ମୁଖ୍ୟମନ୍ତ୍ରୀ ସୋରେନ୍‌ ଗାଏବ୍‌, ୩୬ଲକ୍ଷ ସହ ବିଏମ୍‌ଡବ୍ଲୁ କାର୍‌ ଜବତ କଲା ଇଡି

ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ୍‌ଙ୍କ ମିଳୁନି ପତ୍ତା। ଗତକାଲି ଠାରୁ ସୋରେନ୍‌ ନିଜ ଦିଲ୍ଲୀ ସ୍ଥିତ ବାସଭବନ କିମ୍ବା ଝାଡଖଣ୍ଡ ବାସଭବନରେ ନାହାନ୍ତି। ମନିଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ତାଙ୍କ ବାସଭବନ ସମସ୍ତ ଅନେକ ସ୍ଥାନରେ ଚଢ଼ାଉ କରିଥିଲା। କିନ୍ତୁ ସେ ଗାଏବ ଥିବା ଜଣାପଡିଛି।

ଜମି ଦୁର୍ନୀତିର ମନି ଲଣ୍ଡରିଂ ମାମଲାରେ ଇଡି ପଚରାଉଚରା କରିବା ପାଇଁ ସୋମବାର ମୁଖ୍ୟମନ୍ତ୍ରୀ ହେମନ୍ତ ସୋରେନ୍‌ଙ୍କ ଦିଲ୍ଲୀ ସ୍ଥିତ ଘରେ ପହଞ୍ଚିଥିଲା। ପ୍ରାୟ ୧୩ ଘଣ୍ଟାରୁ ଅଧିକ ସମୟ ଧରି ଇଡିର ଏକ ଟିମ୍‌ ସେଠାରେ ଡେରା ପକାଇ ରହିଛି। ଏହି ସମୟରେ ଘରେ ଚଢ଼ାଉ କରି ଇଡି କିଛି ନଗଦ ୩୬ ଲକ୍ଷ ଟଙ୍କା, ୨ଟି ବିଏମ୍‌ଡବ୍ଲୁ କାର୍‌ ଓ ଅନେକ ଡକ୍ୟୁମେଣ୍ଟ ମଧ୍ୟ ଜବତ କରିଛି। ତେବେ ରବିବାର ରାତିରୁ ହିଁ ଦିଲ୍ଲୀ ସ୍ଥିତ ଘରୁ ହେମନ୍ତ ସୋରେନ୍‌ କୁଆଡେ ଚାଲି ଯାଇଥିବା ଏକ ସୂତ୍ରରୁ ଜଣାପଡିଛି। ଇଡିର ଆଉ ଏକ ଟିମ ରାଞ୍ଚି ସ୍ଥିତ ମୁଖ୍ୟମନ୍ତ୍ରୀଙ୍କ ବାସଭବନକୁ ଯାଇଥିଲେ ମଧ୍ୟ ତାଙ୍କୁ ପାଇନଥିଲେ। ଇଡି ପକ୍ଷରୁ ହେମନ୍ତ ସୋରେନ ନିଖୋଜ ଥିବା କହିବା ସହ ଏୟାରପୋର୍ଟକୁ ଅଲର୍ଟ କରାଯାଇଛି।

ଜଣେ ବରିଷ୍ଠ ସରକାରୀ ଅଧିକାରୀ କହିଛନ୍ତି, ରାଜ୍ୟରେ ଏକ ଅଦୃଶ୍ୟ ପରିସ୍ଥିତି ଉପୁଜିଛି। ମୁଖ୍ୟମନ୍ତ୍ରୀ କେଉଁଠାରେ ଅଛନ୍ତି ତାହା କେହି ଜାଣନ୍ତି ନାହିଁ। ସାମ୍ପ୍ରତିକ ପରିସ୍ଥିତିରେ କୌଣସି ଘଟଣା ଘଟିଲେ ଆଇନ ଶୃଙ୍ଖଳା ଉପରେ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି।

ଏଥିସହ ଝାଡଖଣ୍ଡର ରାଜ୍ୟପାଳ ସିପି ରାଧାକ୍ରିଷ୍ଣନ କହିଛନ୍ତି ,ସମ୍ବିଧାନର ଅଭିଭାବକ ହୋଇଥିବାରୁ ମୁଁ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଇଡି ଡାକରାକୁ ଦୃଷ୍ଟିରେ ରଖି ରାଜ୍ୟର ପରିସ୍ଥିତି ଉପରେ ନଜର ରଖିଛି। ଏହା ରାଜ୍ୟପାଳଙ୍କର କର୍ତ୍ତବ୍ୟ। ଆବଶ୍ୟକ ହେଲେ ମୁଁ ସୀମା ଅତିକ୍ରମ କରିବି। ରାଜ୍ୟରେ ରାଷ୍ଟ୍ରପତିଙ୍କ ଶାସନ ଲାଗୁ ହେବାର ସମ୍ଭାବନା ଖବର ଏକ ଗୁଜବ। ତେଣୁ ଏଥିରୁ ଦୂରେଇ ରୁହନ୍ତୁ।

ସେପଟେ ଇଡି କହିଛି, କେହି ଆଇନଠାରୁ ଊର୍ଦ୍ଧ୍ୱରେ ନାହାଁନ୍ତି। ଯଦି ଆଜି ମୁଖ୍ୟମନ୍ତ୍ରୀ ଉତ୍ତର ଦେଉ ନାହାଁନ୍ତି, ତେବେ ତାଙ୍କୁ ଆସନ୍ତାକାଲି ଉତ୍ତର ଦେବାକୁ ପଡିବ। ଏହି ସମୟରେ, ସୋରେନ ତଦନ୍ତକାରୀ ସଂସ୍ଥାକୁ ଇମେଲ କରି ଜାନୁୟାରୀ ୩୧ରେ ପଚରାଉଚରା ପାଇଁ ରାଞ୍ଚିରେ ଥିବା ମୁଖ୍ୟମନ୍ତ୍ରୀ ବାସଭବନକୁ ଆସିବାକୁ କହିଛନ୍ତି। ରବିବାର ଇଡିଙ୍କୁ ଲେଖିଥିବା ଏକ ଚିଠିରେ ସୋରେନ ତଦନ୍ତକାରୀ ସଂସ୍ଥାକୁ ରାଜ୍ୟ ସରକାରଙ୍କ କାର୍ଯ୍ୟରେ ବାଧା ସୃଷ୍ଟି କରିବାକୁ ରାଜନୈତିକ ଏଜେଣ୍ଡା ଦ୍ୱାରା ଉତ୍ସାହିତ ବୋଲି ଅଭିଯୋଗ କରିଛନ୍ତି।

ଏହାରି ଭିତରେ ରାଞ୍ଚିରେ ଶାସକ ମିଳିତ ମଞ୍ଚର ସମସ୍ତ ବିଧାୟକମାନଙ୍କୁ ରାଞ୍ଚିରେ ରହିବାକୁ ନିର୍ଦ୍ଦେଶ ଦିଆଯାଇଛି। କୁହାଯାଉଛି ଯେ ମଙ୍ଗଳବାର ଅପରାହ୍ନ ୨ଟା ପରେ ସର୍କିଟ ହାଉସରେ ବିଧାୟକଙ୍କ ବୈଠକ ହେବ। ଏଥିରେ ଜେଏମଏମ, କଂଗ୍ରେସ ଏବଂ ସିପିଆଇ (ଏମଏଲ) ର ବିଧାୟକମାନେ ଅଂଶଗ୍ରହଣ କରିବେ। ଏହି ବୈଠକରେ ମୁଖ୍ୟମନ୍ତ୍ରୀ ହେମନ୍ତ ସୋରେନ ମଧ୍ୟ ଯୋଗ ଦେଇପାରନ୍ତି ବୋଲି ଆଶା କରାଯାଉଛି।

ବ୍ୟାଗ ଏବଂ ବ୍ୟାଗ ସହିତ ପ୍ରସ୍ତୁତ ରହିବାକୁ ଶାସକ ଦଳକୁ ନିର୍ଦ୍ଦେଶ ଦିଆଯାଇଛି। ତେବେ ଝାଡ଼ଖଣ୍ଡରେ ଏଭଳି ପରିସ୍ଥିତି ଉପୁଜିଥିବା ବେଳେ ଏହି ବୈଠକ ଗୁରୁତ୍ୱପୂର୍ଣ୍ଣ। ରାଞ୍ଚିରେ ବିଧାୟକମାନେ ଏକଜୁଟ ହୋଇ ବୈଠକ ଡାକିବା ନେଇ ରାଜନୈତିକ ଅସ୍ଥିରତା ବୃଦ୍ଧି ପାଇଛି।

ସୋରେନ୍‌ଙ୍କ ଏଭଳି ଗାଏବ୍‌ ହେବାକୁ ନେଇ ବିଜେପି ଟାର୍ଗେଟ୍‌ କରିଛି। ଇଡିର ପ୍ରଶ୍ନ ବାଣରୁ ବଞ୍ଚିବା ପାଇଁ ମୁଖ୍ୟମନ୍ତ୍ରୀ ସୋରେନ୍‌ ପଳାତକ ସାଜିଛନ୍ତି। ତାଙ୍କ ସୁରକ୍ଷାରେ ବିପଦ ଥିବା ଦର୍ଶାଇ ବିଜେପି ପୁରସ୍କାର ରାଶି ଘୋଷଣା କରିଛି। ସୋରେନ୍‌ କେଉଁଠି ଅଛନ୍ତି ଜଣାଇଲେ ୧୧ ହଜାର ଟଙ୍କା ପୁରଷ୍କାର ଦିଆଯିବ ବୋଲି ବିଜେପି ଘୋଷଣା କରିଛି।

ଝାଡ଼ଖଣ୍ଡ ମୁଖ୍ୟମନ୍ତ୍ରୀଙ୍କୁ ଜାନୁଆରୀ ୨୭ରେ ଇଡି ଦଶମ ଥର ପାଇଁ ସମନ ପଠାଇ ଜାନୁଆରୀ ୨୯ରୁ ୩୧ ତାରିଖରେ ହାଜର ହେବାକୁ କହିଥିଲା। ସେହିଦିନ ରାଞ୍ଚିରୁ ରାଜଧାନୀ ଦିଲ୍ଲୀ ଆସିଥିଲେ ହେମନ୍ତ ସୋରେନ। ସୋରେନ ଇଡିକୁ ଚିଠି ଲେଖିଥିଲେ ମଧ୍ୟ ପଚରାଉଚରା ପାଇଁ ତାରିଖ ଓ ସମୟ ଠିକ୍ କରିନଥିଲେ। ଏବେ ସୋରେନ୍ ୩୧ ତାରିଖରେ ହାଜର ହୋଇ ଇଡି ଆଗରେ ପକ୍ଷ ରଖିବେ ବୋଲି ସୂଚନା ରହିଛି।