ଏସିଡ୍ ଆକ୍ରମଣ ବନ୍ଦ କରିବା ଲକ୍ଷ୍ୟରେ ଗଣଦୌଡ଼

ଭୁବନେଶ୍ୱର(ଓଡ଼ିଶା ରିପୋର୍ଟର): ଏସିଡ୍ ଆକ୍ରମଣ ବନ୍ଦ କରିବାକୁ ନେଇ ସଚେତନତା ସୃଷ୍ଟି କରିବା ଲକ୍ଷ୍ୟରେ ଭୁବନେଶ୍ୱରରେ ଅନୁଷ୍ଠିତ ହୋଇଛି ଏକ ଗଣଦୌଡ଼। ଯାହାର ନାଁ ରଖାଯାଇଥିଲା ଷ୍ଟପ୍‌ ଆଥନ୍। କଳିଙ୍ଗ ଷ୍ଟାଡିୟମରେ INITIATIVE FOR SOCIAL DEVELOPMENT ପକ୍ଷରୁ ଆୟୋଜିତ ହୋଇଥିବା ଏହି ଗଣଦୌଡ଼କୁ ଉଦଘାଟନ କରିଥିଲେ ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ପ୍ରଫୁଲ୍ଲ ସାମଲ।

ଏସିଡ୍ ମାଡ଼ର ଭୟାବହତା ସଂପର୍କରେ ସଚେତନତା ସୃଷ୍ଟି କରିବା, ଏସିଡ୍ ପୀଡ଼ିତାଙ୍କୁ ଚିହ୍ନଟ କରି ସ୍ୱୀକୃତି ଦେବା, ସେମାନଙ୍କୁ କର୍ମ ନିଯୁକ୍ତି ଦେଇ ଥଇଥାନର ବ୍ୟବସ୍ଥା କରିବା, ଆର୍ଥିକ, ଆଇନଗତ ଭାବେ ସାହାଯ୍ୟ କରିବା ଓ ପୀଡ଼ିତାଙ୍କ ପଛରେ ଠିଆ ହୋଇ ସେମାନଙ୍କୁ ନୈତିକ ସମର୍ଥନ ଦେବା ଲକ୍ଷ୍ୟରେ ଏହି ଗଣଦୌଡ଼ ଆୟୋଜନ କରାଯାଇଥିଲା।

ପ୍ରମୋଦିନୀ ରାଉଳ, ମାନିନୀ ବିଷୋଇଙ୍କ ପରି ଅନେକ ଏସିଡ୍ ପୀଡ଼ିତା ମଧ୍ୟ ଏହି ଗଣଦୌଡ଼ରେ ସାମିଲ ହୋଇଥିଲେ। ଏହାସହ ନିଜ ଗୋଡ଼ରେ ଛିଡ଼ା ହେବାକୁ ଅନ୍ୟ ପୀଡ଼ିତାଙ୍କୁ ଆହ୍ୱାନ ଦେଇଥିଲେ। ପୋଲିସ ଡିଜି ଆର୍.ପି. ଶର୍ମା ଓ ସାଂସଦ ଅଚ୍ୟୁତ ସାମନ୍ତ ପ୍ରମୁଖ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ।