ବର୍ଷକରେ ଭିଜିଲାନ୍ସ ଜାଲରେ ୧୦୦ ଲାଞ୍ଚୁଆ ସରକାରୀ ବାବୁ

ଭୁବନେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶା ଭିଜିଲାନ୍ସ ପକ୍ଷରୁ ୨୦୨୧ ବର୍ଷର ରିଭ୍ୟୁ ରିପୋର୍ଟ ପ୍ରକାଶ ପାଇଛି। ଏହି ରିଭ୍ୟୁ ରିପୋର୍ଟ ମୁତାବକ, ଗତ ବର୍ଷକ ମଧ୍ୟରେ ଲାଞ୍ଚ ନେଲା ବେଳେ ଶହେ ଲାଞ୍ଚୁଆ ବାବୁ ଧରା ପଡ଼ିଛନ୍ତି। ସେହିପରି ବର୍ଷକରେ ୨୬୭ଟି ଅପରାଧିକ ମାମଲାରେ ୪୭୫ ଜଣଙ୍କ ନାଁରେ କେସ୍ ରୁଜୁ ହୋଇଛି। ସେମାନଙ୍କ ମଧ୍ୟରୁ ପ୍ରଥମ ଶ୍ରେଣୀ ସରକାରୀ ଅଧତ୍କାରୀଙ୍କ ସଂଖ୍ୟା ୪୬ ରହିଛି।

୨୦୨୧ ବର୍ଷରେ ୯୨ଟି ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ୧୦୭.୬୦ କୋଟି ଟଙ୍କା ଠାବ ହୋଇଛି। ଏପରିକି ଲାଞ୍ଚ ନେବାବେଳେ ୧୦୯ ଜଣ ଧରାପଡ଼ି ଗିରଫ ହୋଇଛନ୍ତି। ତେବେ ବଡ଼ କଥା ହେଉଛି ଗିରଫ ହୋଇଥିବା ୧୦୯ ଜଣଙ୍କ ମଧ୍ୟରୁ ୧୦୦ ଜଣ ସରକାରୀ ଅଫିସର୍ ରହିଛନ୍ତି।

ସେହିପରି ଟଙ୍କା ନେଇ ଯିବା ବେଳେ ରାସ୍ତାରେ ଧରାପଡ଼ିଛନ୍ତି ୧୫ ଜଣ ସରକାରୀ ବାବୁ। ଆଉ ସେମାନଙ୍କ ନିକଟରୁ ମୋଟ ୫୮.୮୪ ଲକ୍ଷ ଟଙ୍କା ଭିଜିଲାନ୍ସ ଜବତ କରିଛି। ୧୫ ଜଣ ସରକାରୀ ବାବୁଙ୍କ ମଧ୍ୟରେ ୮ ଜଣ କ୍ଲାସ୍-୧, ୪ ଜଣ କ୍ଲାସ୍-୨ ଓ ତିନିଜଣ କ୍ଲାସ୍-୩ କର୍ମଚାରୀ ରହିଛନ୍ତି।