କ୍ୟାବିନେଟ ନିଷ୍ପତ୍ତିକୁ ବିରୋଧ: ୩ରେ ମହାସମାବେଶ କରିବ ୬୬୨ବର୍ଗ କଲେଜ ସଂଘ

ଅନୁଦାନପ୍ରାପ୍ତ ବେସରକାରୀ କଲେଜ ଓ ଜୁନିୟର କଲେଜର ଯୋଗ୍ୟ କର୍ମଚାରୀମାନଙ୍କୁ ସଂଶୋଧିତ ବେତନ ହାର ନିୟମ-୨୦୧୭ ଅନୁସାରେ ବର୍ଦ୍ଧିତ ଅନୁଦାନ ୨୦୨୨ ଜାନୁୟାରୀ ପହିଲାରୁ ଦେବା ପାଇଁ ଆଜି ରାଜ୍ୟ କ୍ୟାବିନେଟର ନିଷ୍ପତ୍ତିକୁ ନିଖିଳ ଓଡ଼ିଶା ୬୬୨ ବର୍ଗ ବେସରକାରୀ କଲେଜ ଅଧ୍ୟାପକ ଓ କର୍ମଚାରୀ ସଂଘ ତୀବ୍ର ବିରୋଧ କରିଛି । କ୍ୟାବିନେଟର ଏଭଳି ନିଷ୍ପତ୍ତି ବିରୁଦ୍ଧରେ ଆସନ୍ତା ଫେବୃୟାରୀ ୩ତାରିଖରେ ସଂଘ ପକ୍ଷରୁ ଭୁବନେଶ୍ୱରରେ ମହାସମାବେଶ କରାଯିବା ସହ ଆଜିଠୁ କଳାବ୍ୟାଜ୍ ପିନ୍ଧି ପ୍ରତିବାଦ କରିବ ବୋଲି ଘୋଷଣା କରିଛି ।

ସଂଘର ସଭାପତି ଗୋଲକ ନାୟକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ଅନୁଦାନପ୍ରାପ୍ତ ବେସରକାରୀ କଲେଜର ଶିକ୍ଷକ ଓ କର୍ମଚାରୀଙ୍କୁ ସଂଶୋଧିତ ହାରରେ ଦରମା ଦେବା ପାଇଁ ରାଜ୍ୟ କ୍ୟାବିନେଟ ଆଜି ଯେଉଁ ନିଷ୍ପତ୍ତି ତାକୁ ଆମେ ବିରୋଧ କରୁଛୁ । ସରକାରଙ୍କ ଏଭଳି ନୀତି ଯୋଗୁ ଆମେ ୪୮୮ବର୍ଗର କଲେଜ ଅଧ୍ୟାପକ ଓ କର୍ମଚାରୀମାନଙ୍କଠୁ ବି କମ୍ ଦରମା ପାଇବୁ । କ୍ୟାବିନେଟର ଏହି ନିଷ୍ପତ୍ତି ପ୍ରତିବାଦରେ ଆଜିଠୁ ୬୬୨ ବର୍ଗର କଲେଜ ଅଧ୍ୟାପକ ଓ କର୍ମଚାରୀମାନେ କଳାବ୍ୟାଜ୍ ପିନ୍ଧିବେ । ଆସନ୍ତା ୨୫ରୁ ସବୁ ଜିଲ୍ଲାପାଳମାନଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କ ନିକଟକୁ ଦାବିପତ୍ର ପଠାଇବେ । ଆଉ ଫେବୃୟାରୀ ୩ ତାରିଖରେ ରାଜଧାନୀ ଭୁବନେଶ୍ୱରରେ ଏକ ମହାସମାବେଶ କରାଯିବ ବୋଲି ସେ ଘୋଷଣା କରିଛନ୍ତି । ସରକାରଙ୍କ ଏଭଳି ନୀତି ଯୋଗୁ ଆସନ୍ତା +୨ ଓ +୩ ପରୀକ୍ଷାରେ ଅସହଯୋଗ କରାଯିବ ଓ ମୂଲ୍ୟାଙ୍କନକୁ ବି ବର୍ଜନ କରାଯିବ ବୋଲି ସେ ଚେତାବନୀ ଦେଇଛନ୍ତି ।

ସୂଚନାଯୋଗ୍ୟ, ରାଜ୍ୟ କ୍ୟାବିନେଟ ଆଜି ଅନୁଦାନପ୍ରାପ୍ତ ବେସରକାରୀ କଲେଜ ଓ ପୂର୍ବର ଜୁନିୟର କଲେଜର ଯୋଗ୍ୟ କର୍ମଚାରୀଙ୍କୁ ୨୦୧୭ ସଂଶୋଧିତ ବେତନ ହାରରେ ୨୦୨୨ ଜାନୁୟାରୀ ପହିଲାରୁ ବର୍ଦ୍ଧିତ ଅନୁଦାନ ଦେବାକୁ ନିଷ୍ପତ୍ତି ନେଇଛନ୍ତି । ଏହାଦ୍ୱାରା ୧୫,୭୭୧ଜଣ ଅଧ୍ୟାପକ ଓ କର୍ମଚାରୀ ଉପକୃତ ହେବେ ତଥା ୨୯୦କୋଟି ଟଙ୍କାର ଅତିରିକ୍ତ ଆର୍ଥିକ ବୋଝ ପଡ଼ିବ ବୋଲି ସରକାରଙ୍କ ପକ୍ଷରୁ କୁହାଯାଇଥିଲା ।