥ ସିନ୍ଦେ)- ୧ ସାଂସଦ
ଆରଏଲଡି – ୧ ସାଂସଦ
ଏନଡିଏ ପାଖରେ ୧୨୫ ସାଂସଦଙ୍କ ସମର୍ଥନ ରହିଥିବା ବେଳେ କିଛି ଛୋଟ ଦଳ ମନୋନୀତ ସଦସ୍ୟମାନେ ମଧ୍ୟ ବିଲକୁ ସମର୍ଥନ କରିବାର ସମ୍ଭାବନା ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
