ଆସନ୍ତା ୫ତାରିଖ ଶୁକ୍ରବାର ବୁଦ୍ଧ ପୂର୍ଣ୍ଣିମାରେ ଚଳିତବର୍ଷର ପ୍ରଥମ ଚନ୍ଦ୍ରଗ୍ରହଣ ସଂଘଟିତ ହେବ । ତେବେ ଏହି ମହାଜାଗତିକ ଦୃଶ୍ୟକୁ ଓଡ଼ିଶାରେ ଖାଲି ଆଖିରେ ଦେଖିବା ସମ୍ଭବପର ହେବନି । ଟେଲିସ୍କୋପ୍ କିମ୍ବା ବାଇନାକୁଲର ମାଧ୍ୟମରେ ଏହି ଚନ୍ଦ୍ରଗ୍ରହଣକୁ ଦେଖିହେବ ବୋଲି ଭୁବନେଶ୍ୱରସ୍ଥିତ ପଠାଣୀ ସାମନ୍ତ ପ୍ଲାନେଟୋରିୟମର ଉପନିର୍ଦ୍ଦେଶକ ଶୁଭେନ୍ଦୁ ପଟ୍ଟନାୟକ ଗଣମାଧ୍ୟମକୁ ସୂଚନା ଦେଇଛନ୍ତି ।
ସେ କହିଛନ୍ତି ଯେ, ପୃଥିବୀର ଛାୟା ଦେଇ ଚନ୍ଦ୍ରମା ମେ’ ୫ତାରିଖ ରାତି ୮ଟା ୪୫ମିନିଟରୁ ମେ’ ୬ତାରିଖ ରାତି ୧ଟା ମଧ୍ୟରେ ଅତିକ୍ରମ କରିବ । ଅର୍ଥାତ୍ ପ୍ରାୟ ୪ଘଣ୍ଟା ୧୮ମିନିଟର ଅବଧିର ଏହି ଗ୍ରହଣର ମଧ୍ୟକାଳ ରାତି ୧୦ଟା ୫୨ମିନିଟରେ ହେବ ଓ ଏହି ଚନ୍ଦ୍ରଗ୍ରହଣ ଏସିଆ, ୟୁରୋପ, ଅଷ୍ଟ୍ରେଲିଆ, ଆଫ୍ରିକା, ଭାରତ ମହାସାଗର ଅଂଚଳରେ ଦୃଶ୍ୟମାନ ହେବ । ଚନ୍ଦ୍ରଗ୍ରହଣ ସାଧାରଣତଃ ସୂର୍ଯ୍ୟପରାଗ ତୁଳନାରେ ବିଶ୍ୱର ଅଧିକ ଅଂଶରେ ଦୃଶ୍ୟମାନ ହୋଇଥାଏ । କାରଣ ଚନ୍ଦ୍ରମା ତୁଳନାରେ ପୃଥିବୀର ଆକାର ବହୁତ ବଡ଼ ଓ ଏହାର ଛାଇ ମଧ୍ୟ ।
