ସ୍ୱାସ୍ଥ୍ୟସେବାର ନଗ୍ନ ଚିତ୍ର : SCB ମେଡିକାଲରେ 'ଜୀବନ ରକ୍ଷାକାରୀ' ୮୯ଟି ଯନ୍ତ୍ରାଂଶ ଅଚଳ!

ଓଡ଼ିଶାର ସ୍ୱାସ୍ଥ୍ୟସେବାର ମେରୁଦଣ୍ଡ ଭାବେ ପରିଚିତ କଟକସ୍ଥିତ ଏସସିବି ମେଡିକାଲ୍ କଲେଜ୍ ଓ ହସ୍ପିଟାଲ୍‌ର ଅବ୍ୟବସ୍ଥା ନେଇ ଏକ ସାଂଘାତିକ ତଥ୍ୟ ସାମ୍ନାକୁ ଆସିଛି। ୨୦୨୫ ମସିହା ସେପ୍ଟେମ୍ବର ୧୫ ତାରିଖ ସୁଦ୍ଧା ଏସସିବି ମେଡିକାଲରେ ମୋଟ ୮୯ଟି ଗୁରୁତ୍ୱପୂର୍ଣ୍ଣ ଚିକିତ୍ସା ଉପକରଣ ସମ୍ପୂର୍ଣ୍ଣ ଅଚଳ ହୋଇ ପଡ଼ିରହିଛି । ଓଡ଼ିଶା ରାଜ୍ୟ ମେଡିକାଲ ନିଗମ(OSMC) ଦ୍ୱାରା ସୂଚନା ଅଧିକାର (RTI) ଆଇନ୍ ବଳରେ ସୂଚନାକର୍ମୀ ପ୍ରଦୀପ ପ୍ରଧାନଙ୍କୁ ପ୍ରଦାନ କରାଯାଇଥିବା ତଥ୍ୟରୁ ଏହା ଜଣାପଡ଼ିଛି ।ରୋଗୀଙ୍କ ଜୀବନ ବଞ୍ଚାଇବା ଦିଗରେ ଏହି ଯନ୍ତ୍ରାଂଶଗୁଡ଼ିକର ବିଶେଷ ଆବଶ୍ୟକତା ଥିବା ସତ୍ତ୍ୱେ ଏହା କାମ ନକରିବା ରାଜ୍ୟରେ ସ୍ୱାସ୍ଥ୍ୟସେବାର ବାସ୍ତବ ଓ ନଗ୍ନ ଚିତ୍ରକୁ ପଦାକୁ ଆଣିଛି।

ଜୀବନ ରକ୍ଷାକାରୀ ଉପକରଣ ଅଚଳ

ଏହି ଅଚଳ ଯନ୍ତ୍ରାଂଶଗୁଡ଼ିକ ମଧ୍ୟରେ ଅନେକ ଜରୁରୀକାଳୀନ ଉପକରଣ ରହିଛି ଯାହା ରାଜ୍ୟ ସରକାରଙ୍କ ଦାୟିତ୍ୱହୀନତାକୁ ପଦାରେ  ପ କାଇ ଦେଇଛି।

ଭେଣ୍ଟିଲେଟର୍ ସଙ୍କଟ: ଗୁରୁତର ରୋଗୀଙ୍କ ଜୀବନ ବଞ୍ଚାଉଥିବା 'ଭେଣ୍ଟିଲେଟର୍, ICU' ଏବଂ 'ନିଓନାଟାଲ୍ ଭେଣ୍ଟିଲେଟର୍' ସମେତ ୯ରୁ ଅଧିକ ଭେଣ୍ଟିଲେଟର୍  କାମ କରୁନାହିଁ। ଏହି ଅଚଳ ଭେଣ୍ଟିଲେଟର୍ ଗୁଡ଼ିକ କେନ୍ଦ୍ରୀୟ ICU , କୋଭିଡ୍ ହସ୍ପିଟାଲ୍ , ମେଡିସିନ୍ ICU , SNCU , ଟ୍ରମା ICU , ଏବଂ ଟ୍ରମା ଶିଶୁ ICU  ଭଳି ଅତ୍ୟାବଶ୍ୟକ ବିଭାଗରେ ରହିଛି।

ଅସ୍ତ୍ରୋପଚାର କକ୍ଷରେ ଅବ୍ୟବସ୍ଥା: ଅସ୍ତ୍ରୋପଚାର (OT) ପାଇଁ ଆବଶ୍ୟକ 'ସି ଆର୍ମ ଇମେଜ୍ ଇଣ୍ଟେନସିଫାୟର୍' (C ARM IMAGE INTENSIFIER, BASIC) , 'ଆନାସ୍ଥେସିଆ ୱାର୍କଷ୍ଟେସନ୍' (ANAESTHESIA WORKSTATION) , ଏବଂ 'ଅପରେଟିଂ ଟେବୁଲ୍' (OPERATING TABLE, ELECTRONIC) ପରି ମୂଲ୍ୟବାନ ଯନ୍ତ୍ରାଂଶ ଅଚଳ ହୋଇପଡ଼ିଛି ।

ଲିଭର ଟ୍ରାନ୍ସପ୍ଲାଣ୍ଟ ୟୁନିଟ ଅଚଳ : ରାଜ୍ୟରେ ନୂଆ କରି ଆରମ୍ଭ କରାଯାଇଥିବା 'ଲିଭର ଟ୍ରାନ୍ସପ୍ଲାଣ୍ଟ ୟୁନିଟ୍'ରେ ୬ଟି 'ସିରିଞ୍ଜ୍ ଇନଫ୍ୟୁଜନ୍ ପମ୍ପ୍' (SYRINGE INFUSION PUMP) ଏବଂ ଗୋଟିଏ 'ଆନାସ୍ଥେସିଆ ୱାର୍କଷ୍ଟେସନ୍'  ଅଚଳ ହୋଇପଡ଼ିବା ଚିନ୍ତାର ବିଷୟ।

ବିଦେଶୀ କମ୍ପାନୀର ମହଙ୍ଗା ଯନ୍ତ୍ରାଂଶ ବି ଖରାପ

ଅଚଳ ହୋଇଥିବା ଅଧିକାଂଶ ଯନ୍ତ୍ରାଂଶ ବିଦେଶୀ ତଥା ନାମୀଦାମୀ କମ୍ପାନୀ ଯଥା NIHON KOHDEN (ଜାପାନ), ROCHE, BIO RAD LABORATORY, MAQUET ଏବଂ MEDITEC ENGLAND  ଆଦିରୁ କିଣାଯାଇଥିଲା। ଏହାବ୍ୟତୀତ ALLIED ଓ Allengers Medical Systems Ltd  ଭଳି କମ୍ପାନୀର ଉପକରଣ ମଧ୍ୟ ଅଚଳ ହୋଇ ପଡ଼ିରହିଛି। ମହଙ୍ଗା ମୂଲ୍ୟ ଦେଇ କିଣାଯାଇଥିବା ଏହି ଉପକରଣଗୁଡ଼ିକର ସଠିକ୍ ରକ୍ଷଣାବେକ୍ଷଣ (Maintenance) କରାଯାଉନଥିବାରୁ ଏଭଳି ସ୍ଥିତି ଉପୁଜିଛି ବୋଲି ସାଧାରଣରେ ଅଭିଯୋଗ ହେଉଛି।

ଉତ୍ତରଦାୟିତ୍ୱ ଭୁଲିଗଲେଣି ସରକାର

OSMC ରାଜ୍ୟ ସରକାରଙ୍କ ଏକ ଉଦ୍ୟୋଗ ଏବଂ 'ଆସ୍ୟୁରିଂ କ୍ୱାଲିଟି, ସେଭିଂ ଲାଇଭ୍ସ' (Assuring Quality, Saving lives)ର ସ୍ଲୋଗାନ ଦେଉଥିବାବେଳେ, ରାଜ୍ୟର ସବୁଠୁ ବଡ଼ ହସ୍ପିଟାଲରେ ୮୯ଟି ଜରୁରୀ ଯନ୍ତ୍ରାଂଶ ଅଚଳ ହୋଇ ପଡ଼ିରହିବା ସରକାରୀ ସ୍ୱାସ୍ଥ୍ୟସେବା (Health Service Odisha) ପ୍ରତିଶ୍ରୁତି ଓ ଉତ୍ତରଦାୟିତ୍ୱ ପ୍ରତି ଉପହାସ ହୋଇଛି। ରାଜ୍ୟ ସରକାର 'ଗୋପବନ୍ଧୁ ଜନ ଆରୋଗ୍ୟ ଯୋଜନା ଓ ଆୟୁଷ୍ମାନ ଯୋଜନାରେ' ମାଧ୍ୟମରେ ଉତ୍ତମ ସେବାର ଦାବି କରୁଥିବାବେଳେ, ମୌଳିକ ସ୍ୱାସ୍ଥ୍ୟ ଭିତ୍ତିଭୂମିର ଏପରି ଦୁର୍ଦ୍ଦଶା ଜୀବନ-ମୃତ୍ୟୁ ସହ ସଂଗ୍ରାମ କରୁଥିବା ରୋଗୀଙ୍କ ପାଇଁ ଏକ ବଡ଼ ବିପଦ ସୃଷ୍ଟି କରିଛି।

ରାଜ୍ୟ ସରକାର ତୁରନ୍ତ  Scb Medical ର ଏହି ଯନ୍ତ୍ରାଂଶଗୁଡ଼ିକୁ ମରାମତି କରି କାର୍ଯ୍ୟକ୍ଷମ କରିବା ଦିଗରେ ଦୃଢ଼ ପଦକ୍ଷେପ ନିଅନ୍ତୁ ଏବଂ ଅଚଳ ଉପକରଣଗୁଡ଼ିକ ପାଇଁ ଯେଉଁ ଅଧିକାରୀମାନେ ଦାୟୀ, ସେମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ବୁଦ୍ଧିଜୀବୀ ମହଲରେ ଦାବି ହୋଇଛି।