ଖୋର୍ଦ୍ଧା(ଓଡ଼ିଶା ରିପୋର୍ଟର): ସୁନା ଦୋକାନରୁ ଡକାୟତି କରିବାକୁ ଉଦ୍ୟମ କରି ଧରାପଡିଛନ୍ତି ୭ ଲୁଟେରା। ଘଟଣା ଘଟିଛି ଖୋର୍ଦ୍ଧାରେ। ସୁନା ଦୋକାନରୁ ଡକାୟତି ପାଇଁ ଯୋଜନା କରୁଥିବା ବେଳେ ସଦର ଥାନା ପୋଲିସ ୭ ଜଣଙ୍କୁ ଗିରଫ କରିଛି।
୧୬ ନମ୍ବର ଜାତୀୟ ରାଜପଥ ଓସିସି ଛକଠାରେ ଡକାୟତି ଲାଗି ଏକାଠି ହୋଇଥିବା ଖବର ପାଇ ପୋଲିସ ସେଠାରେ ଚଢ଼ାଉ କରିଥିଲା। ଘଟଣାସ୍ଥଳରୁ କିଛି ଡକାୟତ ଫେରାର ହୋଇଯାଇଥିବା ବେଳେ ୭ ଜଣଙ୍କୁ ଗିରଫ କରିବାରେ ସଫଳ ହୋଇଛି ପୋଲିସ।
ଗିରଫ ଅଭିଯୁକ୍ତମାନେ ହେଲେ ଜଟଣୀ ଅଞ୍ଚଳର ସୁଜିତ ବେହେରା, ଖୋର୍ଦ୍ଧା ଅଂଚଳର ସୁରେଶ ସାହୁ, କୁମାରବସ୍ତର ଦିବ୍ୟାଙ୍କର ଗଜେନ୍ଦ୍ର, ନିହାର ରଂଜନ ସାମନ୍ତରାୟ, ସରୋଜ କହଲସିଂ, ତାପସ ମଂଗରାଜ ଓ ଅଣ୍ଡା ଗାଁର ଅଲତାବ ହୁସେନ। ସେମାନଙ୍କ ନିକଟରୁ ୨ଟି ମାଉଜର, ୧୦ ରାଉଣ୍ଡ ଗୁଳି ସହ ୧୭ଟି ବୋମା ମଧ୍ୟ ଜବତ କରାଯାଇଛି। ଗିରଫ ଡକାୟତମାନେ ବିଭିନ୍ନ ଅସାମାଜିକ କାର୍ଯ୍ୟରେ ସାମିଲ ଥିବା ପୋଲିସ ସୂଚନା ଦେଇଛି।